Cambodia News: 2015

Wednesday, December 16, 2015

សាកល្បងអនុវត្តបង្កើតផ្នត់គំនិតទាំង ៥ នេះដើម្បីធ្វើឲ្យខ្លួនឯងជោគជ័យទាំងវ័យក្មេង

រូបតំណាង businessinsider.com

១) អាយុគ្រាន់តែជាតួលេខ

ប្រសិនបើអ្នកបង្វែរអាយុរបស់អ្នកទៅជាជំនាញមួយ ដែលអាចធ្វើរឿងបានតាមវិធីច្រើន វាអាចបង្ហាញពីភាពខុសប្លែកគ្នាខ្លាំង។ នៅពេលដែលអ្នកផ្តល់ឲ្យខ្លួនអ្នកនូវភាពដោះសានៅពេលដែលអ្នកធ្វើ រឿងអ្វីមួយមិនជោគជ័យ គឺជាពេលដែលអ្នកកំពុងតែទាញយកភាពបរាជ័យភាគច្រើនចូលមកក្នុង ជីវិតរបស់អ្នក។ នៅពេលដែលអ្នកជឿទុកចិត្តខ្លួនឯងថាអ្នកអាចធ្វើបាន ហើយអ្នកធ្វើវាទោះបីជាមានមនុស្សមួយចំនួនមិនចង់ឃើញនូវភាព ប្រឹងប្រែង ភាពវៃឆ្លាត រួមទាំងភាពជោគជ័យទាំងអ្នកនូវក្មេង អ្នកត្រូវចេះបង្កើតបញ្ហាដើម្បីធ្វើឲ្យមនុស្សទាំងនោះ ចូលមកពាក់ព័ន្ធក្នុងសកម្មភាពរបស់អ្នក។

២) ជៀសវាងការសម្រេចចិត្តមិនដាច់ស្រេច

ការយកចិត្តទុកដាក់ គឺជាធនធានប្រចាំថ្ងៃ ដើម្បីបង្កើតផលិតភាពការងារប្រកបដោយប្រសិទ្ធភាព ការសម្រេចចិត្តប្រកបភាពច្បាស់លាស់ដាច់ស្រេច អាចជួយឲ្យអ្នកធ្វើរឿងមួយជោគជ័យបានយ៉ាងងាយស្រួលដោយពុំចាំ បាច់មានការខិតខំប្រឹងប្រែងខ្លាំងពេកឡើយ។

៣) បង្កើតឲ្យមានចិត្តអត់ធ្មត់ខ្ពស់

ការផ្តោតយកចិត្តទុកដាក់ គឺជារឿងសំខាន់បំផុត ហើយប្រសិនបើអ្នកមិនមានការអភិវឌ្ឍផ្លូវចិត្តទេ ពេលខ្លះអ្នកប្រហែលជាមិនអាចបញ្ចប់កិច្ចការណាមួយប្រកបដោយ ប្រសិទ្ធភាពនោះទេ ប្រសិនបើធៀបទៅនឹងអ្នកដែលចេះបង្កើតការអត់ធ្មត់ និង ការហ្វឹកហាត់ផ្លូវចិត្ត។

៤) កំណត់គោលដៅឲ្យធំ បញ្ចេញសកម្មភាពឲ្យច្រើន

អ្នកគួរតែសរសេរចេញនូវគោលដៅរបស់អ្នកទាំងអស់មកខាងក្រៅ ដើម្បីឲ្យខ្លួនឯងមើលឃើញវាជាកិច្ចការប្រចាំថ្ងៃរបស់អ្នក ដោយតម្រូវឲ្យអ្នកត្រូវតែធ្វើវា។ ត្រូវរំលឹកខ្លួនឯងឲ្យបានជាប់ ជារៀងរាល់ព្រឹកនូវអ្វីដែលជាគោលដៅដែលអ្នកត្រូវធ្វើ ដោយអ្នកត្រូវចេះសួរខ្លួនឯងថាតើនឹងមានអ្វីកើតឡើងនៅពេលដែល ខ្លួនឯងបានសម្រេចគោលដៅទាំងឡាយរបស់ខ្លួនក្នុងពេលតែមួយឆ្នាំ នោះ?

៥) ជឿជាក់លើខ្លួនឯង

ប្រសិនបើអ្នកមិនជឿលើខ្លួនឯង តើអ្នកណាជាអ្នកជឿលើអ្នក? មនុស្សដែលជោគជ័យ ជាមនុស្សដែលមានការប្រកួតប្រជែងខ្ពស់ ដែលពួកគេជឿជាក់លើអ្វីដែលពួកគេបានបង្កើតឡើង។ នៅពេលដែលអ្នកមានអារម្មណ៍ជឿទុកចិត្តលើខ្លួនឯង គឺគ្មានអ្វីដែលថាអ្នកមិនអាចធ្វើបាន មិនអាចរៀនបាននោះទេ ឬ ការបង្កើត ដំណោះស្រាយមួយបាននោះឡើយ។ នៅពេលដែលអ្នកមានភាពជឿជាក់លើខ្លួនឯងកាន់តែខ្លាំងអ្នកអាចធានា បាននូវភាពអស្ចារ្យដែលអ្នកបង្កើត។

Author: ប្រែសម្រួល៖ ជី លីស៊ុន

Source: businessinsider.com

Friday, November 13, 2015

បើមិនចូលចិត្តជំនួញ យ៉ាងហោចណាស់ក៏ចូលចិត្តសម្ដីសំខាន់ៗរបស់មហាសេដ្ឋី Warren Buffett ចំនួន៨នេះដែរ

មហាសេដ្ឋី Warren Buffett huffingtonpost

ដូចអ្វីដែលប្រិយមិត្តបានជ្រាបនៅពេលកន្លងមក លោកអ្នកបានសិក្សារៀនសូត្រជាច្រើនពីបទពិសោធន៍ ក៏ដូចជាដំបូន្មានយ៉ាងមានតម្លៃនៃភាពជោគជ័យនៅក្នុងអាជីវកម្មពី មហាសេដ្ឋីអាមេរិក Warren Buffett តាមរយៈអត្ថបទចេញផ្សាយរបស់គេហទំព័រ TheBNEWS។ ជាបន្តទៅទៀតនៅថ្ងៃនេះ លោកអ្នកនឹងបានស្វែងយល់បន្ថែមទៀតពីសម្ដីសំខាន់ៗរបស់មហាសេដ្ឋី មានប្រាក់ ៧១,២ ពាន់លានដុល្លារចំនួន ៨ ដូចខាងក្រោមនេះ៖

១) ដុសខាត់គំនិតរបស់អ្នកឲ្យកាន់តែភ្លឺស្វាង
«ខ្ញុំបានចំណាយពេលវេលាយ៉ាងច្រើនលើសលប់ក្នុងមួយថ្ងៃៗដើម្បី អង្គុយគិតគ្រប់ច្រកល្ហក។ នេះមិនមែនជារឿងទូទៅឡើយនៅក្នុងពិភពជំនួញរបស់អាមេរិក។ ខ្ញុំចូលចិត្តអាន ហើយចាប់ផ្តើមគិត បន្ទាប់មកស្វែងរកការសម្រេចចិត្តមួយសម្រាប់ខ្លួនឯង។ ខ្ញុំធ្វើដូច្នេះក៏ដោយសារតែខ្ញុំពេញចិត្តជីវិតបែបនេះ»។

២) មុននឹងទៅ ត្រូវដឹងពីអ្វីដែលអ្នកត្រូវទៅ
«វាជារឿងល្អប្រសើរដើម្បីទិញក្រុមហ៊ុនដ៏អស្ចារ្យមួយក្នុង តម្លៃសមរម្យ ជាជាងទិញក្រុមហ៊ុនធម្មតាមួយដែលលក់ក្នុងតម្លៃដ៏ខ្ពស់»។

៣) ត្រូវឆ្លាត និង ដឹងឲ្យប្រាកដ
«នៅក្នុងមុខរបរអាជីវកម្ម វាជាគំនិតដ៏អស្ចារ្យមួយដែលខ្ញុំបានព្យាយាមបោះទុនទិញភាគហ៊ុន ដែលផ្ទុយពីមនុស្សល្ងង់អាចរត់គេចចេញពីវា»។

៤) ត្រូវស្គាល់មនុស្សឲ្យបានច្បាស់មុនទំនាក់ទំនង
«អ្នកមិនអាចធ្វើឲ្យជីវិតរបស់អ្នកជោគជ័យដោយសារតែមានទំនាក់ទំនងជាមួយមនុស្សមិនល្អនោះឡើយ»។

៥) ត្រូវធ្វើខ្លួនជាមនុស្សម្នាក់ដែលគួរឲ្យគោរព និង មានភាពសុចរិត
«អ្នកបានចំណាយពេល ២០ ឆ្នាំដើម្បីកសាងកិត្តិយសរបស់អ្នក តែវាអាចបាត់បង់ទៅវិញត្រឹមតែមួយប៉ប្រិចភ្នែកប៉ុណ្ណោះ។ បើអ្នកគិតដល់ចំណុចនេះ អ្នកនឹងធ្វើអ្វីផ្សេងៗគ្នាកាន់តែច្រើនឡើង»។

៦) ឲ្យតម្លៃទៅលើអ្វីដែលមានតម្លៃបំផុត
«ជានិច្ចកាល ទ្រព្យសម្បត្តិដ៏ច្រើនមហាសាលនឹងបាត់បង់ម្ចាស់របស់វា។ ក្រៅពីសុខភាព ទ្រព្យសម្បត្តិដ៏មានតម្លៃបំផុតរបស់ខ្ញុំ គឺចំណង់ចំណូលចិត្តរបស់ខ្ញុំ ការរស់នៅជាមួយមនុស្សផ្សេងគ្នា និង ការពង្រឹងមិត្តភាពជាមួយមិត្តភក្ដិរបស់ខ្ញុំ»។

៧) ដកថយនៅពេលដែលអ្នកគិតថាចាំបាច់
«ចំណុចដ៏សំខាន់បំផុតនៅពេលដែលអ្នកសង្កេតឃើញថា ខ្លួនអ្នកកំពុងស្ថិតនៅក្នុងរណ្តៅដ៏ជ្រៅមួយ នោះគឺត្រូវឈប់ជីកវាតទៅទៀត»។

៨) ត្រូវក្លាហាន និង មានទំនុកចិត្ត
«ខ្ញុំតែងតែជឿជាក់លើខ្លួនឯងថា ខ្ញុំនឹងក្លាយជាអ្នកមាន។ ខ្ញុំមិនដែលសង្ស័យថា ខ្ញុំមិនអាចក្លាយជាអ្នកមានសូម្បីតែបន្តិច»៕

Friday, October 16, 2015

៦ជំហានសម្រាប់អាជីវកម្មថ្មីថ្មោងអន្ទងចិត្តធនាគារឱ្យផ្ដល់កម្ចី ឬអ្នកចូលហ៊ុន

៦ ជំហានឆ្ពោះទៅរកការទទួលបានដើមទុនបើកអាជីវកម្ម free-picture

យុទ្ធសាស្ត្រស្វែងរកដើមទុនពីគ្រឹះស្ថាន ហិរញ្ញវត្ថុនានាសម្រាប់ធ្វើបើកអាជីវកម្មជាលើកដំបូង គឺជាលក្ខខណ្ឌដ៏ចាំបាច់មួយយ៉ាងសំខាន់របស់សហគ្រិនទូទៅ។ សហគ្រិនទូទៅច្បាស់ណាស់ពិតជាចង់មូលដ្ឋានគ្រឹះហិរញ្ញវត្ថុដ៏ រឹងមាំមួយសម្រាប់ខ្លួនឯង ធ្វើយ៉ាងណាឲ្យអាជីវកម្មនោះមានស្ថេរភាព និងរីកចម្រើនទៅមុខជាលំដាប់។ ជំហានទាំង៦ខាងក្រោមនេះ គឺជាគន្លឹះដ៏ល្អសម្រាប់ជួយឲ្យលោកអ្នកអាចទទួលបានដើមទុនពី គ្រឹះស្ថានហិរញ្ញវត្ថុបើកអាជីវកម្មរបស់អ្នក។

១) កំណត់ពីតម្រូវការហិរញ្ញវត្ថុ
ការកំណត់ពីតម្រូវការហិរញ្ញវត្ថុ គឺជាករណីពិសេសដែលសហគ្រិនត្រូវពិនិត្យ និងវាយតម្លៃឲ្យបានច្បាស់លាស់។ ទាំងនោះរួមមាន ការទូទាត់បញ្ជី ការផ្គត់ផ្គង់ សម្ភារៈ ការចំណាយលើអគារ ថ្លៃឈ្នួល និងតម្រូវការផ្សេងទៀតសម្រាប់ដំណើរការអាជីវកម្ម។ បន្ទាប់មកអ្នកត្រូវវាយតម្លៃថា តើអ្នកត្រូវការដើមទុនប៉ុន្មានដើម្បីបើកអាជីវកម្មនោះ?

២) បង្កើតជម្រើសស្វែងរកដើមទុនពីគ្រឹះស្ថានហិរញ្ញវត្ថុ
ក្នុងដំណាក់កាលនេះ អ្នកអាចស្វែងយល់លើសេវាកម្មផ្តល់ប្រាក់កម្ចីពីធនាគារ ឬ គ្រឹះស្ថានហិរញ្ញវត្ថុណាមួយដែលបានផ្តល់លក្ខខណ្ឌសមស្របសម្រាប់បើក អាជីវកម្ម។ ជាការប្រសើរបើអ្នកចេះថ្លឹងថ្លែងថា រវាងប្រាក់កម្ចីពីធនាគារ និងការចូលភាគហ៊ុនគ្នាពីសមាជិកគ្រួសារ អ្នកវិនិយោគណាមួយល្អប្រសើរជាង ដែលនេះនឹងជួយបង្កើតជម្រើសសម្រាប់លោកអ្នកកាន់តែច្រើនឡើងបន្ថែម ទៀត។

៣) លើកគម្រោងធ្វើជាមូលដ្ឋានសម្រាប់ខ្ចីប្រាក់
ជាទូទៅគ្រប់ធនាគារ និងស្ថាប័នហិរញ្ញវត្ថុផ្សេងៗត្រូវការពិនិត្យមើលគម្រោងអាជីវកម្ម របស់អ្នកជាមុនសិនមុននឹងសម្រេចផ្តល់ប្រាក់កម្ចី។ នេះដល់ពេលដែលអ្នកត្រូវបង្ហាញព័ត៌មានយ៉ាងលម្អិតពីគម្រោង អាជីវកម្មរបស់អ្នកដោយបញ្ជាក់ពីមូលហេតុ ចំនួនប្រាក់ដែលត្រូវខ្ចី និង យុទ្ធសាស្ត្រធ្វើឲ្យអាជីវកម្មជោគជ័យ។ អ្នកត្រូវប្រាកដថា គោលដៅ និង មូលហេតុនៃការខ្ចីប្រាក់ ការព្យាករលំហូរសាច់ប្រាក់ ការបរិច្ឆេទ ការវិភាគទៅលើស្ថានភាពប្រកួតប្រជែង ធនធាន និង ទិន្នន័យមួយចំនួនទៀតក្នុងគម្រោងអាជីវកម្មដាច់ខាតត្រូវលើកឡើង ជាចាំបាច់។

៤) ទិន្នន័យក្នុងគម្រោងអាជីវកម្មត្រូវតែច្បាស់លាស់ និងស៊ីចង្វាក់គ្នា
ដើម្បីឲ្យអាជីវកម្មរបស់អ្នកមានឱកាសកាន់តែច្រើនឡើងក្នុងការ ទទួលបានដើមទុន រាល់ទិន្នន័យទាំងអស់ត្រូវតែពិតប្រាកដ និងច្បាស់លាស់ មិនបំផ្លើសពីការពិត។ សូមជៀសវាងបង្កើតអាជីវកម្មរបស់អ្នកហួសពីសមត្ថភាពជាក់ស្តែងរបស់ ខ្លួន។ អ្នកជំនាញគ្រឹះស្ថានហិរញ្ញវត្ថុតែងមានបទពិសោធន៍ខ្ពស់ក្នុងការ វាយតម្លៃយ៉ាងប្រុងប្រយ័ត្នលើគម្រោងអាជីវកម្មរបស់អ្នក ដើម្បីកំណត់ថាតើអ្នកអាចទទួលបានពិន្ទុកម្រិតណាសម្រាប់ លក្ខខណ្ឌទទួលបានប្រាក់កម្ចី ឬ អត្រាការប្រាក់នោះ?

៥) ធ្វើបទបង្ហាញរបស់អ្នកលើគម្រោងអាជីវកម្ម
មុននឹងអ្នកធ្វើបទបង្ហាញជាផ្លូវការដល់អ្នកវិនិយោគ ឬ សហគ្រិនរួម អ្នកត្រូវហ្វឹកហាត់អនុវត្តធ្វើបទបង្ហាញដោយខ្លួនឯងឲ្យបាន ស្ទាត់ជាមុនសិនដើម្បីទាក់ទាញចំណាប់អារម្មណ៍។ ចំណុចនេះអ្នកត្រូវរៀបចំលើកយកទិន្នន័យជាក់ស្តែង សំខាន់ៗនៃគម្រោងអាជីវកម្មរបស់អ្នកឲ្យមានរបៀបរៀបរយ និងប្រកបដោយជំនាញវិជ្ជាជីវៈពិតប្រាកដ ទន្ទឹមនឹងការស្វែងរកសំនួរជាច្រើនដែលនឹងអាចចោទសួរឡើងនៅក្នុង បទបង្ហាញនីមួយៗរបស់អ្នក សម្រាប់ផ្តល់ចម្លើយយ៉ាងមានទំនុកចិត្តមួយដល់ដៃគូ វិនិយោគទាំងនោះ។

៦) ស្វែងយល់ពីតម្រូវការគ្រឹះស្ថានហិរញ្ញវត្ថុ
សូមជៀសវាងប្រើប្រាស់ពេលឥតប្រយោជន៍ទៅលើធនាគារ ឬ ស្ថាប័នហិរញ្ញវត្ថុណាដែលមិនយកចិត្តទុកដាក់លើគម្រោងអាជីវកម្មរបស់ អ្នក។ ដើម្បីប្រាកដថា អ្នកអាចទទួលបានប្រាក់កម្ចីឬយ៉ាងណានោះ អ្នកត្រូវចេះច្បិចសួរឫសគល់ស្ថាប័នផ្តល់ប្រាក់កម្ចីនោះពី យុទ្ធសាស្ត្រដែលនឹងធ្វើឲ្យលោកអ្នកអាចមានឱកាសច្រើនក្នុងការ ទទួលបានប្រាក់កម្ចីសម្រាប់យកមកធ្វើដើមទុនបើកអាជីវកម្មរបស់អ្នក ក្នុងរយៈពេលដ៏ខ្លី៕

សមាសភាពសំខាន់ៗចំនួន១០ ជាមូលដ្ឋានគ្រឹះរៀបចំគម្រោងទីផ្សារ

សមាសភាពសំខាន់ៗចំនួន១០ ជាមូលដ្ឋានគ្រឹះគម្រោងទីផ្សារ business2community

ការបង្កើតគម្រោងទីផ្សារដ៏មានប្រសិទ្ធភាពមួយមុន ដាក់ចេញផលិតផល ឬ សេវាកម្មរបស់អ្នក គឺជាមូលដ្ឋានគ្រឹះក្នុងអាជីវកម្មទូទៅ។ បង្កើតគម្រោងទីផ្សារបានកាន់តែល្អ កាន់តែរកឃើញពីគន្លឹះឆ្ពោះទៅរកភាពជោគជ័យក្នុងអាជីវកម្មបាន។ បើអ្នកចង់ឲ្យផលិតផល ឬ សេវាកម្មរបស់អ្នកទទួលបានការគាំទ្រកាន់តែច្រើនមែននោះ អ្នកក៏មិនត្រូវមើលរំលងមូលដ្ឋានគ្រឹះគម្រោងទីផ្សារទាំង ១០ខាងក្រោមនេះឡើយ។

១) ស្រាវជ្រាវទីផ្សារ
ធ្វើយ៉ាងម៉េចដើម្បីស្រាវជ្រាវទីផ្សារបាន? ចម្លើយនោះគឺត្រូវ ប្រមូល រៀបចំ និងសរសេរទិន្នន័យទីផ្សារឲ្យបានច្បាស់លាស់ជាទីបំផុតមុនបើក អាជីវកម្មរបស់អ្នក។ នេះរួមមាន សក្ដានុពលទីផ្សារនៅតាមរដូវកាលនីមួយៗ តម្រូវការអតិថិជន ស្ថានភាពប្រជាសាស្ត្រ ចំណែកទីផ្សារ គោលដៅទីផ្សារ ព្រមទាំងស្ថានភាពទូទៅផលិតផលរបស់ដៃគូប្រជែងរបស់អ្នកជាដើម។

២) ទិសដៅទីផ្សារ
ជំហានឆ្ពោះទៅរកទិសដៅទីផ្សារ មិនមែនកាប់បំពង់អង្គុយរង់ចាំទឹកភ្លៀងនោះទេ ហើយក៏មិនមែនចេះតែដើរទៅមុខដោយមិនមានកោះត្រើយនោះដែរ។ ការចែកចាយផលិតផល ឬ សេវាកម្មរបស់អ្នកក៏ដូច្នេះដែរ។ អ្នកត្រូវសម្លឹងមើលថា អ្នកណាជាទិសដៅទីផ្សាររបស់អ្នក? បុរស ឬ ស្រ្តី? នៅកន្លែងណា? តើពួកគេចូលចិត្តធ្វើអ្វី? ពួកគេមានលទ្ធភាពស្វែងរកប្រាក់ចំណូលក្នុងកម្រិតណា? តើអ្វីទៅជាចំណោទបញ្ហានៅក្នុងការរស់នៅរបស់ពួកគេ? ការលើកឡើងសំណួរទាំងនេះ ដើម្បីរកឲ្យឃើញថា ផលិតផល ឬ សេវាកម្មរបស់អ្នកមានលក្ខណៈសមស្របទៅស្ថានភាពទូទៅរបស់ពួកគេបាន ដល់កម្រិតណា។ តែសូមកុំភ្លេចរៀបរាប់ប្រាប់អតិថិជនទាំងនោះយ៉ាងលម្អិត និងយ៉ាងប៉ិនប្រសព្វឲ្យអស់ពីសមត្ថភាពពីផលិតផលឬ សេវាកម្មរបស់អ្នក។

៣) ផលិតផល
ចំពោះផលិតផលវិញ អ្នកត្រូវស្វែងរកចម្លើយយ៉ាងពិតប្រាកដ ថាតើផលិតផលរបស់អ្នកមានទំនាក់ទំនងដោយរបៀបណាទៅកាន់ទីផ្សារ ខាងក្រៅ? តើអ្វីទៅជាតម្រូវការទីផ្សាររបស់អ្នក? តើបច្ចុប្បន្ននេះអតិថិជនប្រើប្រាស់អ្វី? សំនួរទាំងនេះ នឹងធ្វើឲ្យអ្នកបានត្រៀមខ្លួនរួចរាល់ជាមុនអាចច្របាច់បញ្ចូល ផលិតផលរបស់អ្នកនៅកាន់ទីផ្សារប្រកបដោយប្រសិទ្ធភាពដោយគ្មានភាព មន្ទិលសង្ស័យ ឬ ភាពស្ទាក់ស្ទើរនៅក្នុងចិត្ត។

៤) ស្ថានភាពប្រកួតប្រជែង
តើធ្វើដូចម្តេចទើបអាចយកឈ្នះគូប្រជែងបាន? នេះជាសមរភូមិប្រយុទ្ធយ៉ាងក្តៅគគុកមួយរវាងអ្នក និងគូប្រជែងរបស់អ្នកនៅលើទីលានអាជីវកម្ម។ សហគ្រិនទូទៅអាចស្វែងរកឃើញចម្លើយបានច្រើនរបៀបចំពោះសំនួរ មួយនេះ ប៉ុន្តែការធ្វើឲ្យផលិតផលឬ សេវាកម្មរបស់អ្នកល្អខុសពីគេ ត្រូវបានគេមើលឃើញជាទូទៅថា ជាចម្លើយមួយដ៏សមស្របបំផុត។ ដូច្នេះ អ្នកត្រូវ សរសេរពីយុទ្ធសាស្ត្រធ្វើឲ្យអាជីវកម្មរបស់ខុសប្លែកពីគេ ដែលគ្មានអ្នកណាដឹងក្រៅពីអ្នក។ នេះហើយបានគេហៅថា ការធ្វើអាជីវកម្ម។

៥) បេសកកម្មទីផ្សារ
តើក្រុមហ៊ុនរបស់អ្នកបានពាំនាំមកនូវអ្វីដែលជាគុណតម្លៃ តែមួយគត់ល្អដាច់គេខុសពីក្រុមហ៊ុនដទៃទៀត? សំនួរនេះជាហេតុផលមួយដើម្បីរំលឹកអ្នកឲ្យពិនិត្យមើលឡើងវិញ ថាតើបេសកកម្មទីផ្សារមានភាពស៊ីចង្វាក់គ្នាទៅនឹងបេសកកម្ម ក្រុមហ៊ុនរបស់អ្នកដែរឬទេ? ជាឧទាហរណ៍ក្រុមហ៊ុនមួយចំនួនបានសម្រេចចិត្តសរសេរបេសកកម្មទីផ្សារ របស់ខ្លួនក្នុងរយៈពេលខ្លី ដើម្បីដោះស្រាយបញ្ហាចំពោះមុនរបស់ក្រុមហ៊ុន។ ក្រោយមកបន្ទាប់ពីបញ្ហានោះត្រូវបានដោះស្រាយ បេសកកម្មនោះចាប់ផ្តើម កែលំអឡើងវិញបន្តិចម្តងៗស្របតាមបេសកកម្មធំរបស់ក្រុមហ៊ុន ដែលនេះក៏ជាដំណោះស្រាយមួយល្អផងដែរ។

មានសំនួរសំខាន់ៗចំនួន៣ ស្ដីពីបេសកកម្មរបស់ទីផ្សាររួមមាន តើអ្នកណាជាអតិថិជនស្នូលរបស់អ្នក? តើអ្នកលក់ផលិតផលឬ សេវាកម្មអ្វី? តើអ្វីទៅជាភាពខុសគ្នារវាងផលិតផល ឬ សេវាកម្មរបស់អ្នកទៅនឹងក្រុមហ៊ុនដទៃ?

៦) យុទ្ធសាស្ត្រទីផ្សារ
ពាក្យថា យុទ្ធសាស្ត្រមួយម៉ាត់ស្តាប់ទៅ វាពិតជាមិនធម្មតាសម្រាប់អ្នក តែវាពិតជាមិនអាចគេចផុតនោះឡើយ ព្រោះថាបើគ្មានយុទ្ធសាស្ត្រទេនោះ ប្រៀបដូចជាទៅប្រយុទ្ធដោយគ្មានអាវុធក្នុងដៃដូច្នេះដែរ។ អញ្ចឹងហើយបានជាយុទ្ធសាស្ត្រទីផ្សារនេះត្រូវមានជាដាច់ខាតសម្រាប់ ដំណើរការអាជីវកម្មឲ្យជោគជ័យ។ តើគេគិតទៅលើអ្វីខ្លះសម្រាប់យុទ្ធសាស្ត្រទីផ្សារនេះ?

យុទ្ធសាស្ត្រទីផ្សាររួមបញ្ចូល ទាំងមូលដ្ឋានគ្រឹះសំខាន់ៗ និង សកម្មភាពនានានៃអាជីវកម្មសម្រាប់អនុវត្តក្នុងរយៈពេលវែង ដែលជាដំណោះស្រាយដោយការវិភាគទៅលើស្ថានភាពយុទ្ធសាស្ត្រដំបូង និងការបង្កើតក្រុមហ៊ុន ការវាយតម្លៃ និង ជម្រើសជាយុទ្ធសាស្ត្រតម្រង់ទិសដៅទីផ្សារដែលសមស្របទៅនឹងគោលដៅ របស់ទីផ្សារ។

៧) កំណត់តម្លៃ ទីតាំង និង ម៉ាករបស់ផលិតផល ឬ សេវាកម្ម
បន្ទាប់ពីបានចុះស្រាវជ្រាវទីផ្សាររួចហើយ នេះជាពេលវេលាមួយដែលអ្នកត្រូវលៃលក ថាតើអ្នកត្រូវលក់ផលិតផល ឬ សេវាកម្មរបស់អ្នកក្នុងតម្លៃប៉ុន្មាន? លក់នៅកន្លែងណា? តើត្រូវធ្វើដូចម្តេចខ្លះដើម្បីឲ្យម៉ាកផលិតផលនោះទទួលបាន ចំណាប់អារម្មណ៍កាន់តែច្រើនឡើងពីសាធារណជន?

៨) កំណត់ហិរញ្ញវត្ថុ
វាប្រាកដណាស់ដែលថា យុទ្ធសាស្ត្រទីផ្សារមួយអាចជោគជ័យបាន ត្រូវតែមានការចំណាយប្រាក់កាសទៅជាមួយផងដែរ ទោះតិចក្តី ច្រើនក្តី។ អ្នកត្រូវវាយតម្លៃថា តើទឹកប្រាក់ចំនួនប៉ុន្មានដែលអ្នកត្រូវចំណាយដើម្បីអនុវត្តលើ គម្រោងទីផ្សាររបស់អ្នក? តើអាចមានវិធីសាស្ត្រផ្សេងក្រៅពីនេះដែរឬទេ ដើម្បីធ្វើឲ្យអាជីវកម្មរបស់អ្នកអាចពង្រីកទីផ្សារដោយមិនចំណាយ ប្រាក់ច្រើន តែមានប្រសិទ្ធភាព?

៩) គោលដៅទីផ្សារ
អ្វីទៅជាគោលដៅទីផ្សារ? ចម្លើយនោះគឺគ្មានអ្វីក្រៅតែពីការទាក់ទាញអតិថិជនមកគាំទ្រផលិតផល ឬ សេវាកម្មរបស់អ្នកនោះទេ។ ដូច្នេះ វាជាចំនួនមួយដែលអ្នកត្រូវកំណត់ និងធ្វើឲ្យបាននៅអំឡុងពេលណាមួយ។ ជាឧទាហរណ៍ អ្នកត្រូវកំណត់ថា តើអ្នកត្រូវការអតិថិជន ឬ ត្រូវលក់ផលិតផល ឬ ត្រូវបង្កើនប្រាក់ចំណូលចំនួនប៉ុន្មានសម្រាប់សបា្តហ៍នេះ ខែនេះ ឆ្នាំនេះ ឬ ឆ្នាំក្រោយ?ការសម្រេចឲ្យបាននូវការបំពេញតម្រូវការដល់អតិថិជន ជាករណីមួយទៀតដែលមិនអាចមើលរំលងបាន ហើយនេះគឺជាគោលដៅទីផ្សាររបស់អ្នក។

១០ ត្រួតពិនិត្យលទ្ធផលរបស់អ្នក
ការធ្វើតេស្ត និងការវិភាគនៅលើទីផ្សារ ជាចំណុចចាប់ផ្តើមនៅក្នុងចំណុចនេះ ដែលត្រូវអនុវត្តក្នុងការស្ទាបស្ទង់លើមតិវាយតម្លៃរបស់អតិថិជន ការលក់ ចំណាប់អារម្មណ៍ ឬ ទិន្នន័យនានា ដើម្បីរកឲ្យឃើញថា តើផលិតផល ឬ សេវាកម្មរបស់អ្នកស្ថិតនៅក្នុងកម្រិតណា?

ការស្រាវជ្រាវនៅលើទីផ្សារ ការប្រកួតប្រជែង និង ការកំណត់ទីតាំងរបស់អ្នកឲ្យបានត្រឹមត្រូវ គឺជាសញ្ញាណមួយបញ្ជាក់ថា អ្នកកំពុងឈរនៅលើទីតាំងអាជីវកម្មដ៏មានប្រសិទ្ធភាពមួយអាចចែកចាយ ផលិតផល ឬ សេវាកម្មរបស់អ្នកបាន។ ការបង្កើតគោលដៅសម្រាប់ចូលសមរភូមិអាជីវកម្ម នេះក៏បញ្ជាក់ផងដែរថា អ្នកអាចយល់កាន់តែច្បាស់ ថាតើអ្នកគួរតែប្រឡូកក្នុងអាជីវកម្មឬក៏អត់៕

Li Ka-Shing រំដោះខ្លួនពីកម្មកររោងចក្រទីទាល់ក្រទៅជាមហាសេដ្ឋីនៅអាស៊ី

មហាសេដ្ឋីនៅអាស៊ីមានបំផុតនៅអាស៊ីលោក Li Ka-Shing celebritynetworth

គ្មានអ្នកណាម្នាក់អាចគិតថា លោក Li Ka-Shing ដែលនៅកុមារភាពធ្លាប់តែរស់នៅក្នុងជីវភាពតោកយ៉ាកកើតចេញពី ត្រកូលគ្រួសារក្រីក្ររកព្រឹកខ្វះល្ងាច រកល្ងាចខ្វះព្រឹកម្នាក់នេះ ក្លាយជាមហាសេដ្ឋីប្រចាំទ្វីបអាស៊ីមានប្រាក់ជាង ៣០ពាន់លានដុល្លារនៅក្នុងដៃឡើយ។

ស្តាប់ទៅវាហាក់បីដូចជាអច្ឆរិយ ពេកសម្រាប់ប្រិយមិត្ត តែវាបានក្លាយជារឿងពិតមិនអាចប្រកែកបានសម្រាប់មហាសេដ្ឋី ល្បីល្បាញមកពីទីក្រុងហុងកុងម្នាក់នេះ ដោយមួយឆាកជីវិតរបស់គាត់ លោក Li Ka-Shing បានខិតខំប្រឹងប្រែងគ្រប់បែបយ៉ាងដើម្បីពង្រីកមុខជំនួញដ៏តូច របស់គាត់ទៅជាក្រុមហ៊ុនយក្សនៅពេលបច្ចុប្បន្ន។

ដោយសារមើលឃើញពីសក្ដានុពលរបស់ គាត់ Thebenews នៅថ្ងៃនេះ សូមបង្ហាញប្រិយមិត្តពីប្រវត្តិត្រួសៗរបស់លោក Li Ka-Shing និងគន្លឹះមួយចំនួនដែលធ្វើឲ្យលោកក្លាយជាមហាសេដ្ឋីនៅអាស៊ី។

ប្រវត្តិរូប និងកុមារភាព
កុមារ Li Ka-Shing បានកើតនៅថ្ងៃទី១៣ ខែមិថុនា ឆ្នាំ១៩២៨ នៅក្នុងខេត្ត Gaungdong ប្រទេសចិន។ គាត់បានរស់នៅក្នុងស្ថានភាពមួយដែលប្រទេសចិនត្រូវញាំញីដោយការ ឈ្លានពានរបស់ប្រទេសជប៉ុន។ នេះ បានបង្ខំចិត្តគ្រួសាររបស់គាត់ភៀសខ្លួនមករស់នៅទីក្រុងហុងកុង អំឡុងពេលដែលគាត់កំពុងរៀននៅបឋមសិក្សា។

ស្ថានភាពគ្រួសារ បង្ខំចិត្តឲ្យ Li Ka-Shing បោះបង់ការសិក្សា
ឪពុករបស់គាត់មានជំងឺរបេងធ្ងន់ធ្ងរហើយបានស្លាប់បន្ទាប់ពី បានផ្លាស់ទីលំនៅមកកាន់ទីក្រុងហុងកុងដែលនេះបានដាក់បន្ទុកបន្ថែម ទៀតដល់គ្រួសារក្រីក្រមួយនេះ។ ដោយសារតែស្ថានភាពគ្រួសារកាន់តែយ៉ាប់យ៉ឺនជាងមុន កុមារ Li Ka-Shing ក៏បានបង្ខំចិត្តបោះបង់ការសិក្សាទាំងស្រុងនៅអាយុ១៥ឆ្នាំ។

កុមារក្រីក្រម្នាក់នេះធ្លាប់បម្រើការងារជាកម្មកររោងចក្រ ប្លាស្ទិកមួយកន្លែងតាំងពីអាយុ១៤ឆ្នាំមកម្ល៉េះ ដើម្បីយកប្រាក់កម្រៃមកចិញ្ចឹមម្តាយរបស់គាត់។ គាត់គ្មានពេលទំនេរគ្រប់គ្រាន់ដូចក្មេងដទៃនោះឡើយ ព្រោះស្ថានភាពក្រីក្រនេះបានបង្ខំឲ្យគាត់ត្រូវធ្វើការ១៦ម៉ោង ក្នុងមួយថ្ងៃ។

ឈប់ធ្វើកម្មករមកបើកអាជីវកម្មខ្លួនឯង
នៅឆ្នាំ១៩៥០ ពោលគឺនៅអាយុ២២ឆ្នាំ យុវជនម្នាក់នេះដែលធ្លាប់ជាកម្មករគេបានសម្រេចចិត្តបើកក្រុមហ៊ុន ផ្ទាល់របស់ខ្លួនលក់សម្ភារក្មេងលេងជាច្រើនមុខ។ ក្រោយមកលោកបានផ្លាស់ប្ដូរគម្រោងអាជីវកម្មមួយនេះមកផលិតផ្កាជ័រ វិញ បន្ទាប់ពីគាត់ឮដំណឹងថា វាកាក់កបនៅក្នុងទីផ្សារប្រទេសអ៊ីតាលី។ អាជីវកម្មថ្មីនេះបានចាប់ផ្តើមបង្រៀនគាត់ឲ្យក្លាយជាសហគ្រិន ម្នាក់មានទំនួលខុសត្រូវខ្ពស់លើកិច្ចការទូទៅប្រចាំថ្ងៃ ដែលក្រោយមកវាបានក្លាយជាក្រុមហ៊ុនផ្គត់ផ្គង់ផ្កាជ័រធំបំផុតនៅ អាស៊ី។

សង្គមប្រែប្រួល Li Ka-shing ឆក់យកឱកាសបង្កើតក្រុមហ៊ុនបន្ថែម
នៅឆ្នាំ១៩៦០ បដិវត្តវប្បធម៌ចិនបានបង្ខំចិត្តឲ្យប្រជាពលរដ្ឋជាច្រើនចាកចេញពី ប្រទេស ដែលនេះធ្វើឲ្យតម្លៃអចលនទ្រព្យធ្លាក់ចុះ។ លោក Li Ka-shing យល់ថា តម្លៃអចលនទ្រព្យនឹងហក់ឡើងវិញ ដូច្នេះហើយឆ្លៀតក្នុងឱកាសនេះគាត់ក៏បានចាប់ផ្តើមទិញដីទុកជា បន្តបន្ទាប់។ ១១ ឆ្នាំក្រោយមក គឺនៅក្នុងឆ្នាំ១៩៧១ លោកសម្រេចចិត្តបើកក្រុមហ៊ុនថ្មីមួយឲ្យឈ្មោះថា Cheung Kong ដែលជាក្រុមហ៊ុនវិនិយោគអចលនទ្រព្យធំបំផុតមួយនៅលើពិភពលោកនាពេល បច្ចុប្បន្ន។

អំឡុងពេលនេះដែរលោកបាន ចាប់ផ្តើមទិញអាគារ សំណង់ផ្សេងៗ រោងចក្រ ជាច្រើនកន្លែងនៅក្នុងទីក្រុងហុងកុងដែលបានផ្តល់ចំណូលយ៉ាងច្រើន សន្ធឹកសន្ធាប់ ត្បិតអីសំណង់អគារទាំងនោះចុះថោកដោយសារបដិវត្តម៉ៅសេទុងបង្កឲ្យ ស្ថានភាពនយោបាយវឹកវរលើផ្ទៃប្រទេស។ តែការសម្រេចចិត្តដ៏ត្រឹមត្រូវរបស់មហាសេដ្ឋីរូបនេះ បានធ្វើឲ្យគាត់ក្លាយជាឈ្នះក្នុងល្បែងអុកលើទីផ្សារ អចលនទ្រព្យនេះ បន្ទាប់ពីស្ថានភាពនយោបាយវិលមករកស្ថានភាពដើមវិញ។

មហិច្ឆតាកាន់តែខ្ពស់ ឆក់ចាប់យកក្រុមហ៊ុនថ្មីកាន់តែធំជាងមុន
នៅឆ្នាំ១៩៧៩ នៅពេលដែលគាត់ឈានដល់វ័យ៥១ឆ្នាំ លោក Li Ka-shing បានក្លាយជាជនជាតិចិនដំបូងដែលបានគ្រប់គ្រងភាគហ៊ុនក្រុមហ៊ុន ពាណិជ្ជកម្មអង់គ្លេស Hutchison Whampoa។ មហិច្ឆតារបស់គាត់មិនចប់ត្រឹមណឹងនោះទេ ពោលគឺគាត់បានចែចូវទិញភាគហ៊ុនក្រុមហ៊ុនធនាគារហុងកុង (Hongkong & Shanghai Bank -HSBC) ចំនួន២០% បន្ថែមទៀត ខណៈក្រុមហ៊ុន Hutchison Whampoa ទទួលខុសត្រូវទាំងស្រុងលើពាណិជ្ជកម្មកំពង់ផែក្នុងទីក្រុងហុងកុង។

ភាពជោគជ័យក្នុងមុខជំនួញរបស់ គាត់រយៈពេល១ទសវត្សក្រោយមកធ្វើឲ្យមហាសេដ្ឋី Li Ka-shing ចាប់ផ្តើមពង្រីកកេរ្តិ៍ឈ្មោះក្រុមហ៊ុន Hutchison Whampoa ទៅកាន់ទីផ្សារជំនួញជុំវិញពិភពលោកក្លាយជាក្រុមហ៊ុនមានតម្លៃខ្ពស់ បំផុតទទួលបានប្រាក់ចំណូល ៥០ ពាន់លានដុល្លារក្នុងមួយឆ្នាំ។

នៅឆ្នាំ១៩៨៧ លោកបានចំណាយប្រាក់ ៥០០លានដុល្លារទិញក្រុមហ៊ុនប្រេង Husky Energy របស់កាណាដាដែលកំពុងត្រដរខ្យល់ឈានទៅរកការក្ស័យធន ខណៈតម្លៃប្រេងចុះថោកហួសពីការស្មាន។ វាពិតជាស្ថានភាពមួយដ៏លំបាកបំផុតសម្រាប់លោកក្នុងការត្រួសត្រាយ ផ្លូវឲ្យក្រុមហ៊ុននេះងើបឡើងវិញ ដែលតម្លៃប្រេងនៅពេលនោះគឺមួយបារ៉ែលគឺមានតម្លៃត្រឹមតែ១០ដុល្លារ ប៉ុណ្ណោះ។

ប៉ុន្តែពីមួយឆ្នាំទៅមួយ ឆ្នាំក្រុមហ៊ុនខាងលើនេះបានសាងមុខមាត់ឡើងវិញ បន្ទាប់ពីតម្លៃប្រេងហក់ឡើងជាបន្តបន្ទាប់ពី១០ដុល្លារ ទៅ ជាង១០០ដុល្លារនៅរយៈពេលប៉ុន្មានឆ្នាំចុងក្រោយនេះដែលទទួលបាន ប្រាក់ចំណូល២៥ពាន់ដុល្លារក្នុងមួយឆ្នាំ ហើយក្នុងនោះគាត់មានភាគហ៊ុនចំនួន៨ពាន់លានដុល្លារនៅ ក្នុងក្រុមហ៊ុននេះ។

វិនិយោគលើក្រុមហ៊ុនប្រេងមិនអស់ចិត្ត បោះទុនវិនិយោគលើក្រុមហ៊ុនបច្ចេកវិទ្យាវិញម្តង
គេនៅចាំបានថា មហាសេដ្ឋីអាស៊ីម្នាក់នេះបានប្រើពេលតែ៥នាទីប៉ុណ្ណោះដើម្បី សម្រេចចិត្តបោះទុន១២០លានដុល្លារជាមួយក្រុមហ៊ុនបណ្តេញសង្គមដ៏មាន ប្រជាប្រិយភាព Facebook កាលពីឆ្នាំ២០០៧ ដែលមានភាគហ៊ុន៩០០លានដុល្លារ។

មុននេះបន្តិចពោលគឺនៅឆ្នាំ២០០៥ លោក Li បានជួយស្រោចស្រង់ក្រុមហ៊ុនបច្ចេកវិទ្យា Skype និង eBAY កាលពីឆ្នាំ២០០៦ ក្នុងទឹកប្រាក់២,៥ ពាន់លានដុល្លារ។ នៅមានក្រុមហ៊ុនជាច្រើនទៀតដែលមហាសេដ្ឋីរូបនេះចំណាយប្រាក់ បោះទុនវិនិយោគដែលក្នុងនោះមានដូចជា អតីតក្រុមហ៊ុនបច្ចេកវិទ្យា Siri ដែលទិញដោយApple កាលពីឆ្នាំ២០១០ ក្រុមហ៊ុនឌីជីថល Spotify ក្រុមហ៊ុន GPS របស់អ៊ីស្រាអែលហៅថា Waze និង ក្រុមហ៊ុនបច្ចេកវិទ្យា Hzo។

នៅឆ្នាំ២០១០ ក្រុមហ៊ុន Cheung Kong របស់លោក Li បានទិញក្រុមហ៊ុនបណ្ដាញថាមពលអគ្គិសនីរបស់អង់គ្លេស (U.K. Power Networks) ក្នុងទឹកប្រាក់ ៩,១ ពាន់លានដុល្លារដែលបានផ្គត់ផ្គង់ប្រជាពលរដ្ឋប្រទេសអឺរ៉ុបមួយ នេះចំនួន ៨លាននាក់។

នៅឆ្នាំ២០១១ មហាសេដ្ឋីរូបនេះមិនអស់ចិត្ត ក៏សម្រេចចិត្តទិញក្រុមហ៊ុនផ្គត់ផ្គង់ និងចែកចាយទឹកស្អាត (Northumbrian Water) មួយទៀតក្នុងប្រទេសអង់គ្លេសដដែលដល់ប្រជាពលរដ្ឋរបស់ខ្លួនជាង៧ លាននាក់។

បង្កើតមូលនិធិសម្រាប់កម្មវិធីមនុស្សធម៌ជួយសង្គ្រោះប្រជាជនលើសាកលលោក
ទឹកប្រាក់រាប់ពាន់លានដុល្លារបានមកពីមុខជំនួញរបស់គាត់មិន បានធ្វើឲ្យមហាសេដ្ឋីរូបនេះឈរនៅស្ងៀមបានឡើយ។ លោកបានបង្កើតមូលនិធិ Li Ka-Shing Foundation ដែលមានទឹកប្រាក់ ១,៦ពាន់លានដុល្លារសម្រាប់សកម្មភាពមនុស្សធម៌ដែលផ្ដោតសំខាន់លើ ការអប់រំ។ ក្នុងនោះលោកបានចំណាយប្រាក់ ៦៩០ លានដុល្លារបង្កើតសាកលវិទ្យាល័យ Shantou នៅស្រុកកំណើតរបស់គាត់ក្នុងខេត្ត Guangdong និង ចំណាយប្រាក់៤០លានដុល្លារបន្ថែមទៀតសម្រាប់កម្មវិធីស្រាវជ្រាវនៅ សាកលវិទ្យាល័យ Berkeley រដ្ឋ California សហរដ្ឋអាមេរិក។

ព័ត៌មានផ្ទាល់ខ្លួន
គិតមកដល់ឆ្នាំ២០១៤នេះ ទោះបីជាលោក Li មានអាយុ៨៦ឆ្នាំហើយ ប៉ុន្តែលោកជាមនុស្សម្នាក់មានសុខភាពល្អ។ ជារៀងរាល់ថ្ងៃលោក តែងក្រោកពីដំណេកនៅម៉ោង ៥ភ្លឺ ដើម្បីលេងកីឡាដែលគាត់ចូលចិត្តបំផុតគឺវាយកូនគោល យ៉ាងហោចណាស់ ៩០នាទីក្នុងមួយថ្ងៃ។ ទន្ទឹមនឹងនេះលោក ជាមនុស្សម្នាក់ដែលចូលចិត្តអានកាសែតបំផុត ដែលមិនរំលងទំព័រណាមួយនោះឡើយចាប់ពីទំព័រមុខរហូតដល់ទំព័រក្រោយ។

មហាសេដ្ឋីពោះម៉ាយម្នាក់នេះមាន កូនប្រុសចំនួនពីរនាក់ប៉ុណ្ណោះ ខណៈដែលប្រពន្ធរបស់គាត់វិញបានស្លាប់ចោលគាត់តាំងពីឆ្នាំ១៩៩០ ដោយសារជំងឺគាំងបេះដូង។ ថ្វីត្បិតគាត់ជាអ្នកមាន មានឈ្មោះល្បីជុំវិញពិភពលោក លោកកម្រជួបសម្ភាសជាមួយអ្នកកាសែតណាស់។ ទោះបីជាយ៉ាងណាក្តី ទឹកប្រាក់ ៣១,៩ពាន់លានដុល្លារនៅក្នុងដៃរបស់លោកនាពេលនេះ អាចល្មមគ្រប់គ្រាន់សម្រាប់រូបគាត់ក្លាយជាអ្នកជំនួញមាន ឥទ្ធិពលមួយរូបរបស់អាស៊ីរួចទៅហើយ៕

ប្រវត្តិមហាសេដ្ឋីម្ចាស់គេហទំព័រ Bloomberg អានហើយកាន់តែធ្វើឲ្យមានពន្លឺក្នុងអាជីវកម្ម!

មហាសេដ្ឋីអាមេរិកលោក Michael Bloomberg Loonwatch

តើមានប្រិយមិត្តណាខ្លះស្គាល់ឈ្មោះគេហទំព័រដ៏ ល្បីរបស់អាមេរិក Bloomberg.com? TheBNEWS ជឿជាក់ថា មានប្រិយមិត្តមិនតិចឡើយដែលចូលចិត្តតាមដានព្រឹត្តិការណ៍ពិភពលោក ជាពិសេសមុខជំនួញ និងសេដ្ឋកិច្ច បានស្គាល់គេហទំព័រខាងលើនេះ។

ទោះបីជាបែបនេះក្តី អ្វីដែលប្រិយមិត្ត ជាពិសេសសហគ្រិននឹងបានដឹងនៅថ្ងៃនេះនោះគឺ អ្នកណាជាស្ថាបនិក និងជានិពន្ធនាយកគេហទំព័រដ៏ល្បីល្បាញមួយនេះ? តើបុគ្គលម្នាក់នេះមានអ្វីជាពិសេសសម្រាប់ឲ្យសហគ្រិនទាំងអស់ រៀនសូត្រតាម?

ដើម្បីបកស្រាយនូវចម្ងល់ខាងលើ TheBNEWS សូមលើកយកពីប្រវត្តិបុគ្គលម្នាក់នេះដែលនោះគឺលោក Michael Bloomberg ជាមហាសេដ្ឋីអាមេរិក និងជាស្ថាបនិកដ៏ល្បីនៃគេហទំព័រសេដ្ឋកិច្ចដ៏ធំក្នុងលោកមួយ នេះមកចែកជួនប្រិយមិត្តដូចតទៅ៖

ប្រវត្តិរូបសង្ខេប និង ការងារ
លោក Michael Bloomberg បានកើតនៅថ្ងៃទី១៤ ខែកុម្ភៈ ឆ្នាំ១៩៤២ នាទីក្រុង Boston រដ្ឋ Massachusetts។ លោកកើតក្នុងត្រកូលក្នុងគ្រួសារធូរធារមួយ ដែលមានឪពុកជាបណ្ណារក្ស (អ្នកថែរក្សា ទុកដាក់សៀវភៅនៅសាកលវិទ្យាល័យ។ លោក Bloomberg គឺជាអតីតនិស្សិតសាកលវិទ្យាល័យ Hopkins និង Harvard ជាកន្លែងដែលលោកសិក្សាថ្នាក់បរិញ្ញាប័ត្រជាន់ខ្ពស់ផ្នែក គ្រប់គ្រងពាណិជ្ជកម្ម ( Business Administration) ក្នុងឆ្នាំ១៩៦៦។

ការងារដំបូងដែលលោកទទួលបាន នៅ Wall Street គឺជាបុគ្គលិកធនាគារ Salomon Brothers ក្នុងឆ្នាំ១៩៧២ ។ នៅទីនេះហើយ ដែលលោកបានហក់ឡើងដំណែងយ៉ាងរហ័សរហូតបានក្លាយជាដៃគូជំនួញមាន មុខតំណែងជាអ្នកទទួលខុសត្រូវផ្នែកលក់ក្នុងធនាគារនេះក្នុងឆ្នាំ ១៩៧២។

នៅឆ្នាំ ១៩៧៩ ប្រធានធនាគារ Salomon Brothers លោក John Gutfreund បានស្នើសុំឲ្យលោក Bloomberg ចុះចេញពីតំណែងរបស់លោកមកទទួលបន្ទុកផ្នែកគ្រប់គ្រងវិស្វកម្ម ប្រព័ន្ធកុំព្យូទ័ររបស់ក្រុមហ៊ុនវិញ។ ប៉ុន្តែគាត់បានបដិសេធន៍។

ទោះបីជានេះក្តី ២ឆ្នាំក្រោយមក ពោលគឺនៅថ្ងៃទី៣១ខែ កក្កដាឆ្នាំ១៩៨១ ប្រធានធនាគារខាងលើបានប្រកាសទំលាយក្រុមហ៊ុនពីក្រុមហ៊ុនឯកជនទៅ ជាក្រុមហ៊ុនសាធារណទិញលក់ទំនិញ ដែលមានឈ្មោះថា Phibro Corporation។

នេះបានធ្វើឲ្យBloomberg មិនពេញចិត្ត និងត្រូវបានបណ្តេញចេញពីក្រុមហ៊ុននេះជាមួយទឹកប្រាក់១០លាន ដុល្លារជាថ្នូរនឹងការចាកចេញរបស់លោក។

បង្កើតក្រុមហ៊ុន Bloomberg L.P.
នៅក្នុងឆ្នាំ១៩៨១ លោក Bloomberg បានសម្រេចចិត្តបង្កើតក្រុមហ៊ុនផ្ទាល់ខ្លួនមួយសម្រាប់ការ ផ្តល់ព័ត៌មានហិរញ្ញវត្ថុតាមប្រព័ន្ធកុំព្យូទ័រ (Financial Information Computer។ គាត់បានដាក់ចិត្តដាក់កាយជាមួយក្រុមហ៊ុនរបស់លោក ជាមួយដើមទុន៤លានដុល្លារប៉ុណ្ណោះ សម្រាប់បើកអាជីវកម្មតំបូងនេះ ក្នុងការអភិវឌ្ឍប្រព័ន្ធកុំព្យូទ័រដែលអាចផ្តល់ព័ត៌មានដល់ អតិថិជនពីទីផ្សារសញ្ញាប័ណ្ណ(Bond Markets)។

ពីមួយថ្ងៃទៅមួយថ្ងៃ ទីតាំងក្រុមហ៊ុនស្ថិតនៅក្នុងបន្ទប់អាគារជួលតូចមួយបានរីក ធំធាត់ជាបន្តបន្ទាប់ ហើយមួយឆ្នាំក្រោយមក ពោលគឺនៅក្នុងឆ្នាំ១៩៨២ ធនាគារ Merrill Lynch របស់អាមេរិកបានទិញភាគហ៊ុនមួយចំនួននៅក្រុមហ៊ុនលោក Bloomberg និងវិនិយោគទឹកប្រាក់បន្ថែមចំនួន ៣០លានដុល្លារ។

ក្រុមហ៊ុនរបស់លោកបានបោះជំហានទៅ មុខយ៉ាងឆាប់រហ័ស ហើយនៅក្នុងឆ្នាំ ១៩៨៦ ក្រុមហ៊ុនរបស់លោកបានប្តូរឈ្មោះទៅជាក្រុមហ៊ុន Bloomberg L.P. ដែលមានការិយាល័យចំនួន១០០ទីតាំងនៅជុំវិញពិភពលោកដែលមានគេហទំព័រ សារព័ត៌មានល្បីល្បាញ Bloomberg.com ស្រាប់ សម្រាប់ផ្តល់ព័ត៌មានទូទៅដែលផ្តោតសំខាន់លើផ្នែកហិរញ្ញវត្ថុ និង សេដ្ឋកិច្ច ទន្ទឹមនឹងមានបុគ្គលិកបម្រើការងារចំនួន ១៥.០០០នាក់។

ជាប់ជាអភិបាលក្រុងញីវយ៉ក (New York) ចំនួន ៣ អាណត្តិ
ភាពជាអ្នកជំនួញ មិនបានធ្វើឲ្យលោក Bloomberg ស្កប់ស្កល់នោះឡើយ ពោលគឺនៅក្នុងឆ្នាំ២០០២ លោកបានប្រឡូកចូលក្នុងឆាកនយោបាយអាមេរិក រហូតបានជាប់ឈ្មោះជាអភិបាលក្រុង New York មកពីគណបក្សសាធារណរដ្ឋ។

គោលនយោបាយយ៉ាងមានប្រសិទ្ធភាព របស់លោក Bloomberg សម្រាប់ការអភិវឌ្ឍ សុវត្ថិភាព និង សន្តិសុខនៅក្នុងទីក្រុងធំបំផុតរបស់ខ្លួនមួយនេះ បានធ្វើឲ្យមហាសេដ្ឋីរូបនេះបានជាប់ឆ្នោតជាថ្មីនៅក្នុង អាណត្តិទី២ក្នុងឆ្នាំ២០០៥ ។ មកដល់ឆ្នាំ២០០៨ ខណៈដែលអាមេរិកកំពុងជួបវិបត្តិហិរញ្ញវត្ថុដ៏ធ្ងន់ធ្ងរ លោកនៅតែរក្សាតំណែងរបស់លោកដដែល រហូតដល់ជាប់ឆ្នោតសាជាថ្មីក្នុងអាណត្តិទី៣មុនពេលលោកបញ្ចប់ អាណត្តិរបស់លោកកាលពីឆ្នាំ២០១៣កន្លងទៅថ្មីៗនេះ។

ក្នុងវ័យ ៧២ឆ្នាំ និងមានប្រាក់ ៣៤ ពាន់លានដុល្លារក្នុងដៃនៅពេលបច្ចុប្បន្ន លោក Bloomberg បានចូលរួមក្នុងកម្មវិធីនានាដូចជាបានធ្វើបទសម្ភាសន៍ឲ្យ ទស្សនាវដ្ដី Forbes ដ៏ល្បីរបស់អាមេរិកជុំវិញមុខជំនួញយ៉ាងជោគជ័យរបស់លោក។

តាមបទពិសោធន៍ជាអតីតចៅហ្វាយក្រុង កាន់តំណែង៣អាណត្តិ និង ជាសហគ្រិន អាចអភិវឌ្ឍក្រុមហ៊ុនរបស់លោកចេញពីក្រុមហ៊ុនតូចតាចទៅជា ស្ថាប័នក្រុមហ៊ុនធំមួយនៅពេលបច្ចុប្បន្ន លោកបានលើកគោលការណ៍ចំនួន៥ ជួយលើកទឹកចិត្តសហគ្រិនទូទៅឲ្យទទួលបានជោគជ័យដែលនោះគឺ៖

១) ប្រឈមមុខនឹងបញ្ហា
កាលពីលោកមានអាយុ ៣៩ឆ្នាំ លោក Bloomberg ត្រូវបណ្តេញចេញពីការងារដែលលោកស្រលាញ់បំផុត។ វាពិតជាអយុត្តធម៌ណាស់សម្រាប់លោកនៅពេលនោះ តែដូចជាអរគុណម្យ៉ាងដែរដល់ក្រុមហ៊ុននោះ ត្បិតអីការបណ្តេញចេញនេះ បានបើកឱកាសឲ្យលោកឈប់ធ្វើជាបុគ្គលិកធ្វើការឲ្យគេ មកបើកក្រុមហ៊ុនផ្ទាល់ខ្លួនវិញក្នុងឆ្នាំ១៩៨២។ នោះគឺ Bloomberg L.P. ជាក្រុមហ៊ុនល្បីល្បាញនៅលើពិភពលោកមកដល់សព្វថ្ងៃនេះ។

លោកបានលើកឡើងថា លោកមិនបណ្តោយឲ្យដានអាក្រក់អតីតកាលរបស់លោកមកបំផ្លាញភាពបរាជ័យ របស់លោកនៅបច្ចុប្បន្នភាពបានឡើយ។ លោកត្រូវតែប្រឈមឧបសគ្គនេះ នឹងងើបបន្តបោះជំហានដោយខ្លួនឯងយ៉ាងស្វាហាប់ទាំងមុខជំនួញ និង ឆានយោបាយប្រចាំក្រុងញីវយ៉ក។ លោកបានបន្ថែមថា បើអ្នកចង់ជោគជ័យ លុះត្រាតែទទួលយកភាពបរាជ័យរបស់អ្នកដោយរីករាយ ហើយត្រូវលើកទឹកចិត្តខ្លួនឯង មិនចុះចាញ់ភាពបរាជ័យនោះ។

២) បង្កើតសំណាងខ្លួនឯងឲ្យកាន់តែច្រើន
«ភ័ព្វសំណាង គឺឱកាសមួយយ៉ាងសំខាន់នៃភាពជោគជ័យ។ អ្នកដែលខិតខំព្យាយាម នឹងមានសំណាងកាន់តែច្រើន»។ នេះជាសម្ដីរបស់លោក Bloomberg។

លោក Bloomberg និយាយថា សំណាងអាចកើតមានច្រើនបំផុតសម្រាប់អ្នកណាដែលចេះតស៊ូព្យាយាម តែប៉ុណ្ណោះ។ ដើម្បីទទួលបានសំណាងទាំងនោះ អ្នកត្រូវតែធ្វើជាបុគ្គលសកម្មបំផុតក្នុងការងារប្រចាំថ្ងៃ ពោលគឺត្រូវក្រោកមកធ្វើការពីព្រលឹម និង ចេញទៅវិញនៅពេលយប់។ ការខិតខំរបស់អ្នកនឹងបង្កើតឱកាសកាន់តែច្រើនដែលអ្នកដទៃមិនអាចមាន ដូចអ្នក។

៣) បង្កើតទំនាក់ទំនងជានិច្ច
នៅពេលដែលលោកចាប់ផ្តើមដំណើរការក្រុមហ៊ុនជាលើកដំបូង លោកបានស្ទុះស្ទាខ្លាំងក្នុងការបង្កើតទំនាក់ទំនងយ៉ាងជិតស្និទ្ធ ជាមួយសាធារណជន ដើម្បីស្វែងយល់ពីចំណាប់អារម្មណ៍របស់ពួកគេលើផលិតផលរបស់លោក។ ការណែនាំខ្លួន ប្រៀបដូចជាការលក់ទំនិញ បន្តិចប្តងៗបានរុញច្រានឲ្យក្រុមហ៊ុនរបស់លោកចាប់ផ្តើមមាន ចំណាប់អារម្មណ៍ពីសាធារណជនកាន់តែច្រើនឡើង។ ៣ឆ្នាំក្រោយមក បុគ្គលម្នាក់ដែលគេមិនសូវស្គាល់រូបនេះបានចាប់ផ្តើមមានឈ្មោះ បោះសម្លេង រហូតមានដៃគូមកវិនិយោគជាមួយលោកជាបន្តបន្ទាប់។

៤) បន្តការសិក្សារៀនសូត្រជាប្រចាំ
លោក Bloomberg និយាយថា ពិភពលោកសម្បូរទៅដោយមនុស្សដែលចូលចិត្តបញ្ចប់ព្រំដែនសមត្ថភាព ខួរក្បាលរបស់ខ្លួនណាស់។ មនុស្សប្រភេទនេះ នឹងផ្តល់ចម្លើយ១លានហេតុផលពីអ្វីដែលពួកគេមិនអាច និង មិនគួរធ្វើ តែគ្មានដំណោះស្រាយល្អណាមួយគួរឲ្យកោតសរសើរសម្រាប់ខ្លួនឯង ទាល់តែសោះ។

សម្រាប់ខ្លួនលោកផ្ទាល់ លោកបានចាត់ទុកការសិក្សារៀនសូត្រប្រៀបបានដូចជាខ្សែទឹក ហូរមិនចេះហត់ ដែលលោកត្រូវយកមកអនុវត្តជាប្រចាំលើមុខជំនួញរបស់លោក។ ការសិក្សារៀនសូត្រជាប្រចាំ នឹងជួយបំពេញភាពចន្លោះខ្វះខាត និងបង្កើនសក្ដានុពលខួរក្បាលរបស់លោកឲ្យកាន់តែរីកចម្រើនទៅមុខ។

៥) ការចែករំលែក
មនុស្សត្រូវទទួលខុសត្រូវលើភាពជោគជ័យ និងភាពបរាជ័យរបស់ខ្លួន តែលោក Bloomberg យល់ថា ភាពជោគជ័យអាចកើតមានឡើងកាន់តែច្រើនឡើងនៅពេលដែលអ្នកចេះចែក រំលែកទៅមនុស្សផ្សេងទៀត។ លោកបានបន្ថែមថា ការចែករំលែកនេះមិនចាំបាច់តម្រូវឲ្យអ្នកមានលុយកាក់ច្រើននោះឡើយ។ ប៉ុន្តែ វាជាការចែករំលែកចំណេះដឹង បង្កើនភាពស្និទ្ធស្នាលជាមួយអ្នកដទៃ នោះគឺគ្រប់គ្រាន់អាចធ្វើឲ្យអ្នកមានសមាជិកកាន់តែរឹងមាំ បាន៕

ចង់គ្រប់គ្រងហិរញ្ញវត្ថុក្នុងអាជីវកម្មមានប្រសិទ្ធភាពគន្លឹះ ៥យ៉ាងនេះអាចជួយអ្នកបាន

គន្លឹះគ្រប់គ្រងហិរញ្ញវត្ថុក្នុងអាជីវកម្មឲ្យមានប្រសិទ្ធភាព indianmanpower

អ្នកមានផែនការអាជីវកម្មល្អ មានដើមទុនគ្រប់គ្រាន់ មានធនធានមនុស្សជំនាញៗ ប៉ុន្តែបើដំណើរការអាជីវកម្មហើយ គ្មានប្រសិទ្ធភាពគ្រប់គ្រងប្រាក់ចំណូលចំណាយរបស់អ្នក វាមិនខុសអីពីស្រីកញ្ជើធ្លុះនោះឡើយ។ ទោះបីជារកប្រាក់ចំណូលបានច្រើនប៉ុណ្ណាក៏ដោយ ក៏មិនអាចសល់ដែរ ហើយទីបំផុតអាចនឹងខាតបង់ ឬ ជំពាក់បំណុលគេជាក់ជាមិនខាន។

នេះជាអ្វីដែលសហគ្រិនត្រូវ ដឹងថា ប្រសិទ្ធភាពនៃការ គ្រប់គ្រងហិរញ្ញវត្ថុឲ្យបានត្រឹមត្រូវ គឺជាមូលដ្ឋានគ្រឹះដ៏សំខាន់មិនអាចខ្វះបានសម្រាប់ដំគ្រប់គ្រង អាជីវកម្មឲ្យរីកលូតលាស់ទៅមុខបាន។ ធ្វើយ៉ាងម៉េចដើម្បីគ្រប់គ្រងហិរញ្ញវត្ថុមានប្រសិទ្ធភាព? ខាងក្រោមនេះជាចម្លើយដ៏សមស្របសម្រាប់ជួយផ្តល់ពន្លឺលោកអ្នក ដោះស្រាយចម្ងល់នេះ៖

១) រៀបចំរបាយការណ៍ចំណូលចំណាយ
អ្នកត្រូវធានាថា រាល់ឯកសារ របាយការណ៍ចំណូលចំណាយ តារាងតុល្យការ ត្រូវធ្វើឡើងរួចរាល់មុនការបរិច្ឆេទ និង តាមលំដាប់លំដោយ។ ប្រសិនបើរបាយការណ៍ហិរញ្ញវត្ថុរបស់អ្នក ត្រូវបានតាមដានដិតដល់ វានឹងបង្កភាពងាយស្រួលក្នុងការចាត់ចែងហិរញ្ញវត្ថុរបស់អ្នក។ តែបើមិនដូច្នេះទេ មានន័យថា អ្នកត្រូវមានកិច្ចការជាច្រើនទៀតពាក់ព័ន្ធទៅនឹងកិច្ចការ ហិរញ្ញវត្ថុនេះ។ សូមប្រញាប់រួសរាន់បំពេញភារកិច្ចនេះឲ្យបានមុនពេលកំណត់កាន់តែ ល្អ ដើម្បីជៀសវាងការផាកពិន័យផ្សេងៗលើភាពយឺតយ៉ាវរបស់អ្នកលើការ បង់ពន្ធពីមន្ត្រីពន្ធដារ។

២) ត្រួតពិនិត្យប្រាក់ចំណាយចំណូលប្រចាំឆ្នាំឡើងវិញ
ការត្រួតពិនិត្យប្រាក់ចំណាយចំណូលប្រចាំឆ្នាំឡើងវិញ នឹងធ្វើឲ្យអ្នកមានម្ចាស់ការលើការគ្រប់គ្រងហិរញ្ញវត្ថុកាន់តែ ប្រសើរឡើង។ អ្នកត្រូវស្វែងយល់ថា តើប្រាក់របស់អ្នកបានចំណាយធំច្រើនជាងគេបំផុតទៅលើអ្វី? តើប្រភពចំណូលធំបំផុតរបស់អ្នកបានមកពីអ្វី? ការត្រួតពិនិត្យលើចំណុចទាំងនេះ នឹងធ្វើឲ្យអ្នកអាចត្រៀមខ្លួនរួចរាល់ក្នុងការ ស្វែងរកប្រភព ឬ ការចាត់ចែងប្រាក់ចំណូលសម្រាប់ឆ្នាំបន្ទាប់ឲ្យមានប្រសិទ្ធភាពជាង មុន។

៣) កំណត់ប្រាក់ចំណូល និង ចំណាយ
តើទឹកប្រាក់ប៉ុន្មានដែលអ្នកត្រូវការដើម្បីចំណាយនៅក្នុងឆ្នាំ នេះ? តើអ្វីទៅជាគម្រោងរបស់អ្នកធ្វើឲ្យអាជីវកម្មនោះសម្រេចបានដល់ គោលដៅ? ក្នុងករណីដែលអ្នកមិនអាចសម្រេចគោលដៅនេះបាន នេះជាសញ្ញាណមួយបញ្ជាក់ថា អ្នកត្រូវតែបង្កើន ឬ កាត់បន្ថយការចំណាយ ដើម្បីធានាថា អាជីវកម្មរបស់អ្នកនឹងទទួលបានផ្លែផ្កាមកវិញ។

ខាងក្រោមនេះជាដំណោះស្រាយអាចស្រោចស្រង់ការចំណាយក្នុងអាជីវកម្មរបស់អ្នកឡើងវិញ

ការបណ្តុះបណ្តាលៈ ដរាបណាអ្នកមិនអាចមានលទ្ធភាព សម្រាប់ការចំណាយរបស់អ្នក អ្នកគួរតែចំណាយថវិកាមួយចំនួនមកបណ្តុះបណ្តាលបុគ្គលិក ឬ កម្មកររបស់អ្នកឡើងវិញ។ វាចំណុចល្អដែលអ្នកត្រូវធ្វើឲ្យដើរទន្ទឹមគ្នាពីអ្វីដែលកំពុង កើតមាននៅក្នុងទីផ្សារ និង យុទ្ធសាស្ត្រល្អៗមកអនុវត្ត ដើម្បីទាញប្រយោជន៍មកវិញឲ្យអាជីវកម្មរបស់អ្នក។

យុទ្ធសាស្រ្តទីផ្សារៈ ប្រសិនបើថវិកាចំណាយលើការពង្រីកទីផ្សារមានទំហំធំ អ្នកអាចសាកល្បងចំណាយថវិកាណាផ្សេងក្រៅពីនេះ ដើម្បីយកទៅស្រាវជ្រាវលើទីផ្សារវិញ ថាតើអ្វីទៅជាតម្រូវការ និង មធ្យោបាយធ្វើអតិថិជនមានចំណាប់អារម្មណ៍ពិតប្រាកដ? នេះនឹងធ្វើឲ្យអ្នកអាចកំណត់បានថា តើគួរតែផ្សព្វផ្សាយអាជីវកម្មរបៀបណា(ខិត្តប័ណ្ណ ឬ បណ្តេញសង្គម) ទើបទទួលបានការគាំទ្រច្រើនពីអតិថិជន។

ត្រួតពិនិត្យលើប្រព័ន្ធគ្រប់គ្រងទិន្នន័យៈ ថ្វីបើ ប្រព័ន្ធបច្ចេកវិទ្យាទំនើបៗអាចនឹងធ្វើឲ្យអ្នកចំណាយប្រាក់ច្រើន ពិតមែន ប៉ុន្តែស្របពេលដែលវាកំពុងពេញនិយមប្រើប្រាស់ដល់ការគ្រប់គ្រង ចំណាយ និងចំណូល វាក៏មានប្រសិទ្ធភាពជួយគ្រប់គ្រង និង ផ្តល់ទិន្នន័យហិរញ្ញវត្ថុរបស់អ្នកយ៉ាងសុក្រឹតបំផុតផងដែរ។ ទោះជាយ៉ាងណាក៏ដោយ អ្នកត្រូវដើរឲ្យទាន់បច្ចេកវិទ្យាមួយនេះស្របតាមបច្ចុប្បន្នភាព របស់ពិភពលោក។

៤) ដាក់បំណុលជារឿងអាទិភាព
គោលដៅនៃការធ្វើអាជីវកម្មរបស់អ្នកគឺ ការទទួលបានប្រាក់ចំណេញមកវិញ។ តែបើអ្នកនៅមានបំណុលនៅក្នុងដៃ អ្នកត្រូវប្រើប្រាស់ប្រាក់ចំណូលរបស់អ្នកជាអាទិភាពលើបំណុលនោះ ។ ដូច្នេះ សូមចាប់ផ្តើមរៀបចំគម្រោងហិរញ្ញវត្ថុភ្លាមៗ ពីលទ្ធភាពប្រាក់ចំណាយសម្រាប់ការទូទាត់បំណុលខ្ទង់ខែនីមួយៗ។ ប្រសិនបើអាជីវកម្មរបស់អ្នកអាចរកប្រាក់ចំណូលបានច្រើនជាងមុន ការចំណាយលើបំណុលរបស់អ្នកត្រូវតែធ្វើឡើងឲ្យបានច្រើនបំផុត ត្បិតអីវាអាចជួយឲ្យអ្នកអាចងើបចេញពីបំណុលបានឆាប់រហ័ស។

៥) ពិនិត្យលើប្រសិទ្ធភាពនៃការស្វែងរកប្រាក់ចំណូល
តើអ្នកបានយល់ហើយឬនៅថា អ្វីទៅជាតម្រូវការចាំបាច់របស់អ្នកដើម្បីទទួលរកប្រាក់ចំណូល ទាំងនោះ? តើអ្នកគួរតែប្រើយុទ្ធសាស្ត្រថ្មី ដើម្បីអាចរកប្រាកចំណូលបានច្រើនជាងមុនឬ យ៉ាងណា? បើប្រាក់ចំណូលរបស់អ្នកធ្លាក់ចុះ នេះសបញ្ជាក់ឲ្យឃើញថា អ្នកត្រូវតែមានយុទ្ធសាស្ត្រ ឬ គន្លឹះថ្មីៗ បង្កើនប្រាក់ចំណូលឡើងវិញ។ សាកល្បងពិនិត្យមើលលទ្ធភាពលក់ក្នុងអាជីវកម្មរបស់អ្នក និង អ្វីដែលត្រូវធ្វើបន្តទៀត។ នេះហើយជាអ្វីដែលធ្វើឲ្យអ្នកប្រយ័ត្នប្រយែង ឬ យកចិត្តទុកដាក់ក្នុងការគ្រប់គ្រងហិរញ្ញវត្ថុរបស់អ្នកឲ្យមាន ប្រសិទ្ធភាពជាងមុន៕

Author: គន្លឹះគ្រប់គ្រងហិរញ្ញវត្ថុក្នុងអាជីវកម្មឲ្យមានប្រសិទ្ធភាព

Source: indianmanpower

Thursday, October 1, 2015

បំណុលនឹងរួចទោះបីច្រើនក៏ដោយ ឲ្យតែអ្នកអនុវត្តតាមគន្លឹះទាំង៨ នេះ

បំណុលនឹងរួចទោះបីជាមានច្រើនយ៉ាងណាក៏ដោយ ឲ្យតែអ្នកអនុវត្តតាមគន្លឹះទាំ� debt

តើលោកអ្នកធ្លាប់ជំពាក់បំណុលអ្នកដទៃដែរឬទេ? បើធ្លាប់ តើលោកអ្នកដោះស្រាយបំណុលនោះរបៀបណា? ចម្លើយ លោកអ្នកពិតជាមានយុទ្ធសាស្ត្រដោយខ្លួនឯង តែទោះជាយ៉ាងនេះក្តី TheBNEWS សូមបង្ហាញគន្លឹះស្ដីពីការដោះស្រាយបំណុលឲ្យមានប្រសិទ្ធភាពជូនដល់ ប្រិយមិត្តអ្នកអានឲ្យបានជ្រាបទុកសម្រាប់អនុវត្តការពារខ្លួនដោះ ឲ្យរួច និង មិនធ្លាក់ចូលបំណុលអ្នកដទៃ។

១) ដាក់ឆន្ទៈក្នុងការដោះស្រាយបំណុល
នៅពេលដែលអ្នកខ្លួនក្នុងបំណុល អ្នកមិនត្រូវបាក់ទឹកចិត្តខ្លួនឯងនោះទេ តែអ្វីដែលលោកអ្នកត្រូវធ្វើនោះគឺក្តីសង្ឃឹម និងការប្ដេជ្ញាចិត្តថា នឹងដោះវាឲ្យរួចនៅថ្ងៃណាមួយ។ ទោះបីជាអ្នកមានគូ ឬ នៅលីវក៏ដោយ ទំនូលខុសត្រូវគឺជារឿងសំខាន់ ហើយអ្នកត្រូវប្រាកដថា តើអ្នកណាខ្លះមានចំណែកក្នុងការដោះបំណុលនេះ? មិនចំពោះខ្លួនអ្នកផ្ទាល់ ឬ សមាជិកគ្រួសារឯទៀតនោះទេ ត្រូវធ្វើការសម្រេចចិត្តពីយុទ្ធសាស្ត្រដោះស្រាយបំណុល ជាពិសេសការរួមគ្នាកាត់បន្ថយការចំណាយឲ្យទិញជាងចំណូលជាដើម។

២) រៀបចំគម្រោងចំណាយ
ក្រឡេកទៅមើលការចំណាយប្រចាំខែរបស់អ្នកវិញ តើអ្នកបានចំណាយទៅលើអ្វីខ្លះ? បើអ្នកមិនដឹងថា អ្នកបានចំណាយទៅលើអ្វីខ្លះ នោះវាមិនមែនជារឿងចៃដន្យឡើយ ដែលអ្នកជំពាក់បំណុលគេ។ យ៉ាងណាក៏ដោយ សូមចាប់ផ្តើមរៀបចំគម្រោងចំណាយប្រចាំខែរបស់អ្នកឡើងវិញថា តើអ្នកគួរចំណាយទៅលើអ្វីខ្លះក្នុងខែនេះ? បន្ទាប់មករៀបចំខ្ទង់ចំណាយឲ្យតូចជាងចំណូលដែលអ្នកមាន។

៣) កំណត់ និង លប់ចោលទាំងអស់លើការចំណាយទាំងឡាយណាដែលមិនចាំបាច់
តើអ្នកមានមើលរំលងលើការចំណាយមួយចំនួនដែលមិនចាំបាច់ដែរឬទេ? បើអ្នករកឃើញថា ការចំណាយមួយចំនួនឥតប្រយោជន៍ ខាតតែលុយ ខណៈបំណុលក៏មានច្រើន ចុះហេតុអ្វីមិនលុបបំបាត់ចោលភ្លាមទៅ? គន្លឹះដ៏មានប្រសិទ្ធភាពនៅទីនេះ អ្នកគួរប្រកាន់ខ្ជាប់គោលការណ៍ចំណាយលើអ្វីដែលចាំបាច់ កុំចំណាយលើអ្វីដែលអ្នកចង់បាន។

៤) ដោះបំណុលដែលដែលមានអត្រាការប្រាក់ខ្ពស់ជាមុន
ដោះបំណុលចេញពីប្រភពតែមួយវាជាបញ្ហាទៅហើយ តែអ្វីដែលជាបញ្ហាធ្ងន់ធ្ងរជាងនេះទៅទៀតគឺការជំពាក់បំណុលច្រើន កន្លែង។ បើអ្នកធ្លាក់ក្នុងស្ថានភាពនេះមែនចូរអនុវត្តប្រើយុទ្ធសាស្ត្រដោះ បំណុលណាដែលមានអត្រាការប្រាក់ខ្ពស់ជាមុនសិន ទើបដោះបំណុលដែលមានអត្រាការប្រាក់ទាបជាងជាក្រោយ។

៥) សន្សំប្រាក់ទុក្ខសម្រាប់គ្រាអាសន្ន
នេះជាករណីមួយដ៏លំបាកសម្រាប់អ្នកដែលមានបំណុលស្រាប់ ព្រោះថាម្ខាងរកលុយដើម្បីដោះបំណុល ម្ខាងទៀតរកលុយសម្រាប់ទុកចំណាយផ្ទាល់ខ្លួន។ យ៉ាងណាមិញ អ្នកគួរតែសួរខ្លួនឯងថា ហេតុអ្វីបានជាអ្នកធ្លាក់បំណុលគេ? ចម្លើយនោះគឺដោយសារអ្នកមើលរំលងការសន្សំប្រាក់ទុកសម្រាប់ គ្រាអាសន្ននេះឯងនៅពេលកន្លងមក។ ដូច្នេះ ទន្ទឹមនឹងការរកប្រាក់ដោះបំណុលគេ អ្នកក៏ត្រូវរកប្រាក់បន្ថែមក្នុងកម្រិតណាមួយបន្ថែមទៀត ដើម្បីទុកត្រៀមចំណាយពេលមានអាសន្ន ត្បិតអីវាអាការពារអ្នកមិនឲ្យធ្លាក់ក្នុងបំណុលអ្នកដទៃម្តងទៀត នៅពេលក្រោយ។

៦) រកប្រាក់ចំណូលបន្ថែម
បើអ្នកមានពេលវេលាច្រើន អ្នកគួរតែឆ្លៀតរកការងារផ្សេងក្រៅម៉ោងដើម្បីរកប្រាក់ចំណូល បន្ថែមទៀត នោះអាចធ្វើឲ្យអ្នកដោះខ្លួនពីបំណុលបានកាន់តែឆាប់។ ពេលវេលាដែលអ្នកកំពុងជំពាក់បំណុលគេ គឺជាពេលវេលាមួយដែលអ្នកត្រូវស្វាហាប់បំផុត និង មមាញឹកបំផុត។ ថ្វីត្បិតតែវាមានការហត់នឿយបន្តិចក្តី តែត្រូវចាំថា អនាគតរបស់អ្នកជារឿងសំខាន់មិនមែនអង្គុយចំពាក់បំណុលគេនោះឡើយ។ ដរាបណាអ្នករកចំណូលបានកាន់តែច្រើន ជឿជាក់ថាបំណុលរបស់អ្នកក៏សាបរលាបតាមនោះដែរ។

៧) ព្យាយាមធ្វើឲ្យប្រភពបំណុលច្រើនឲ្យក្លាយជាប្រភពបំណុលតែមួយ
រវាងប្រភពបំណុលតែមួយ និង ប្រភពបំណុលច្រើន ប្រភពបំណុលតែមួយមានហានិភ័យតិចជាង និង ធ្វើឲ្យអ្នកមានលទ្ធភាពអាចដោះបានច្រើនទៀតផង។ នៅពេលដែលអ្នកជំពាក់បំណុលច្រើនប្រភព ប្រៀបដូចជាអ្នកកំពុងបង្កើតកូនបំណុលថ្មីៗបន្ថែមទៀត ដែលនេះជារឿងមួយផ្តល់ផលវិបាកបន្ថែមទៀត។ ហេតុដូច្នេះ បើអ្នកមានបំណុលច្រើនប្រភព អ្នកត្រូវដាច់ខាតឆាប់ដោះបំណុលទាំងនោះចេញឲ្យនៅតែជាប្រភពបំណុល តែមួយវិញ ទើបជាការប្រសើរ។

៨) រៀបចំយុទ្ធសាស្ត្រគ្រប់គ្រងហិរញ្ញវត្ថុ
ប្រយោជន៍មួយឃ្លាដែលអ្នកត្រូវចាំនៅពេលនេះនោះគឺថា អ្នកដែលគ្មានផែនការហិរញ្ញវត្ថុ គឺជាអ្នកដែលបរាជ័យគ្រប់គ្រងហិរញ្ញវត្ថុ។ ព្រោះអ្វី? ព្រោះមិនដឹងថា ខ្លួនត្រូវចំណាយប៉ុន្មាន? ចំណាយទៅលើអ្វីខ្លះ? ត្រូវសន្សំប្រាក់ទុកក្នុងកម្រិតណា? ។ល។ អ្នកមិនត្រឹមតែរៀបចំផែនការចំណាយតែមួយមុខប៉ុណ្ណោះនោះទេ តែអ្នកក៏ត្រូវចេះគ្រប់គ្រងការចំណាយឲ្យមានប្រសិទ្ធភាពទៀតផង ដើម្បីសន្សំប្រាក់មួយដោយឡែកនៅពេលដែលចូលនិវត្តន៍។ នៅពេលដែលអ្នកគ្រប់គ្រងហិរញ្ញវត្ថុ (ចំណូលចំណាយ) យ៉ាងមានប្រសិទ្ធភាព ធានាថា លោកអ្នកនឹងមិនធ្លាក់បំណុលជាលើកទី២នោះឡើយ៕

Author: ប្រែសម្រួល៖ ខេវិន

Source: Entrepreneur

យុទ្ធសាស្ត្រ៤ ចំណុចជួយគ្រប់គ្រងទំនាក់ទំនងអាជីវកម្មឲ្យរឹងមាំ

យុទ្ធសាស្ត្រ៤ ចំណុចជួយគ្រប់គ្រងទំនាក់ទំនងអាជីវកម្មឲ្យរឹងមាំ startupcollective

សហគ្រិនភាគច្រើនពិតជាចង់ដឹងថា តើត្រូវធ្វើដូចម្តេចដើម្បីបង្កើតទំនាក់ទំនងល្អមួយនៅក្នុង អាជីវកម្ម? នេះគឺជាបញ្ហា ព្រោះថាទំនាក់ទំនងដ៏ល្អវាមិនដូចទៅនឹងអ្វីដែលជាការរៀបចំ ឡើងរបស់ក្រុមហ៊ុននីមួយៗនោះឡើយ។ ម្យ៉ាងទៀតបរិយាកាសការងារនៅពេលបច្ចុប្បន្ននេះវាមានទំនាក់ទំនង ច្រើនបែបសណ្ឋានណាស់ដែលទាមទារឲ្យអ្នកគ្រប់គ្រងអាជីវកម្មស្វែងយល់ ឲ្យបានល្អិតល្អន់ និង ចេះថ្លឹងថ្លែងឲ្យបានត្រឹមត្រូវ។

ជាការផ្តល់ជំនួយ និង លើកកម្ពស់ការយល់ដឹងដល់មិត្តអ្នកអាន ជាពិសេសសហគ្រិនពីរបៀបធ្វើឲ្យទំនាក់ទំនងក្នុងអាជីវកម្មមានភាព រឹងមាំ សូមមិត្តអានស្វែងយល់ជាមួយ TheBNEWS ពីគន្លឹះ ៤ ចំណុចខាងក្រោមនេះ៖

១) ការផ្តល់ជូន និង ការទាញផលប្រយោជន៍មកវិញ (Give and Take)
កំហុសទូទៅនៅក្នុងបរិយាកាសអាជីវកម្មគឺថា ការទំនាក់ទំនងនោះមានឥទ្ធិពលជាលំហូរទៅតាមទិសដៅមួយប៉ុណ្ណោះ ពោលគឺការគ្រប់គ្រងក្នុងក្រុមហ៊ុនបានធ្វើឡើងពីថ្នាក់លើរហូត ដល់ថ្នាក់ក្រោម។ ផ្ទុយទៅវិញគ្រប់រូបភាពនៃការទំនាក់ទំនងទាំងអស់ ទំនាក់ទំនងគួរតែត្រូវបានធ្វើឡើងចែកចេញ២ទម្រង់នោះគឺ ទី១) ផ្តល់អំណាចដល់បុគ្គលិកបញ្ចេញប្រតិកម្មរបស់ពួកគេឲ្យកាន់តែ ច្រើន និង ទី២) បង្កើនសក្ដានុពលការងារឲ្យចេញជាលទ្ធផលល្អប្រសើរឡើង។

ទោះបីជាយ៉ាងណាក៏ដោយ អ្នកគ្រាន់តែដឹងថា ការគ្រប់គ្រងទំនាក់ទំនងក្នុងអាជីវកម្មនៅសតវត្សទី២១នេះ មានរូបភាពនិង ទិសដៅច្រើនបែបសណ្ឋានណាស់ ហេតុដូច្នេះរបៀបគ្រប់គ្រងតាមរូបមន្តអុំទូកបណ្តោយទឹកនោះគួរតែ ត្រូវកាត់បន្ថយ។ សូមអ្នកផ្តល់អ្វីមួយដ៏មានតម្លៃដល់ពួកគេ ដូចជារង្វាន់លើកទឹកចិត្ត ការបណ្តុះបណ្តាល ឬ តំឡើងតំណែង ។ល។ ព្រោះថាវាអាចជួយឲ្យពួកគេភ្ញាក់ស្មារតី និង អាចធ្វើឲ្យអ្នកអាចទាញយកប្រយោជន៍ពីពួកគេវិញ។

២) បង្ហាញបុគ្គលិកពីការឲ្យតម្លៃរបស់អ្នក (Show Employees That You Value Them)
ដំបូន្មានដែលបានផ្តល់ជូនដោយអ្នកជំនាញ មានតម្លៃណាស់សម្រាប់បុគ្គលិកគ្រប់រូបនៅកន្លែងការងារ។ នោះរួមមានដូចជា សកម្មភាពចូលរួម ការរួមចំណែក និង សកម្មភាពអ្វីម្យ៉ាងដែលជាបរិបទសាមញ្ញក្នុងសកម្មភាពទំនាក់ទំនង ប្រចាំថ្ងៃរបស់មនុស្ស។ នេះប្រៀបដូចជាការវិនិយោគដ៏ធំសម្បើមមួយមានគុណប្រយោជន៍ជះត្រលប់ មកវិញដល់ក្រុមហ៊ុនរបស់អ្នកដែលអ្នកមិនអាចមើលឃើញដោយភ្នែកទទេ បាន។

ជាទូទៅ អ្នកត្រូវទទួលស្គាល់ថា បុគ្គលិកម្នាក់ៗសុទ្ធតែមានសក្ដានុពល តែអ្វីដែលសំខាន់គឺការជ្រោមជ្រែងរបស់អ្នកក្នុងការជួយ បណ្តុះបណ្តាលសមត្ថភាព និង ជំនាញរបស់ពួកគេឲ្យកាន់តែប្រសើរឡើងបន្ថែមទៀត។ វាជារឿងសំខាន់ខ្លាំងណាស់សម្រាប់វិស័យអាជីវកម្ម ត្បិតអីទំនាក់ទំនងការងារល្អផុសចេញជារូបរាងឡើងលុះត្រាតែអ្នក គ្រប់គ្រងបានយល់ ឬ ស្គាល់ពីតម្លៃរបស់បុគ្គលិកម្នាក់ៗ។

៣) ត្រូវប្រុងប្រយ័ត្នការទំនាក់ទំនងច្រើនហួសហេតុពេក (Beware of Data Smog)
មានរឿងមួយដែលអ្នកគ្រប់គ្រងនៅពេលនេះត្រូវប្រុងប្រយ័ត្ននោះគឺ ការទំនាក់ទំនងច្រើនហួសហេតុ ពេក ត្បិតអីករណីនេះវាគ្រាន់តែជាបង្កឡើងជាបញ្ហាប្រឈមមុខមួយ តែប៉ុណ្ណោះ។ ដើម្បីជៀសវាងបញ្ហានេះ អ្នកត្រូវកំណត់វប្បធម៌មួយនៅការិយាល័យធ្វើការដែលអ្នកចង់បាន។ នោះអាចមានដូចជា កំណត់ពេលប្រជុំក្នុងពេលជាក់លាក់មួយ ការរៀបចំគម្រោងពិនិត្យលទ្ធផលការងាររបស់បុគ្គលិកឲ្យបានទៀងទាត់ រំលងចោលកិច្ចពិភាក្សាដែលគ្មានតម្លៃ និង បង្កើតទំនូលខុសត្រូវលើការងារជាដើម។

៤) ធ្វើឲ្យទំនាក់ទំនងទាំងក្នុង និង ក្រៅក្រុមហ៊ុនមានតុល្យភាព (Balance Your Internal and External Communications)
ការទំនាក់ទំនងមួយដែលគ្មានតុល្យភាពទាំងក្នុង និង ក្រៅក្រុមហ៊ុន នឹងបាត់បង់ភាពស៊ីចង្វាក់គ្នាទៅវិញទៅមករវាងបុគ្គលិកម្នាក់ទៅ បុគ្គលិកម្នាក់ទៀត ឬ ពីបុគ្គលិកម្នាក់ទៅកាន់អតិថិជនផ្សេងទៀត។ ក្នុងនាមជាអ្នកដឹកនាំ អ្នកត្រូវប្រាកដថា បរិយាកាសការងារ សេវាកម្មអតិថិជន ការគាំទ្រផលិតកម្ម និង ការរៀបចំគម្រោងជាដើម ត្រូវតែធ្វើឡើងរូបភាពមួយដោយស្មារតីទទួលខុសត្រូវ និង ចេះថ្លឹងថ្លែងឲ្យស៊ីជម្រៅ។

ជាឧទាហរណ៍ ការទំនាក់ទំនងទៅកាន់អតិថិជន និង អ្នករួមការងារមានលក្ខណៈខុសគ្នា ហេតុដូច្នេះវប្បធម៌ទំនាក់ទំនងរបស់អ្នកនៅកន្លែងធ្វើការអាចមិន ត្រូវបរិបទមួយនៅពេលដែលអ្នកទំនាក់ទំនងទៅកាន់អតិថិជននោះឡើយ។ ករណីនេះអ្នកមិនចាំបាច់ចំណាយប្រាក់ច្រើនបង្រៀនពួកគេនោះឡើយ ពោលគឺអ្នកគ្រាន់តែបង្កើនសកម្មភាពចូលរួម និង ដាស់តឿនពួកគេមានទំនូលខុសត្រូវកាន់តែខ្ពស់គឺរួចស្រេចទៅហើយ៕

វិធីបួនយ៉ាងជាគន្លឹះដែលលើកទឹកចិត្តអ្នក ឲ្យខិតខំកាន់តែខ្លាំងដើម្បីសម្រេចគោលដៅ!

ជាធម្មតាទេ ក្នុងជីវិតប្រចាំថ្ងៃ មនុស្សម្នាក់ៗតែងតែជួបបញ្ហាប្លែកៗ និង លំបាកៗ ដែលជាឧបសគ្គរារាំង មិនឲ្យសម្រេចអ្វីដែលពួកគេចង់បាន។ ក្នុងកាលៈទេសៈនេះ អ្នកខ្លះអាចនឹងបោះបង់ចោលអ្វីដែលខ្លួនប្រាថ្នាចង់បាន ដោយសារតែបញ្ហានោះវាលំបាកខ្លាំងពេក ប៉ុន្តែអ្នកខ្លះទៀតមិនព្រមចុះចាញ់នោះទេ ហើយនៅតែព្យាយាមរកវិធីដោះស្រាយបញ្ហា និង ធ្វើការកាន់តែខ្លាំងជាងមុន ដើម្បីសម្រេចគោលដៅដែលចង់បាន។ ដូច្នេះ ដើម្បីអាចបន្តកិច្ចការដែលចង់ធ្វើកាន់តែខ្លាំងជាងមុន អ្នកត្រូវតែចេះរកវិធីដើម្បី លើកទឹកចិត្តខ្លួនឯង។

ខាងក្រោមនេះ គឺជា គន្លឹះមួយចំនួន ដើម្បីលើកទឹកចិត្តខ្លួនឯង សម្រាប់បន្តការងារកានតែខ្លាំងជាងមុន៖

១) ដឹងច្បាស់អ្វីដែលអ្នកចង់ធ្វើ(Know clearly what you want to do )
ដើម្បីអាច ធ្វើកិច្ចការយ៉ាងអស់ពីចិត្ត និង ប្រកបដោយភាពជោគជ័យនោះ អ្នកត្រូវដឹងឲ្យច្បាស់ថា អ្វីដែលអ្នកពេញចិត្តជាមិនមុនសិន។ ប្រសិនបើ អ្នកមិនសូវពេញចិត្តខ្លាំងលើអ្វីមួយនោះទេ ប្រាកដណាស់ រាល់ពេលជួបបញ្ហាម្តងៗ អ្នកនឹងបោះបង់ចោលវាដោយងាយជាទីបំផុត។ ផ្ទុយទៅវិញ បើកិច្ចការទាំងនោះអ្នកដឹងច្បាស់ថា វាជាអ្វីដែលពេញចិត្ត អ្នកនឹងមិនអាចបោះបង់ដោយងាយនោះឡើយ ហើយវាកាន់តែធ្វើឲ្យមានការតស៊ូកាន់តែខ្លាំងឡើង ដើម្បីសម្រេចបំណងប្រាថ្នារបស់ខ្លួន។

២) សាងទំនុកចិត្តលើខ្លួនឯង (Build your confidence)
មុនពេលចេញទៅធ្វើរឿងអ្វីទាំងឡាយ ចំណុចសំខាន់ដែលមិនគួរមើលរំលងនោះ គឺសាងភាពជឿជាក់លើខ្លួនឯងជាមុនសិន។ ការសាងជំនឿចិត្តលើខ្លួនឯង ពិតជាមានសារៈសំខាន់ ក្នុងការជំរុញឲ្យអ្នកហ៊ានតស៊ូជាមួយនឹងបញ្ហាយ៉ាងក្លាហានបំផុត។ ដូច្នេះ ត្រូវចេះសាងការជឿជាក់ឲ្យបានខ្លាំងបំផុត ព្រោះសូម្បីតែខ្លួនឯងអ្នកមិនទុកចិត្តផង តើអ្វីដែលអាចទុកចិត្ត។

៣) រៀនសូត្រពីមនុស្សដែលធ្វើការខ្លាំង ( Learn from other people who are working hard)
មជ្ឈដ្ឋានជុំវិញខ្លួនយើង គឺពិតជាមានសារៈសំខាន់ខ្លាំងណាស់ ព្រោះវាជាចំណែកមួយដែលអាចមានឥទ្ធិពល ទាំងការគិត និង ឥរិយាបថ។ បើអ្នករាប់អានជាមួយមនុស្សដែល មានភាពខ្ជិលច្រអូសច្រើននោះ មិនយូរមិនឆាប់អ្នកក៏អាចក្លាយជាមនុស្សប្រភេទនេះដែរ តែប្រសិនបើអ្នកស្គាល់មនុស្សដែល មានទម្លាប់ល្អ ជាពិសេសគឺ អ្នកដែលមានភាពតស៊ូក្នុងការធ្វើកិច្ចការអ្វីមួយនោះ វានឹងផ្តល់ផលវិជ្ជមានជាច្រើនជាមិនខាន។ ការដែលអ្នក ស្គាល់មនុស្សពូកែ និង តស៊ូធ្វើការ វាអាចធ្វើឲ្យអ្នកអាចស្វែងយល់ពីគន្លឹះសំខាន់ៗរបស់ពួកគេ ក្នុងការលើកទឹកចិត្តឲ្យខ្លួនឯង អាចបន្តការងារទៅមុខបាន បើទោះបីជា ជួបបញ្ហាលំបាកៗយ៉ាងណាក្តី។

៤) គួរគិតថា គ្មាននរណាម្នាក់ល្អឥតខ្ចោះនោះទេ (Should think that no one is perfect)
បើទោះបីជា អ្នកបានប្រុងប្រយ័ត្ន ហើយបានព្យាយាមយ៉ាងខ្លាំងក្នុងការធ្វើកិច្ចការអ្វីមួយក្តី វាមិនមែនមានន័យថា លទ្ធផលគឺសុទ្ធតែជោគជ័យ ១០០ ភាគរយនោះទេ ពោលគឺ វាជៀសមិនផុតពីភាពបរាជ័យខ្លះឡើយ។ ក្នុងស្ថានភាពនេះ អ្នកមិនគួរអស់សង្ឃឹមឡើយ តែត្រូវគិតថា «គ្មាននរណាម្នាក់ ល្អឥតខ្ចោះទេ» ពោលគឺកំហុស ឬ ភាពបរាជ័យតែងតែកើតមាន។ ការគិតបែបនេះ អាចធ្វើឲ្យអ្នក មានទឹកចិត្តក្នុងការបន្តការងារ និង តស៊ូក្នុងជីវិតកាន់តែខ្លាំងឡើង៕

ហេតុអ្វីបានជាសហគ្រិនត្រូវត្រៀមខ្លួនទទួលយកភាពបរាជ័យ ជាជាងភាពជោគជ័យ?

សហគ្រិនត្រូវត្រៀមខ្លួនទទួលយកភាពបរាជ័យ ជាជាងភាពជោគជ័យ entrepreneur

ការបង្កើតអាជីវកម្មមួយជាមួយមហិច្ឆតា គឺជារឿងសំខាន់របស់សហគ្រិននានា តែអ្វីដែលកាន់តែសំខាន់ជាងនេះទៅទៀតនោះគឺត្រូវត្រៀមខ្លួនហ៊ាន ទទួលយកភាពបរាជ័យដែលនឹងកើតឡើង។ នេះជាបញ្ហាដ៏ធំមួយ ហើយជាអ្វីដែលគេមើលឃើញថា សហគ្រិន ៩០ % សុទ្ធតែបរាជ័យក្នុងអាជីវកម្មរបស់ខ្លួន។

យ៉ាងណាមិញ ការមិនព្រមបោះបង់មហិច្ឆតារបស់ខ្លួនដោយព្យាយាមងើបឡើងវិញម្តង ហើយម្តងទៀតបានធ្វើឲ្យពួកគេទទួលបានជោគជ័យយ៉ាងពិតប្រាកដ។ តែសូមកុំភ្លេចថា ការត្រៀមខ្លួនទទួលយកភាពបរាជ័យនេះហើយដែលជាមេរៀនដ៏ល្អមួយធ្វើ ឲ្យសហគ្រិនទាំងនោះស្គាល់ពន្លឺថ្ងៃរហូតមកដល់សព្វថ្ងៃនេះ។ បើដូច្នេះមែន តើអ្វីទៅជាសារសំខាន់នៃការត្រៀមទទួលយកភាពបរាជ័យ?

១) ធ្វើឲ្យសហគ្រិនមានភាពវ័យឆ្លាត និង កាន់តែរឹងមាំ
អ្វីដែលជាអត្ថន័យដ៏សាមញ្ញនៅទីនេះគឺថា ការត្រៀមខ្លួនដើម្បីបរាជ័យ នឹងជួយធ្វើឲ្យសហគ្រិនកាន់តែរឹងមាំ និង មានភាពវៃឆ្លាតជាងមុន។ ប្រការនេះគឺថា នៅពេលដែលសហគ្រិនម្នាក់បានមើលឃើញពីភាពបរាជ័យរបស់ខ្លួន ឬ យល់ឃើញថា ភាពបរាជ័យនឹងកើតឡើងនៅថ្ងៃណាមួយ ពេលនោះហើយដែលសហគ្រិននោះចាប់ផ្តើមគិតរិះរកពីគន្លឹះជោគជ័យជា ថ្មីមួយឲ្យកាន់តែល្អជាងមុន។ ជាឧទាហរណ៍ថា ប្រសិនបើសហគ្រិនម្នាក់លក់ផលិតផលភេសជ្ជៈរបស់ខ្លួនមិនសូវដាច់ ស្ថានភាពនេះនឹងបង្រៀនសហគ្រិននោះឲ្យចេះរិះរកវិធីសាស្ត្រថ្មីរៀន សូត្រពីកំហុសរបស់ខ្លួនដើម្បីចាប់ផ្តើមអន្ទងចិត្តអតិថិជនឡើងវិញ។ សូមចាំថា សហគ្រិនដែលជួបភាពបរាជ័យកាន់តែច្រើន នឹងកាន់តែមានទំនុកចិត្ត និង ភាពជឿជាក់ក្នុងការធ្វើអាជីវកម្មកាន់តែប្រសើរឡើងជាមុន។

២) ធ្វើឲ្យសហគ្រិនមានភាពច្បាស់លាស់ និង ប្រកដប្រជាជាងមុន
មានសហគ្រិនមួយចំនួនយល់ថា ការដាក់ចិត្តដាក់កាយក្នុងអាជីវកម្មរបស់ខ្លួនពិតជារៀង ត្រឹមត្រូវមួយរហូតធ្វើការភ្លេចខ្លួនងប់ងុលក្នុងការងារនោះដោយ គ្មានហេតុផលដោយយល់ថា នេះជាភាពការងារមួយដែលខ្លួនមិនត្រូវធ្វេសប្រហែស។ ការពិតមានរឿងរ៉ាវជាច្រើននៅខាងក្រៅដែលអាចធ្វើឲ្យខ្លួនមាន សក្ដានុពលជាងនេះនោះគឺអតិថិជន។ អាជីវកម្មរបស់អ្នកផ្សារភ្ជាប់ទៅនឹងអតិថិជន ហេតុដូច្នេះប្រសិនបើអ្នករកឃើញពីកង្វះខាតនូវការគាំទ្រពី សំណាក់អតិថិជន នោះជាពេលមួយដែលអ្នកត្រូវសិក្សាខ្លួនឯងថា តើអ្វីទៅជាភាពជោគជ័យពិតប្រាកដ? នេះជាដំណាក់កាលមួយដែលអ្នកអាចស្វែងយល់ខ្លួនឯងបានថា តើត្រូវប្រឈមមុខនឹងភាពបរាជ័យនោះដោយរបៀបណា? អ្វីទៅជាដំណោះស្រាយ? បើអ្នកអាចរកឃើញចម្លើយបានមែននោះ មានន័យថាអ្នកពិតជាស្គាល់ខ្លួនឯងច្បាស់ជាងមុន និងអាចគ្រប់គ្រងវាបានយ៉ាងមានប្រសិទ្ធភាព។

៣) ធ្វើឲ្យសហគ្រិនខិតខំប្រឹងប្រែងជាងមុន
សហគ្រិនម្នាក់ដែលមើលឃើញពីភាពបរាជ័យហើយ តែមិនព្រមងើបដើរឡើងវិញ នោះមិនស័ក្ដិសមជាសហគ្រិននោះឡើយ ត្បិតអីភាពជាសហគ្រិនគឺជាបុគ្គលដែលមានការតស៊ូស្វិតស្វាញបំផុត មិនព្រមបោះបង់គោលដៅរបស់ខ្លួនជាដាច់ខាត។ នេះជាការពិត ហើយអ្វីដែលយើងលើកយកចំណុចនេះមកពិភាក្សាពិតជាត្រឹមត្រូវ ព្រោះការបរាជ័យបានធ្វើឲ្យសហគ្រិនខិតខំខ្នះខ្នែង កាន់តែព្យាយាមដើម្បីសម្រេចបានគោលដៅរបស់ខ្លួន។ ការពិតមិនខុសពីសហគ្រិនទូទៅ នៅពេលដែលអ្នកបរាជ័យ សូមអ្នកយកពាក្យមួយឃ្លានៅទីនេះមកគិតបន្តិចនោះគឺថា សហគ្រិនធ្វើអាជីវកម្មមិនមែនសម្លឹងមើលត្រឹមតែ១ខែ ឬ ១ ឆ្នាំខាងមុខនោះទេ តែជាការប្រមើលមើលពីភាពជោគជ័យនៅក្នុងរយៈពេល ៥ ឬ ១០ ឆ្នាំខាងមុខឯណោះ។

៤) ធ្វើឲ្យសហគ្រិនអាចរំដោះខ្លួនចេញពីបរាជ័យដោយងាយស្រួល
សហគ្រិនម្នាក់ដែលមិនស្គាល់សោះពាក្យថា ចាញ់ ឬ បរាជ័យ សហគ្រិននោះក៏មិនស្គាល់ភាពជោគជ័យពិតប្រាកដដែរ។ សហគ្រិនបែបនេះរមែងតែងតែជួបភាពតក់ស្លុតខ្លាំងនៅពេលបរាជ័យចូលមក ដល់ ត្បិតអីខ្លួនមិនបានត្រៀមទុកជាមុន ម្យ៉ាងមិនសូវមានយុទ្ធសាស្ត្រទប់ទល់ភាពបរាជ័យទៀតផង។ នេះហើយជាបញ្ហា ដែលសហគ្រិនត្រូវតែយល់ថា បញ្ហា ឬ ភាពបរាជ័យពិតជាគ្រឹះដ៏សំខាន់ធ្វើឲ្យយើងហ៊ានប្រឈមមុខវានៅពេល ក្រោយៗ ទៀតដោយមិនភ័យខ្លាច។ ទាំងឆ្លាត មានសុទិដ្ឋិនិយមកាន់តែរឹងមាំ ភាពជឿជាក់ ភាពប្រាកដប្រជា និង ការហ៊ានប្រឈមមុខដោយមិនភ័យខ្លាច ទាំងនេះគឺជាអ្វីដែលសហគ្រិនទូទៅរៀនសូត្របានពីភាពបរាជ័យ៕

ការអនុវត្ត ៦យ៉ាងបង្កើនឱកាសជោគជ័យនៅក្នុងជីវិត និងអាជីវកម្មរបស់អ្នក

ជោគជ័យ akhypnosis.com

មនុស្សម្នាក់ៗកំណត់ការជោគជ័យរបស់ខ្លួនផ្សេងៗ គ្នា។ ចំពោះអ្នកខ្លះគេអាចមានលទ្ធភាពទិញរថយន្តល្អ ឬខុនដូយ៉ាងស្អាត។ អ្នកខ្លះទៀតគេមានលទ្ធភាពផ្ដល់អ្វីមួយដល់គ្រួសាររបស់គេ។ អ្នកជំនាញបានផ្ដល់យោបល់ថា អ្វីដែលសំខាន់គឺត្រូវកំណត់អត្ថន័យឱ្យបានច្បាស់ថា តើអ្វីជាជោគជ័យដែលមានន័យចំពោះអ្នក?

១) ស្វែងរកបទពិសោធន៍ថ្មីៗ៖ អ្នកមានបទពិសោធន៍ កាន់តែច្រើន អ្នកនឹងមានឱកាសជួបមនុស្សផ្សេងៗ បានដឹងពីរបៀបរស់នៅ និងទស្សនៈកាន់តែច្រើន។ អ្នកអាចរៀនពីបទពិសោធន៍អ្នកផ្សេងបាន អ្នកនឹងមានជោគជ័យកាន់តែច្រើន។ ការស្វែងរកបទពិសោធន៍ថ្មីៗមានន័យថា អ្នកមានបំណងតតាំងខ្លួនឯង ហើយចង់បន្តរៀនពីពិភពនៅជុំវិញខ្លួនអ្នក។

២) កុំមានការសង្ឃឹមជាមុន៖ បើអ្នកបានរៀនសូត្រអ្វីមួយ ចូរកុំសង្ឃឹមថាវានឹងផ្ដល់ផលត្រឡប់មកវិញភ្លាមៗអី។ បើវាមិនបានឲ្យផលភ្លាមៗទេ ចុះអ្នកកុំឈប់ធ្វើទៀតឱ្យសោះ។ ដូចជាការសិក្សាជាដើម វានឹងផ្ដល់ផលតបវិញនៅពេលណាមួយជាមិនខានឡើយ។

៣) ចូររាប់អានមនុស្សដែលអ្នកជួបដោយស្មោះត្រង់៖ អី។ មនុស្សម្នាក់ៗតែងតែផ្ដល់ឲ្យនូវអ្វីមួយ។ អ្នកនឹងមានការភ្ញាក់ផ្អើលចំពោះរបៀបដែលមនុស្សជាច្រើនមានបំណង គាំទ្រ និងធ្វើតាមអ្នក បើអ្នករាប់អានពួកគេដោយគោរពដោយមិនគិតពីអ្វីដែលគេមាន ឬក៏ទីកន្លែងដែលគេរស់នៅ។ កុំបោះបង់ឱកាសរាក់ទាក់អ្នកណាមួយឲ្យសោះ ព្រោះអ្នកក៏មានការវិនិច្ឆ័យផងដែរ។

៤) ចូរធ្វើតបវិញ៖ សប្បុរសធម៌គឺជាអ្វីដែល អ្នកមិនគួរបញ្ឈប់នោះទេ។ រឿងមួយទៀត អ្នកត្រូវធ្វើជាអ្នកស្ដាប់ឲ្យកាន់តែល្អ និងកាន់តែទាក់ទាញ។ អ្នកមិនត្រូវគិតពីកំហុសផ្ទាល់ខ្លួនពេកទេ។

៥) បង្កើតព្រឹត្តិការអស្ចារ្យធំក្ដីតូចក្ដី៖ នៅពេលអ្នកសម្រេចបានចុងក្រោយនូវគោលដៅដែលអ្នកគិតថា មិនបានជោគជ័យនោះ វានឹងមានអារម្មណ៍អស្ចារ្យដូចដែលអ្នកនឹងគិតដូច្នោះឯង។ អ្នកនឹងក្លាយជា មនុស្សកាន់តែសប្បាយចិត្តខ្លាំងជាងមុន បើអ្នកបោះជំហានៗតាមផ្លូវនោះ។

៦) កុំបំភ្លេចអតីតកាល៖ កំហុសតែងតែញាំញីក្នុង ដំណើរឆ្ពោះទៅរកជោគជ័យ។ បានរៀនពីកំហុសរបស់ខ្លួនបានច្រើន វាពិតជាប្រសើរជាងជោគជ័យទៅទៀត។ ការពិត ការជោគជ័យរបស់មនុស្សមិនអាចសម្រេចទៅបានដោយគ្មានកំហុសនោះទេ ដូច្នេះឈប់ធ្វើឲ្យខ្លួនអ្នកឈឺចាប់ទៀតទៅនៅពេលបង្កើតកំហុសណា មួយទោះធំក្ដី តូចក្ដី តែត្រូវចាំថា កុំឱ្យកើតឡើងម្ដងទៀត៕

គោលការណ៍គ្រឹះទាំង៧ ប្រែក្លាយពីអ្នកគ្រប់គ្រងសាមញ្ញទៅអ្នកគ្រប់គ្រងល្អ

គោលការណ៍គ្រឹះទាំង៧ប្រែក្លាយពីអ្នកគ្រប់គ្រងសាមញ្ញទៅអ្នកគ្រប់គ្រងល្អ windstartech

ត្រឹមតែជាអ្នកគ្រប់គ្រងគ្រប់គ្រាន់ដែរឬទេ? នេះជាសំនួរមួយដែលប្រិយមិត្តអ្នកអាន ជាពិសេសសហគ្រិន និង អ្នកគ្រប់គ្រងនានាគួរស្វែងយល់យ៉ាងប្រុងប្រយ័ត្ន។ មិត្តអ្នកអានអាចយល់ថា ដោយសារតែលោកអ្នកជាមនុស្សមានសមត្ថភាព និង មានទំនុកចិត្តទើបត្រូវបានគេចាត់តាំងឲ្យទទួលខុសត្រូវជាអ្នក គ្រប់គ្រងនៅក្នុងស្ថាប័នណាមួយ។

យ៉ាងណាមិញ សូមចាំថា រាល់បុគ្គលិកទាំងអស់ ត្រូវការអ្នកគ្រប់គ្រងម្នាក់ដែលមានគុណភាព និង មានគុណតម្លៃយ៉ាងច្រើនដល់បុគ្គលិកគ្រប់គ្នា។ បើដូច្នេះមែននោះ ត្រឹមតែជាអ្នកគ្រប់គ្រង វាមិនទាន់គ្រប់គ្រាន់ទេ តែលោកអ្នកត្រូវក្លាយជាអ្នកគ្រប់គ្រងមួយដ៏ល្អផ្តល់ភាពជា គំរូដល់មនុស្សគ្រប់គ្នា។ ហេតុដូច្នេះ បើអ្នកគ្រប់គ្រងមួយចំនួនយល់ថា នៅមានចំណុចខ្វះខាតត្រង់ចំណុចណាមួយ សូមសិក្សាពីគន្លឹះចំនួន៧ ខាងក្រោមនេះដើម្បីប្រែក្លាយពីអ្នកគ្រប់គ្រងសាមញ្ញទៅជា អ្នកគ្រប់គ្រងល្អមួយរូប។

១) រក្សាឥរិយាបថឲ្យបានល្អ
ឥរិយាបថ (ដេក ដើរ ឈរ អង្គុយ) គឺជាចំណុចស្លាប់រស់មួយរបស់អ្នកគ្រប់គ្រងដ៏ល្អ ហើយអ្នកគ្រប់គ្រងដ៏ល្អបានដឹងថា ថាមភាព និង ឥរិយាបថជួយបង្កើនល្បឿនការងារនៅថ្ងៃនេះ។ គេអាចមើលឃើញជាទូទៅថា ភាពខុសគ្នារវាងអ្នកគ្រប់គ្រងសាមញ្ញ និង អ្នកគ្រប់គ្រងល្អ គឺថាអ្នកគ្រប់គ្រងសាមញ្ញឡើងជណ្តើរមួយៗ ខណៈដែលអ្នកគ្រប់គ្រងល្អវិញព្យាយាមរត់ឡើងជណ្តើរនោះ។

ងាកមកមើលការស្លៀកពាក់ និង តុបតែងកាយវិញ អ្នកគ្រប់គ្រងល្អតែងស្លៀកពាក់សមរម្យភាពជាអ្នកដឹកនាំ ហើយថាធានាថា ភាសាកាយវិការពិតជាជះឥទ្ធិពល និង គំរូដល់បុគ្គលិកឯទៀត។ រីឯភាសាទំនាក់ទំនងវិញ មានភាពច្បាស់លាស់ ងាយយល់ ម៉ត់ចត់ ដែលធ្វើឲ្យបុគ្គលិកគ្រប់គ្នាអាចទទួលយកបានទោះបីជាស្ថិតនៅក្នុង ស្ថានភាពតឹងតែងណាមួយក៏ដោយ។

២) ធ្វើឲ្យមានតម្លាភាពដល់មនុស្សគ្រប់គ្នា
អ្នកមិនអាចក្លាយជាអ្នកគ្រប់គ្រងដ៏ល្អបានទេ បើសម្ដីរបស់អ្នកសាបដូចជាចុងអំពៅ។ ហេតុដូច្នេះការនិយាយស្តីចំៗ ពិតៗ និងដោយផ្ទាល់ទន្ទឹមនឹងមានភាពស្មោះត្រង់ជាពិសេសនៅពេលមាន ស្ថានភាពមិនល្អ នោះហើយជាអ្វីដែលអ្នកគ្រប់គ្រងល្អត្រូវធ្វើ។ លើសពីនេះទៅទៀត តម្លាភាពរបស់អ្នកគ្រប់គ្រងល្អ បង្ហាញភាពជាវិជ្ជមានក្នុងការឆ្លើយតបភ្លាមៗ ជាមួយនឹងការយកយន្តការដំណោះស្រាយធ្វើជាមូលដ្ឋាន។

អ្វីដែលគេមើលឃើញកាន់តែច្បាស់បន្ថែមទៀតនោះគឺថា អ្នកគ្រប់គ្រងដែលមានតម្លាភាព គឺជាបុគ្គលដែលនិយាយដោយបើកចំហ មិនលាក់លៀម និង បង្កលក្ខណៈងាយស្រួលដល់មនុស្សគ្រប់គ្នាឲ្យចូលរួមវាយតម្លៃ ព្រមទាំងផ្តល់មតិកែលំអលទ្ធផលការងារបានដោយស្មើភាព។

៣) បង្ហាញភាពចាស់ទុំ និង គំរូដល់មនុស្សគ្រប់គ្នា
ភាពជាចាស់ទុំក្នុងពេលបំពេញការងារក្តី ក្រៅការងារក្តីសុទ្ធតែជះឥទ្ធិពល និង ផ្តល់គំរូមួយដល់មនុស្សគ្រប់គ្នា ជាពិសេសរបស់បុគ្គលិកក្រោមបង្គាប់តែម្តង។ ម៉្លោះហើយ អ្នកគ្រប់គ្រងដែលល្អត្រូវគិតគូរបង្ហាញឧត្តមភាពមួយយ៉ាងមានតម្លៃ សម្រាប់ធ្វើជាកញ្ចក់ដល់មនុស្សគ្រប់គ្នា។ នេះមិនត្រឹមតែ បង្ហាញគុណតម្លៃរបស់អ្នកប៉ុណ្ណោះទេ តែវាបានធ្វើឲ្យបុគ្គលិកឯទៀតអនុវត្តតាម និង មានទំនូលខុសត្រូវខ្ពស់ទាំងទំនាក់ទំនងក្នុងការងារក្តី ក្រៅការងារក្តី ជាពិសេសគឺក្រមសីលធម៌នេះឯង។

៤) ចេះបទបែនតាមកាលៈទេសៈ
អ្នកគ្រប់គ្រងល្អ គឺជាបុគ្គលស្គាល់កាលៈទេសៈច្បាស់លាស់ថា អ្វីដែលគូរធ្វើ ឬ ផ្លាស់ប្ដូរនៅពេលនេះ។ ជាមួយជំនឿដ៏ជឿជាក់របស់អ្នក អ្នកត្រូវប្រែក្លាយឧបសគ្គ និង បញ្ហាប្រឈមមុខដ៏តឹងតែងទាំងនោះឲ្យស្របតាមកាលៈទេសៈ អាចបោះជំហានទៅមុខយ៉ាងរលូនហាក់មិនមានអ្វីកើតឡើង។

អ្វីដែលរឹតកាន់តែពិសេសជាងនេះទៅទៀតក្នុងអំឡុងពេលនេះ អ្នកត្រូវឈ្លេចសួរបុគ្គលិក ឬ មនុស្សគ្រប់គ្នា ថាតើអ្នកទាំងនោះមានប្រតិកម្មយ៉ាងណាចំពោះបញ្ហាថ្មីៗនេះ? សូមកុំនៅស្ងប់ស្ងៀមឲ្យសោះ ព្រោះថាកាលៈទេសៈដែលផ្លាស់ប្ដូរទាមទារឲ្យមានកិច្ចពិភាក្សាកាន់តែ ច្រើន ត្បិតអីវាវិធីសាស្ត្រដ៏ល្អដើម្បីដំណោះស្រាយបញ្ហាដែលឥតព្រាងទុក ។

៥) ពង្រឹងគណនេយ្យភាពក្នុងការងារ
ចំណុចមួយទៀតដែលគេយល់ថា ធ្វើឲ្យគ្រប់គ្រងសាមញ្ញម្នាក់ក្លាយទៅជាអ្នកគ្រប់គ្រងល្អ បាន គឺគណនេយ្យភាពនៅក្នុងការងារ។ គណនេយ្យភាពដែលនិយាយឲ្យងាយយល់ថា ជាទំនូលខុសត្រូវធ្វើឲ្យការងារទទួលបានផ្លែផ្កា ជាភារកិច្ចរបស់អ្នកគ្រប់គ្រង។ ហេតុដូចនេះ បើអ្នកចង់ក្លាយជាអ្នកគ្រប់គ្រងល្អ អ្នកត្រូវបង្កើតឲ្យមានវប្បធម៌ល្អៗ ជាដំណោះស្រាយក្នុងការងារ និង ខិតខំឲ្យអស់ពីលទ្ធភាពកសាងបរិស្ថានការងារមួយដែលមានការរៀនសូត្រ គ្មានដែនកំណត់។

៦) ជួយអនុវត្តយុទ្ធសាស្ត្រការងារដល់បុគ្គលិក
អ្នកគ្រប់គ្រងល្អ មិនមានគ្រាន់តែដឹងត្រឹមតែភាពជាអ្នកគ្រប់គ្រងប៉ុណ្ណោះទេ តែត្រូវបង្ហាញ និង អនុវត្តយុទ្ធសាស្ត្រការងារដល់បុគ្គលិកក្រោមបង្គាប់របស់ខ្លួនផង ដែរ។ ជាឧទាហរណ៍ អ្នកគ្រប់គ្រងល្អមិនត្រឹមតែតែផ្តល់មតិកែលំអប៉ុណ្ណោះទេ តែត្រូវអនុវត្តដំណោះស្រាយឬ មតិកែលំអទាំងនោះផងដែរជាមួយគោលដៅមួយយ៉ាងច្បាស់លាស់ពិតប្រាកដ។ នៅពេលដែលអ្នកបើកផ្លូវណាមួយដល់ពួកគេ នោះជាចំណែកមួយយ៉ាងធំធេងជួយកសាងទំនុកចិត្តដល់ពួកគេបន្ថែមទៀត ដើម្បីឆ្ពោះទៅកាន់គោលដៅនោះ។

៧) អភិវឌ្ឍទេពកោសល្យរបស់អ្នក
សារសំខាន់តែមួយគត់របស់ក្រុមហ៊ុនមួយដែលមានអ្នកគ្រប់គ្រងល្អ គឺជាក្រុមហ៊ុនដែលមានបុគ្គលចូលរួមអភិវឌ្ឍទេពកោសល្យរបស់ខ្លួន ច្រើន។ បុគ្គលទាំងនេះ ជាអ្នកដែលអាចផ្លាស់ប្ដូរវិវត្តឈរនៅលើទីតាំងមួយដ៏ត្រឹមត្រូវ និង ចំកាលៈទេសៈ។ ទាំងនោះមានដូចជា ការលើកទឹកចិត្តឲ្យមានឱកាសថ្មីៗ និង ការអនុវត្តគម្រោងនានាដែលឆ្ពោះទៅរកការអភិវឌ្ឍមួយជាតម្រូវ ការ និង ការសម្រេចចិត្តរបស់មនុស្សគ្រប់គ្នា។ អ្នកគ្រប់គ្រងល្អ ក៏ជាបុគ្គលដែលគិតគូរពីអនាគតយ៉ាងយកចិត្តទុកដាក់បំផុត ដើម្បីបង្កើនសក្តានុភាពការងារ និង ផលប្រយោជន៍របស់មនុស្សគ្រប់គ្នា៕

Author: ប្រែសម្រួល៖ ខេវិន

Source: Entrepreneur

Wednesday, September 23, 2015

ចង់ដោះស្រាយបញ្ហាក្នុងអាជីវកម្មឲ្យមានប្រសិទ្ធភាព អនុវត្តតាមជំហានទាំង១០នេះ

តើ លោកអ្នកធ្លាប់មានបញ្ហានៅក្នុងអាជីវកម្មដែរឬទេ? តើបរាជ័យនៅក្នុងអាជីវកម្មរបស់អ្នកមានក្នុងកម្រិតណា? តើអ្នកដោះស្រាយបញ្ហានោះដោយរបៀបណា? តើមានជំហានអ្វីខ្លះដែលអ្នកត្រូវអនុវត្តដើម្បីដោះស្រាយបញ្ហា ទាំងនោះ? ហេតុអ្វីបានជាមហាសេដ្ឋី Bill Gates, Larry Ellison, Warren Buffett, Mark Zuckerberg, Aliko Dangote និង Steve Jobs អាចជោគជ័យក្នុងអាជីវកម្មបាន?

ការពិត មហាសេដ្ឋីកំពូលៗនៅលើពិភពលោកទាំងនេះសុទ្ធតែជួបបញ្ហាក្នុង អាជីវកម្មរាប់មិនអស់ តែអ្វីដែលសំខាន់នោះគឺថា ពួកគេបានហែលផុតបញ្ហាទាំងនោះបានដោយជោគជ័យរហូតមកដល់សព្វថ្ងៃ។ អ្នកទាំងនេះគឺសុទ្ធតែមានយុទ្ធសាស្ត្រដោះស្រាយអាជីវកម្មរៀងៗខ្លួន រួចទៅហើយ តែជាគោលការណ៍ការស្វែងរកដំណោះស្រាយក្នុងអាជីវកម្មត្រូវបានគេ អនុវត្តតាមជំហានទាំង១០ ខាងក្រោមនេះ៖

១) រកឲ្យឃើញបញ្ហាដែលកើតមានឡើង

តើអ្វីទៅជាបញ្ហានៅក្នុងអាជីវកម្មរបស់អ្នក? នេះជាសំនួរមួយដើម្បីបញ្ជាក់ថា អ្នកពិតជាដឹងខ្លួនឯងថា ខ្លួនកំពុងប្រឈមមុខទៅនឹងបញ្ហាមួយពិតប្រាកដដែលមិនទាន់ដោះស្រាយ នៅឡើយ។ ជាទូទៅ អាជីវកម្មដែលបរាជ័យ ភាគច្រើនកើតឡើងដោយសារតែប្រព័ន្ធគ្រប់គ្រងបានមើលរំលងបញ្ហាមួយ ចំនួន។ ជំហានដំបូងនៅពេលនេះគឺអ្នកត្រូវដឹងថា បញ្ហាពិតជាមាន ហើយដំណោះស្រាយមួយក៏ត្រូវដាក់ចេញជាក្រោយផងដែរ។

…ហេតុអ្វីបានជាអតិថិជនត្រូវជ្រើសរើសអ្នក តែមិនមែនជាគូប្រជែងរបស់អ្នក?…

២) កំណត់មូលហេតុនៃបញ្ហា

តើអ្វីទៅជាមូលហេតុនាំឲ្យកើតមានបញ្ហានេះឡើង? បន្ទាប់ពីបានរកឃើញបញ្ហាហើយនោះ ជំហានបន្ទាប់គឺជាដំណាក់កាលមួយដែលអ្នកត្រូវដឹងពីមូលហេតុដែលនាំ ឲ្យបញ្ហាអាជីវកម្មរបស់អ្នកកើតមានឡើង។ អ្នកត្រូវប្រកាន់គោលការណ៍មួយថា មានហេតុ ទើបមានផលជាក្រោយ ហេតុដូច្នេះបញ្ហាក្នុងអាជីវកម្មក៏មានហេតុរបស់វាដែរ។ នៅពេលដែលអ្នកអាចជីកកកាយឫសគល់នៃមូលហេតុនៃបញ្ហាអាជីវកម្មបាន ហើយនោះ មានន័យថា អ្នកក៏អាចដឹងពីដំណោះស្រាយដើម្បីត្រៀមទប់ស្កាត់បញ្ហានោះបាន ដែរ។

៣) ជឿជាក់ថា ដំណោះស្រាយពិតជាមាន

បញ្ហា និង ឫសគល់នៃបញ្ហា អ្នកអាចកំណត់បានអស់ហើយ ហើយអ្វីដែលជាជំហានបន្ទាប់នោះគឺ ការស្វែងរកដំណោះស្រាយយ៉ាងមានប្រសិទ្ធភាពមួយលើបញ្ហានោះ។ នេះអាចជារឿងលំបាកសម្រាប់អ្នកក្នុងការស្វែងរកវាឡើង តែអ្វីដែលចាំបាច់នោះគឺអ្នកត្រូវជឿជាក់ថា រាល់បញ្ហាសុទ្ធតែមានដំណោះស្រាយទាំងអស់។ នៅពេលដែលអ្នកដាក់ជំនឿនេះហើយ មិនយូរមិនឆាប់ដំណោះស្រាយដ៏មានប្រសិទ្ធភាពមួយពិតជាមានជាក់ជាមិនខាន ហើយបញ្ហានោះនឹងរលត់ទៅវិញក្នុងរយៈណាមួយ។

…តើធ្វើយ៉ាងណាទើបអាចកសាងកេរ្តិ៍ឈ្មោះរបស់អ្នកឲ្យល្បីនៅក្នុងវិស័យជំនួញ?…

៤) ដាក់បញ្ហាឲ្យសមាជិកក្នុងក្រុមពិភាក្សាស្វែងរកដំណោះស្រាយ

វាមិនមែនជាអ្វីដែលគួរឲ្យព្រួយបារម្ភនោះឡើយ បើបញ្ហានេះគ្រាន់តែជារឿងមួយតូចតាចដែលអ្នកអាចដោះស្រាយដោយខ្លួន ឯងបាន។ ទោះបីជាយ៉ាងណាក៏ដោយ បើបញ្ហានោះមានលក្ខណៈធ្ងន់ធ្ងរ អ្នកចាំបាច់ត្រូវស្វែងរកជំនួយពីក្រុមការងារស្វែងរកដំណោះស្រាយ ត្បិតអី ក្រុមការងារដ៏រឹងមាំអាចមានយុទ្ធសាស្ត្រ និង គំនិតល្អៗច្រើនបង្កើតជាជម្រើសដ៏សមស្របណាមួយសម្រាប់អ្នកធ្វើការ សម្រេចចិត្តដោះស្រាយលើបញ្ហានោះ។

៥) សាកល្បងស្វែងរកដំណោះស្រាយដោយខ្លួនឯង

ទន្ទឹមនឹងការស្នើសុំជំនួយពីសមាជិកក្នុងក្រុមការងារជួយស្វែងរក ដំណោះស្រាយឲ្យអ្នក អ្នកក៏ត្រូវគិតរិះរកយុទ្ធសាស្ត្រ ឬ គន្លឹះដោះស្រាយបញ្ហាឲ្យបានច្រើនដោយខ្លួនឯងផងដែរតាមលទ្ធភាព ដែលអាចធ្វើបាន។ ចំណាយពេលវេលាដ៏ស្ងប់ស្ងាត់នៅកន្លែងដ៏សមគួរមួយអាចជួយឲ្យ អ្នកស្វែងរកដំណោះស្រាយយ៉ាងមានប្រសិទ្ធភាពបាននិង ប្រកបដោយភាពច្នៃប្រឌិតទៀតផង ត្បិតអីពេលខ្លះការចំណាយពេលវេលាគិតនៅកន្លែងស្ងប់ស្ងាត់ ដំណោះស្រាយអាចផុសចេញឡើងទាំងមិនដឹងខ្លួន។

…ក្រុមហ៊ុន Khmer Real Estate ផ្ដល់មូលនិធិពី ៣០០០$-៥០០០$ សម្រាប់យុវជនមានមហិច្ឆតាបង្កើតអាជីវកម្ម!…

៦) កត់ត្រាទុកលទ្ធភាពដំណោះស្រាយនីមួយៗ

បន្ទាប់ពីអ្នករិះរកមធ្យោបាយ ឬ គន្លឹះដោះស្រាយផ្សេងៗបានច្រើនដោយខ្លួនអ្នកផ្ទាល់ហើយនោះ អ្នកត្រូវចាប់ផ្តើមកត់ត្រាទុកគន្លឹះទាំងនោះដែលអ្នកជឿជាក់ថា អាចមានលទ្ធភាពដោះស្រាយបញ្ហានោះបានឲ្យបានតាមលំដាប់លំដោយ និង ត្រឹមត្រូវផងដែរ។ យ៉ាងណាមិញ អ្នកមិនត្រូវប្រញាប់ប្រញាល់ធ្វើឲ្យដំណោះស្រាយរបស់អ្នកកើតចេញ ជាសកម្មភាពភ្លាមៗនោះឡើយ ពោលគឺគ្រាន់តែព្រាងទុកនៅក្នុងក្រដាសតែប៉ុណ្ណោះ ដើម្បីយកទៅផ្ទៀងផ្ទាត់ជាមួយដំណោះស្រាយរបស់សមាជិកក្នុងក្រុម ដែលមាននៅជំហានទីបន្ទាប់នេះ។

៧) ផ្ទៀងផ្ទាត់លទ្ធផលដំណោះស្រាយរបស់អ្នកជាមួយសមាជិកក្នុងក្រុម

បន្ទាប់ពីបានចំណាយពេលរៀងៗខ្លួនស្វែងរកដំណោះស្រាយដែលកំពុង ប្រឈមមុខ ឥឡូវនេះដល់ពេលដែលអ្នកត្រូវលើកឡើងពីដំណោះស្រាយរបស់អ្នកទៅ សមាជិកក្នុងក្រុមឲ្យស្វែងយល់ទាំងអស់គ្នា។ បន្ទាប់មក អ្នកត្រូវស្នើសុំឲ្យសមាជិកនីមួយៗលើកទស្សន ឬ គំនិតយោបល់របស់ខ្លួនដើម្បីរកឲ្យឃើញពីយុទ្ធសាស្ត្រដ៏ល្អមួយជា គន្លឹះដោះស្រាយបញ្ហានោះមុនសម្រេចចិត្តជាផ្លូវការ។ សកម្មភាពនេះមានប្រយោជន៍ខ្លាំងណាស់សម្រាប់អាជីវកម្ម ព្រោះថា វាអាចកសាងក្រុមការងារឲ្យរឹងមាំបានដែលនេះហើយធ្វើឲ្យអាជីវកម្ម របស់អ្នកបោះជំហានទៅមុខយ៉ាងរស់រវើក។

…ដំបូន្មានដ៏មានតម្លៃរបស់ស្ថាបនិកក្រុមហ៊ុនល្បីៗ៥ រូបពីយុទ្ធសាស្រ្តធ្វើអាជីវកម្ម…

៨) ចាប់ផ្តើមកត់ត្រាទុកដំណោះស្រាយនីមួយៗដែលបានលើកឡើង

ក្នុងអំឡុងពេលដែលក្រុមការងារកំពុងលើកឡើងពីមតិយោបល់ដែលជា យុទ្ធសាស្ត្រដោះស្រាយបញ្ហានោះ អ្នកក៏មិនត្រូវភ្លេចទាញក្រដាសកត់ត្រាចំណុចសំខាន់ៗនៃមតិយោបល់ ទាំងនោះ ហើយចាប់ផ្តើមប្រៀបធៀបពីមួយទៅមួយ ដើម្បីរកឲ្យឃើញថា តើដំណោះស្រាយណាមួយល្អបំផុតសម្រាប់អ្នក។ នេះជាវិធីសាស្ត្រមួយដើម្បីធ្វើឲ្យអ្នកប្រាកដថា មានតែជម្រើសដ៏ល្អមួយប៉ុណ្ណោះដែលត្រូវបានអនុវត្ត។

៩) ចាប់ផ្តើមធ្វើការសម្រេចចិត្ត

បន្ទាប់ពីបានស្តាប់ និង ថ្លឹងថ្លែងគ្រប់ជ្រុងជ្រោយលើដំណោះស្រាយនានាពីក្រុមការងារ នេះដល់ពេលដែលអ្នកត្រូវសម្រេចចិត្តយ៉ាងឆាប់រហ័សក្នុងការ ជ្រើសរើសដំណោះស្រាយដ៏ល្អមួយយកមកអនុវត្តមុននឹងបញ្ហារាលដាល កាន់តែធំ។ អ្នកគឺជាសហគ្រិន ជាអ្នកដែលគ្រប់គ្រងលើជោគវាសនារបស់ក្រុមហ៊ុន ហេតុដូច្នេះការសម្រេចចិត្តក្នុងពេលនេះគឺជាតួនាទីរបស់អ្នកដោយ ការទទួលខុសត្រូវ។

…តើអ្វីទៅជាលក្ខណៈខុសគ្នារវាង អាជីវករខ្នាតតូច និងសហគ្រិន?…

១០) អនុវត្តការសម្រេចចិត្តនោះ និង ទទួលស្គាល់លទ្ធផលដែលកើតមានឡើង

ការសម្រេចចិត្តរបស់អ្នកមានរួចហើយ ដូច្នេះនៅពេលនេះវានៅរង់ចាំតែការអនុវត្តរបស់អ្នកតែប៉ុណ្ណោះ។ អ្នកត្រូវបប្រើប្រាស់ធនធាននានាដែលជាមធ្យោបាយគាំទ្រដល់ការ សម្រេចចិត្តនោះ ឆ្លើយតបទៅនឹងបញ្ហាដែលកំពុងកើតមាន។ ប៉ុន្តែនៅមានសំនួរមួយទៀតដែលអ្នកត្រូវឆ្លើយនោះគឺ តើអ្នកបានត្រៀមខ្លួនទទួលយកលទ្ធផលក្រោយពីការសម្រេចចិត្តរបស់អ្នក ហើយឬនៅ?

លទ្ធផលពីរត្រូវតែកើតមាននៅពេលនេះ ពោលដំណោះស្រាយបញ្ហានោះអាចទទួលបានលទ្ធផលជាវិជ្ជមាន ឬ អវិជ្ជមាន។ ទោះបីជាយ៉ាងណាក៏ដោយ អ្នកត្រូវតែទទួលយកលទ្ធផលទាំងពីរនេះដោយការទទួលខុសត្រូវ ត្បិតអីមនុស្សភាគច្រើនបានគេចវេស និង ភ័យខ្លាចទៅនឹងលទ្ធផលអវិជ្ជមាន។ សម្រាប់អ្នកវិញ ក្នុងនាមជាសហគ្រិន អ្នកមិនត្រូវបដិសេធន៍ទំនួលខុសត្រូវរបស់ខ្លួនក្នុងនាមជាអ្នក ដឹកនាំនៅក្នុងក្រុមហ៊ុននោះឡើយ ព្រោះថាការហ៊ានប្រឈមមុខទៅនឹងការបរាជ័យក្នុងអាជីវកម្មនេះហើយ ដែលជាគន្លឹះធ្វើឲ្យអ្នកក្លាយជាសហគ្រិនជោគជ័យបាននៅថ្ងៃ ខាងមុខ៕

TheBNEWS នឹងចេញផ្សាយសៀវភៅមួយក្បាលមានឈ្មោះថា “ឈ្នះល្បែងអាជីវកម្ម” ឬ “Winning the Game of Business” នៅពេលឆាប់ៗខាងមុខនេះ។ សៀវភៅនេះនឹងចែកជូនដោយឥតគិតថ្លៃដល់ប្រិយមិត្ត១០០នាក់ដំបូង ដែលបានផ្ញើអ៊ីមែលរបស់ខ្លួនមកកាន់ប្រអប់ទទួលសារ (inbox) facebook របស់ TheBNEWS! សូមប្រញាប់រួសរាន់ឡើង ហើយសូមជួយចែករំលែកព័ត៌មាននេះផងណា! សូមអរគុណ!

ប្រែសម្រួល៖ ខេវិន

ប្រភព៖ mytopbusinessideas

ចង់សម្រេចចិត្តប្រកបដោយប្រសិទ្ធភាព គន្លឹះទាំង៤នេះអាចជួយអ្នកបាន!

មុន ពេលចេញជាសកម្មភាពអ្វីមួយ មនុស្សគ្រប់គ្នាតែងធ្វើការសម្រេចចិត្ត។ ការសម្រេចចិត្តខុស ធ្វើឲ្យសកម្មភាពដែលអ្នកធ្វើនោះខុស តែបើការសម្រេចចិត្តត្រូវវិញ សកម្មភាពដែលអ្នកធ្វើនោះ ប្រាកដជាចេញជាលទ្ធផលវិជ្ជមាន។ ដូច្នេះការសម្រេចចិត្តពិតជា មានសារៈសំខាន់ខ្លាំងណាស់ សម្រាប់មនុស្សគ្រប់គ្នា ជាពិសេស ក្នុងនាមជាអ្នកដឹកនាំតែម្តង។ ដូច្នេះ មុនពេលធ្វើការសម្រេចចិត្ត អ្នកត្រូវតែគិតគូរឲ្យបានល្អិតល្អន់ជាទីបំផុត ដើម្បីជៀសវាងបញ្ហាផ្សេងៗ។

ខាងក្រោមនេះជាគន្លឹះសំខាន់ៗដែលជួយឲ្យអ្នកធ្វើការសម្រេចចិត្តប្រកបដោយប្រសិទ្ធភាព៖

១) សរសេរជម្រើសទាំងអស់ ដើម្បីប្រៀបធៀប (Write all your options for comparing )

ជាធម្មតាទេ ដើម្បីមុនពេលសម្រេចចិត្តធ្វើអ្វីមួយ អ្នកគួរតែបង្កើតជម្រើសឲ្យបានច្រើនសិន។ ការបង្កើតជម្រើសឲ្យបានច្រើននេះ អាចជួយឲ្យអ្នកមានលទ្ធភាពគ្រប់គ្រាន់ក្នុងការគិតគូរ និង ប្រៀបធៀបរកមើលថា មួយណាល្អជាងគេ បន្ទាប់មកធ្វើការសម្រេចចិត្តធ្វើវាតែម្តង។

…ទម្លាប់អាក្រក់ទាំង៣នេះ មិនអាចធ្វើឲ្យអ្នកបញ្ចេញសក្ដានុពលឲ្យអស់ពីខ្លួននៅកន្លែងការងារបានឡើយ!…

២) បញ្ឈប់ការស្វែងរកភាពល្អឥតខ្ចោះ (Stop seeking perfection) 

ការគិតគូរពិចារណាវែងឆ្ងាយ គឺពិតជាសំខាន់ក្នុងការសម្រេចចិត្តប្រកបដោយផលវិជ្ជមាន ប៉ុន្តែបើអ្នកសញ្ជឹងគិតដោយព្យាយាមរកឲ្យឃើញភាពល្អឥតខ្ចោះនោះ ក៏មិនអាចទៅរួចដែរ ព្រោះក្នុងលោកនោះ គ្មានរឿងបែបនេះឡើយ ហើយជាធម្មតាទេ វាតែងតែមានបញ្ហាខ្លះៗដែលមិនអាចជៀសរួច។ បើអ្នកចាំទាល់តែរកឃើញថា អ្វីៗល្អឥតខ្ចោះសិនទើបសម្រេចចិត្តនោះ វាអាចធ្វើឲ្យមានការយឺតយ៉ាវក្នុងការដាក់ចេញជាផែនការ ឬ សកម្មភាពការងារផ្សេងៗ។ អ្វីដែលសំខាន់ត្រង់ចំណុចនេះ គឺ គ្រាន់តែព្យាយាមគិតឲ្យបានម៉ត់ចត់ ហើយធ្វើការសម្រេចចិត្តជាមួយនឹងទំនួលខុសត្រូវខ្ពស់ នោះអាចនិយាយបានថា វាគឺជារឿងដ៏ប្រសើរមួយ។

…គន្លឹះសំខាន់ទាំង ៥យ៉ាងដែលអ្នកអាចរៀនសូត្រពីភាពជោគជ័យរបស់ក្រុមហ៊ុន Google…

៣) ត្រូវមានភាពឯករាជ្យលើខ្លួនឯង (Be independent)

ភាពឯករាជ្យ ពិតជាមានសារៈសំខាន់ណាស់សម្រាប់មនុស្សម្នាក់ ព្រោះបើគ្មានភាពឯករាជ្យទេ ពួកគេមិនអាចធ្វើអ្វីដែលពួកគេចង់ធ្វើនោះឡើយ។ ដូច្នេះ ដើម្បីធ្វើការសម្រេចចិត្តប្រកបដោយប្រសិទ្ធភាពខ្ពស់នោះ អ្នកត្រូវតែមានភាពម្ចាស់ការលើខ្លួនឯង ពោលគឺ ត្រូវធ្វើអ្វីដែលខ្លួនពេញចិត្ត ជាជាងធ្វើទៅតាមការបញ្ចុះបញ្ចូលរបស់អ្នកដទៃ។ មិនមែនមានន័យថា អ្នកមិនស្តាប់អ្នកដទៃនោះទេ ប៉ុន្តែអ្វីដែលសំខាន់នោះ គឺអ្នកត្រូវមានជំហរច្បាស់លាស់ និង ស្គាល់យ៉ាងច្បាស់ពីគោលបំណងរបស់ខ្លួន ដើម្បីជៀសវាងធ្វើអ្វីៗទៅតាមតែគេ។

…ដើម្បីរកស៊ីជាមួយមិត្តភក្ដិប្រកបដោយជោគជ័យ ត្រូវមាន៤ចំណុចនេះ!…

៤) ចេះទទួលស្គាល់កំហុស (Admit your mistakes)

គ្មាននរណាម្នាក់មិនធ្លាប់សាងកំហុសនោះទេ តែអ្វីដែលសំខាន់នោះ ថាតើចេះទទួលស្គាល់កំហុសនោះឬអត់។ ការទទួលស្គាល់កំហុស មានន័យថា អ្នកបានទទួលស្គាល់ថា វិធីដែលធ្វើកន្លងមកគឺមានបញ្ហា ដូច្នេះ ត្រូវការផ្លាស់ប្ដូរ ដើម្បីធ្វើឲ្យស្ថានការណ៍ប្រសើរឡើងវិញ។ ដូច្នេះ ការទទួលស្គាល់កំហុស អាចធ្វើឲ្យការសម្រេចចិត្តរបស់អ្នកល្អជាងមុន៕

…៤ចំណុចសំខាន់នេះ គ្រប់គ្រាន់នឹងបង្ហាញថា អ្នកជាបុគ្គលិកអាក្រក់!…

ប្រែសម្រួល៖ រស្មី

ប្រភព៖ Entrepheneur

...CAM-ASEAN បណ្តុះបណ្តាលភាសាអង់គ្លេស និងជំនាញសម្រាប់ត្រៀមចូលសហគមន៍អាស៊ាន!...

Tuesday, September 15, 2015

ធានាថាលោកអ្នកសល់ប្រាក់ច្រើន ប្រសិនបើអនុវត្តតាមដំបូន្មាន៨យ៉ាងបានសម្រេច !

ទ្រឹស្ដី មួយដើម្បីក្លាយខ្លួនជាអ្នកដែលសល់ប្រាក់ច្រើន គឺព្យាយាមធ្វើអតិបរមាកម្មលើប្រាក់ចំណេញ និងធ្វើអប្បបរមាកម្មលើប្រាក់ចំណាយ (try to maximize your income, and minimize your expense) ឬនិយាយឲ្យស្រួលស្ដាប់ជាងនេះថា ប្រឹងរកប្រាក់ ហើយរិះថាំ ខំសន្សំ។

ក្រៅពីនោះ ក៏មានពាក្យមួយតំណាលថា «សម្បូរទ្រព្យ – rich» និង «សម្បូរប្រាក់ – wealthy» មិនដូចគ្នាទេ។ ពាក្យថា «សម្បូរប្រាក់» មានន័យថាប្រាក់សម្បូរហូរហៀរ ប្រាក់ចាយមិនចេះស្កាលដូចពាក្យសំនួនរបស់ខ្មែរថា «ហែកដំបូលចាក់» មានន័យថាលុយសម្បូរខ្លាំងពេក ដល់ថ្នាក់ចាក់លុយចូលក្នុងផ្ទះតាមដំបូលផ្ទះតែម្ដង។

មួយវិញទៀត ពាក្យថា «ពូកែរកលុយ» និងពាក្យ «ពូកែសន្សំលុយ» ក៏ខុសគ្នាដែរ។ លោកអ្នកប្រហែលជាធ្លាប់ឮពាក្យ «ក្លាយជាអ្នកមានឆាប់ទេ តែបើចង់រក្សាប្រាក់ឲ្យនៅសល់យូរអង្វែងកុំឲ្យខ្វះចាយទៅថ្ងៃ ក្រោយ ជារឿងមិនងាយស្រួលឡើយ» ។

អ្នកដែលចង់ «សល់លុយច្រើន» យល់ថាគេអាចប្រើសាច់ប្រាក់ ដើម្បីបង្កើនសាច់ប្រាក់ ពោលគឺត្រូវធ្វើឲ្យសាច់ប្រាក់មានលំហូរជានិច្ច មិនឲ្យវានៅស្ងៀមទេ។ ពួកគេយល់អំពីតម្លៃប្រាក់ និងចំណាយត្រូវខ្ទង់ ហើយប្រាក់នឹងឲ្យពរឲ្យជ័យត្រឡប់ទៅគេវិញ តែប្រសិនបើលោកអ្នកមើលងាយប្រាក់ដោយចាយប្រាក់ខ្ជះខ្ជាយ ប្រាក់នឹងឲ្យទុក្ខទោសទៅលោកអ្នកវិញដែរ។

ខាងក្រោមនេះ ជាប្រការ ៨យ៉ាងដែលលោកអ្នក ប្រសិនប្រាថ្នាចង់ «សម្បូរប្រាក់» ត្រូវជៀសវាងព្រោះសុទ្ធសឹងជាកំហុស។

…សញ្ញាណសំខាន់ៗទាំង១០ បង្ហាញពីភាពខុសគ្នារវាងបុគ្គលជោគជ័យ និងបុគ្គលបរាជ័យ!…

១-លោភខាងទ្រព្យសម្បត្តិ:កាលណាលោកអ្នកចង់បាន ផាសុកភាពហើយ ចង់ធ្វើអ្វី ចង់បានអ្វីដែលស្រួលៗ រកតែស្រណុក រកតែស្រួល វាជាការដើរច្រាសទិសគ្នា មិនឲ្យលោកអ្នកទុកដាក់ប្រាក់កាសឲ្យគង់វង្សបានទេ ហើយវាជាបច្ច័យអាក្រក់បំផុតក្នុងបញ្ហាលុយកាក់។ លោកអ្នកដែលលោភខាងទិញរបស់ប្រើប្រាស់ គឺស្ថិតក្នុងចំពូក «អ្នកវណ្ណៈកណ្ដាល -middle class»។

ផ្ទុយពីនេះ «អ្នកសម្បូរប្រាក់ -the wealth» លោភខាងសេរីភាព និងលោភខាងកើបលុយទុក យូរៗទៅ ប្រាក់លែងអាស្រ័យតែលើកិច្ចខិតខំ (efforts) របស់គេតែមួយមុខទៀតហើយ តែអាស្រ័យលើកត្តាដទៃទៀត។ មនុស្សចំពូកនេះ លោភតែខាងប្រាក់ និងសេរីភាព រីឯរបស់របរប្រើប្រាស់មិនមែនជាមុខសញ្ញាដែលគេត្រូវយកចិត្តទុក ដាក់នោះទេ។

២-ជៀសវាងការរកស៊ីហក់លោត: គួរជៀសវាងការផ្លាស់ប្ដូរមុខរបរញឹកញាប់ (diversificaton) ព្រោះការរកស៊ីហក់លោត ពិបាកជោគជ័យណាស់ ពោលគឺបន្តិចរកស៊ីនេះ មិនបានប៉ុន្មានផង ដូរមុខរបរទៅរកស៊ីអ្វីផ្សេង។

…ជំនាញអាជីវកម្មសំខាន់ៗទាំង៧ ដែលសហគ្រិនគួររៀនពីមេធាវី…

លោក Mark Cubanជាធុរជនដ៏ឆ្នើមមួយរូប ឲ្យដំបូន្មានថា «បើរកស៊ីអ្វី ឲ្យចំជារកស៊ីហ្នឹង ប្រសើរជាងរកស៊ីហក់លោត»។ ប្រសិនបើ លោកអ្នកចង់ចូលក្នុងចំពូក «អ្នកសម្បូរប្រាក់» ត្រូវសម្លឹងមើលឱកាសវិនិយោគឲ្យត្រូវ ហើយតម្រង់ទិសទៅតែមុខព្រួញនោះតែមួយ ពិតជាមិនខុសទេ។

៣-កុំពឹងលើប្រភពចំណូលតែមួយ (រកស៊ីងាប់ក្រឡា):លោក អ្នកគួរកុំពឹងទៅលើប្រភពចំណូលតែមួយ មិនថាលោកអ្នករកចំណូលមួយមុខនោះបានច្រើនប៉ុណ្ណាទេ ព្រោះធ្វើបែបនេះមិនខុសពីពាក្យខ្មែរថា «រកស៊ីងាប់ក្រឡា»។ មានករណី នារីម្នាក់ធ្វើការឲ្យគេតែមួយមុខ មិនមានមុខរបរផ្សេងទេ មានន័យថាគាត់ពឹងតែលើប្រាក់ខែមួយមុខ ស្រាប់តែថ្ងៃមួយ ក្រុមហ៊ុនបញ្ឈប់នាងពីការងារ បណ្ដាលឲ្យប្រភពចំណូលរបស់នាងត្រូវកាត់ផ្ដាច់ដូចគេកាត់ផ្ដាច់ សរសៃឈាមដូច្នោះដែរ ព្រោះអាងតែលើប្រាក់ខៃតែមួយមុខ មិនរកស៊ីអ្វីផ្សេង ដើម្បីគួបផ្សំគ្នា។

ប្រការសំខាន់គឺលោកអ្នកពុំគួរទុកសាច់ប្រាក់ឲ្យនៅទំនេរទេ ត្រូវបោះទុនរកស៊ីលើវិស័យអ្វីផ្សេង ដើម្បីបង្កើតចំណូលផ្សំគ្នា នេះបន្តិចនោះបន្តិច។ នេះគេមិនហៅថា «រកស៊ីហក់លោត ឬដូរមុខរបរ – diversification» ទេ តែជា «ការពង្រីកមុខរបរ – fortification»។

…សៀវភៅបីក្បាលដែលល្អបំផុតសម្រាប់សហគ្រិននារីៗ!…

៤-កុំមើលបំណាំគ្នា(កុំគិតអំពីគេ គិតអំពីខ្លួនឯង): ប្រសិនបើលោកអ្នករវល់តែធៀបខ្លួនឯងជាមួយអ្នកដទៃ រកកំណើតមានមិនឃើញទេ ព្រោះការប្រៀបធៀបគ្នាបែបនេះ បើរស់នៅក្នុងបរិស្ថានមិនប្រកួតប្រជែង ធ្វើឲ្យមនុស្សមិនសូវខំប្រឹង ព្រោះរវល់តែមើលគេ ប្រសិនបើគេមិនសូវប្រឹង ឯងមិនសូវប្រឹងដែរ យូរទៅ លែងចង់មានចង់បាន។ ដូចនេះ គួរកុំខ្វល់រឿងគេ គិតតែពីរឿងខ្លួនឯងវិញ ល្អជាង។

៥-រកស៊ី ត្រូវចេះមើលកាលៈទេសៈ ចូរលោកអ្នកកុំរកស៊ីលើបច្ចេកវិទ្យាទំនើបចុងក្រោយ និងធំៗពេកព្រោះជួនកាលយើងតាមគេមិនទាន់ទេ គេចេញស៊េរីថ្មីៗ ឯងនៅលក់ផលិតផលចាស់មិនទាន់អស់ផង ដូច្នេះទំនិញទាំងនោះ បានត្រឹមមួយឆាវប៉ុណ្ណោះ រួចហើយឆាប់សាបទៅវិញ។ លោក Warren Buffett រកស៊ីខាងវិស័យអគ្គិសនី សំណង់ស្ពានថ្នល់ ធនាគារ ធានារ៉ាប់រង ភេសជ្ជៈ អាហារ ស្ករគ្រាប់។

លោកអ្នកគួររកស៊ីមុខរបរណា ផលិតផលណា ដែលគេនិយមប្រើប្រាស់យូរអង្វែង មិនចេះសាបរលាប។

៦-កុំឆាប់ជឿគេអស់ពីពោះពេកៈ អស់លោក លោកស្រីខ្លះ ជឿជាក់លើគេពេក ពោលគឺជឿអស់ពីពោះ ឬជឿផ្កាប់មុខតែម្ដង ដោយសារសេចក្ដីឆោតល្ងង់ ឬដោយសារមនោសញ្ចេតនាពេញចិត្តពេញថ្លើមចំពោះគេ។ នេះជាកំហុសឆ្គងដ៏ធំនៅក្នុងមុខជំនួញ។

…វិធីសាស្ត្រ ៩យ៉ាង ដើម្បីបញ្ចុះបញ្ចូលអតិថិជនគ្រាក់ៗឱ្យទិញផលិតផលរបស់អ្នក!…

ត្រូវចាំថានៅក្នុងលោកនេះ ល្បិចកលមនុស្សរាប់រយជំពូក មិនអាចជឿទុកចិត្តគេទាំងស្រុងទេ មុននឹងយល់ព្រមចុះហត្ថលេខាលើលិខិតស្នាមអ្វីមួយ មុននឹងប្រគល់ប្រាក់ដើម្បីវិនិយោគលើគម្រោងអ្វីមួយ តោងលោកអ្នកពិនិត្យពិច័យឲ្យបានល្អិតល្អន់បំផុត ពុំនោះទេ នឹងត្រូវខាតបង់ប្រាក់ទាំងដុំៗអសារឥតការជាមិនខាន។

និយាយនេះមិនមែនជំរុញឲ្យលោកអ្នកគិតតែពីសង្ស័យអ្នកដទៃនោះទេ តែលោកអ្នកត្រូវឆ្លាតវៃបន្តិច ដើម្បីទប់ទល់នឹងមនុស្សខូច ដើរបោកប្រាស់គេ។ សព្វថ្ងៃមានករណីមនុស្សចេះល្បិចថតចម្លងប័ណ្ណកម្មសិទ្ធិដីធ្លី ផ្ទះសម្បែងឬធ្វើប្លង់ដីប្លង់ផ្ទះក្លែងក្លាយ មិនចេះតិច ហើយយកទៅបញ្ចាំច្រើនកន្លែង (ផ្ទះតែមួយកន្លែង ដីតែមួយកន្លែង ធ្វើប្លង់ក្លែងក្លាយបួនប្រាំ ដើរដាក់បញ្ចាំ ដើម្បីបោកប្រាស់លុយគេ)។ នេះជាឧទាហរណ៍ដែលកើតមានពិតៗនៅក្នុងសង្គម ដូចនេះមុននឹងរកស៊ីត្រូវតាមដានស្រាវជ្រាវឲ្យល្អិតល្អន់។

៧-ដាក់ប្រាក់ក្នុងធនាគារ ដើម្បីចំណេញការប្រាក់់ៈ ប្រសិនបើលោកអ្នកត្រឹមតែរកលុយមកទុក មិនទាន់ចាត់ចូលក្នុងចំពូក «មនុស្សពូកែសន្សំប្រាក់» ទេ។ យកល្អយកប្រាក់ទៅផ្ញើនៅធនាគារ ដើម្បីបានការប្រាក់ស៊ី ទោះតិចក្ដីច្រើនក្ដី គ្រាន់បើជាងទុកប្រាក់នៅក្នុងផ្ទះ នាំប្រឈមនឹងហានិភ័យ។

ប្រការសំខាន់ លោកអ្នកគួរផ្អឹបសាច់ប្រាក់ខ្លួនឯងនៅក្នុងខ្ទង់គណនីដែលមិនបង្ក លក្ខណៈងាយស្រួលឲ្យលោកអ្នកដកប្រាក់ស្រេចតែនឹងចិត្តនោះទេ ព្រោះបើមិនដូច្នេះទេ លោកអ្នកចេះតែចង់ចំណាយប្រាក់ ទោះកាន់ក្រដាសប្រាក់ កាន់មូលប្បទានប័ត្រ កាន់វីហ្សាកាត ឬអ្វីក៏ដោយ ឲ្យតែអាចទូទាត់ជាប្រាក់បាន ដឹងតែពីចង់ចំណាយ។ ដូចនេះ ត្រូវជ្រើសរើសប្រភេទគណនីដែលបង្កកប្រាក់ដើមទុក ដើម្បីកុំឲ្យលោកអ្នកចេះតែចង់ដកប្រាក់ពីធនាគារមកចាយផ្ដេសផ្ដាស។

…បុគ្គល ១០រូបមានប្រវត្តិជាទុគ៌តជន តែបានអភិវឌ្ឍខ្លួនជាបុគ្គលឆ្នើម និងល្បីល្បាញទូទាំងពិភពលោក!…

៨-មានលុយនៅមិនសុខ ចង់តែចំណាយលុយៈ ពេលអ្នកមានទ្រព្យធនសម្បូរហូរហៀរ ពួកគេចាប់ផ្ដើមចាយលុយដូចក្រដាស ពោលគឺចាយខ្ជះខ្ជាយខុសខ្ទង់ លើរបស់ដែលមិនចាំបាច់។ លោកអ្នកខ្លះដែលមានប្រាក់ក្នុងខ្លួន ដឹងតែពីនៅមិនសុខ ចង់តែចំណាយ ទិញនេះទិញនោះ មិនចេះអស់រឿងទិញ។

ប្រសិនបើទិញរបស់របរដើម្បីត្រឹមបង្អួត ឬសម្ញែងអ្នកដទៃប៉ុណ្ណឹងទេ គួរកុំធ្វើបែបនេះអីល្អជាង ព្រោះគេបានត្រឹមសរសើរមួយភ្លែត ឬមិនស្រួលដៀលលោកអ្នកវិញផង ថាចាយខ្ជះខ្ជាយ៕

ប្រែសម្រួល៖ អន សំអាង

Monday, September 14, 2015

ដើម្បីរកស៊ីជាមួយមិត្តភក្ដិប្រកបដោយជោគជ័យ ត្រូវមាន៤ចំណុចនេះ!

ការ បើកជំនួញ គឺពិតជារឿងសំខាន់ ហើយមនុស្សភាគមួយចំនួនចូលចិត្តសហការជាមួយនឹង មិត្តភ័ក្ដិរបស់ខ្លួន ព្រោះមានភាពងាយស្រួលក្នុងការដំណើរការផ្សេងៗ ដោយសារពួកគេស្គាល់គ្នាច្បាស់ទៅហើយ។

ប៉ុន្តែជំនួញជាច្រើន បានបរាជ័យទៅវិញក្រោយពេលបើកដំណើរទៅបានមួយរយៈ ដោយសារតែទុកចិត្តគ្នាជ្រុល និង មិនបានបែងចែកមុខងារឲ្យបានច្បាស់ នាំឲ្យការងារមានលក្ខណៈស្មុគស្មាញច្រើន។ អីចឹងហើយបានជា មនុស្សមួយចំនួនចូលចិត្តរកស៊ីជាមួយនឹង អ្នកដែលមិនសូវជិតស្និតខ្លាំងជាមួយគ្នា ដើម្បីជៀសវាងបញ្ហាខាងលើ។

ដូច្នេះដើម្បីបើកជំនួញជាមួយមិត្តភ័ក្ដិ ឬ សាច់ញាតិប្រកបដោយភាពជោគជ័យ អ្នកត្រូវគិតលើចំណុចខាងក្រោមឲ្យបានច្បាស់៖

១) ស្វែងរកអ្នកដែលមានគំនិតស្រដៀងគ្នា (Finding friends who have similar ideas)

ដើម្បីចាប់ផ្តើមបើកជំនួញជាមួយមិត្តភ័ក្ដិ អ្នកគួរតែព្យាយាមស្វែងរកនរណាដែលមានគំនិតស្រដៀងគ្នា និងមានសមត្ថភាពផងដែរ ដើម្បីធានាថា ការសហការគ្នានេះ ប្រកបទៅដោយប្រសិទ្ធភាព និង អាចឈានទៅរកភាពជោគជ័យ។ គ្មាននរណាម្នាក់ មានគំនិតដូចអ្នកផ្សេងទាំងស្រុងនោះទេ ប៉ុន្តែអាចមានលក្ខណៈប្រហាក់ប្រហែល ឬ ស្រដៀងគ្នា ដែលប្រការនេះនាំឲ្យពួកគេអាចងាយចុះសម្រុងគ្នាលើការសម្រេច ចិត្តក្នុងផែនការអាជីវកម្ម និង ដំណើរការនៃការងារ។

២) កុំភ្លេចធ្វើកិច្ចសន្យាឲ្យច្បាស់លាស់ (Don’t forget the Agreement)

មិត្តភក្ដិគឺជា មនុស្សដែលស្គាល់ច្បាស់អំពីអ្នក ហើយពួកគេតែងជួយដោះស្រាយបញ្ហាផ្សេងៗ តែ មនុស្សដែលអាចបោកប្រាស់អ្នកលឿនបំផុត ក៏ជាមិត្តភ័ក្ដិរបស់អ្នកផងដែរ ព្រោះម្នាក់ៗសុទ្ធតែទុកចិត្តជ្រុលទៅលើគ្នា។ បើទោះបីជា សមាជិកនៃជំនួញថ្មីនោះ គឺសុទ្ធតែជាមិត្តភ័ក្ដិនឹងគ្នាក្តី តែអ្វីដែលសំខាន់បំផុតក្នុងស្ថានភាពនេះ គឺការធ្វើកិច្ចសន្យា។ កិច្ចសន្យានេះ ត្រូវកំណត់ឲ្យបានច្បាស់ លើការបែងចែកប្រាក់ចំណេញ និង ការទទួលខុសត្រូវអ្វីខ្លះប្រសិនបើនរណាម្នាក់មិនគោរពតាមកិច្ច ព្រមព្រៀងនឹងគ្នា។ ចំណុចនេះ មើលទៅហាក់ដូចជា មិនសូវសំខាន់ ព្រោះម្នាក់ៗសុទ្ធតែជាមិត្តភ័ក្ដិនិង បានស្គាល់ចិត្តថ្លើមគ្នាយូរមកហើយ ប៉ុន្តែមានបញ្ហាជាច្រើនបានកើតឡើងទៅហើយ ព្រោះតែ ម្នាក់ៗទុកចិត្តគ្នាជ្រុលពេក ធ្វើឲ្យលទ្ធផលចុងក្រោយ ត្រូវបរាជ័យទាំងស្រុង ជាពិសេសនៅពេលមានរណាម្នាក់ មិនគោរពតាមគោលការណ៍។

៣) កំណត់តួនាទីឲ្យច្បាស់ ( Defining clearly the role of each )

ដើម្បីឲ្យការងារដំណើរការទៅដោយរលូន សមាជិកម្នាក់ៗត្រូវបែងចែក ការងារ និង តួនាទីឲ្យច្បាស់ជាទីបំផុត ដើម្បីធានាថា អ្នកមិនយករឿងមិត្តភាពឡូកឡំក្នុងការងារច្រើនពេក។ បើមិនបែងចែកឲ្យច្បាស់លាស់ អ្នកខ្លះប្រាកដជាមិនសូវយកចិត្តទុកដាក់លើប្រសិទ្ធភាពការងារ ហើយអាចធ្វើហួសដែនសមត្ថភាពការងាររបស់ខ្លួន ដោយអាងថា សមាជិកទាំងនោះគឺជាមិត្តភក្ដិ។

…ដំណើរជោគជ័យរបស់ Samsung ពីក្រុមហ៊ុនអាហារតូចមួយនៅកូរ៉េទៅជាក្រុមហ៊ុនបច្ចេកវិទ្យាយក្សក្នុងលោក!…

៤) មិត្តភាពគឺសំខាន់ជាងលុយ (Friendship is more important than money)

ថ្វីបើគោលដៅធំបំផុតក្នុងការធ្វើអាជីវកម្ម គឺដើម្បីប្រាក់ចំណេញ ប៉ុន្តែបើអ្នកគិតតែផលចំណេញខ្លាំងពេក វាធ្វើឲ្យមិត្តភាពរបស់អ្នករង្គោះរង្គើមិនខាន។ សូមកុំភ្លេចថា អាជីវកម្មរបស់អ្នកបង្កើតឡើងដោយមានការចូលរួមពីមិត្តភក្ដិ ដូច្នេះ ប្រសិនបើមិត្តភាពក្នុងក្រុមហ៊ុនបាត់បង់ វាមានន័យថា អាជីវកម្មរបស់អ្នកនឹងត្រូវបរាជ័យមិនខាននៅពេលខាងមុខ។ ត្រូវចេះអធ្យាស្រ័យ និង អត់ឱនឲ្យគ្នាទៅវិញទៅមក ពេលមានបញ្ហាកើតឡើង។ ដូច្នេះ ត្រូវគិតគូរពីមិត្តភាពជារឿងសំខាន់ តែមិនមែនមានន័យថា ដល់ថ្នាក់ហួសហេតុពេកនោះទេ ព្រោះបើហួសហេតុពេក ក៏ធ្វើឲ្យអាជីវកម្មត្រូវរលាយផងដែរ៕

Wednesday, December 16, 2015

Friday, November 13, 2015

Friday, October 16, 2015

Thursday, October 1, 2015

Wednesday, September 23, 2015

ចង់​ដោះស្រាយ​បញ្ហា​ក្នុង​អាជីវកម្ម​ឲ្យ​មាន​ប្រសិទ្ធភាព​ អនុវត្ត​​តាម​​ជំហាន​ទាំង​១០​នេះ

​ចង់​​សម្រេច​ចិត្ត​ប្រកប​ដោយ​ប្រសិទ្ធភាព​ គន្លឹះ​ទាំង៤នេះអាច​ជួយ​អ្នក​បាន!

Tuesday, September 15, 2015

ធានា​ថា​លោក​អ្នក​សល់​ប្រាក់​ច្រើន ប្រសិន​បើ​អនុវត្ត​តាម​ដំបូន្មាន​៨យ៉ាង​បាន​សម្រេច !

Monday, September 14, 2015

ដើម្បី​រកស៊ី​ជា​មួយមិត្តភក្ដិ​ប្រកប​ដោយ​ជោគជ័យ ត្រូវ​មាន៤ចំណុច​នេះ!

Cambodia News

ចង់ដោះស្រាយបញ្ហាក្នុងអាជីវកម្មឲ្យមានប្រសិទ្ធភាព អនុវត្តតាមជំហានទាំង១០នេះ

ចង់សម្រេចចិត្តប្រកបដោយប្រសិទ្ធភាព គន្លឹះទាំង៤នេះអាចជួយអ្នកបាន!

ធានាថាលោកអ្នកសល់ប្រាក់ច្រើន ប្រសិនបើអនុវត្តតាមដំបូន្មាន៨យ៉ាងបានសម្រេច !

ដើម្បីរកស៊ីជាមួយមិត្តភក្ដិប្រកបដោយជោគជ័យ ត្រូវមាន៤ចំណុចនេះ!