Cambodia News

Monday, September 14, 2015

ទ្រឹស្ដី ៥ មានតម្លៃបំផុតរបស់លោក Warren Buffett ដែលអ្នកគួររៀនសូត្រតាម

មហាសេដ្ឋីពិភពលោក Warren Buffettប្រភព៖ ctreal

ទ្រឹស្ដី ទាំង ៥ ខាងក្រោមនេះ គឺជាទ្រឹស្ដីសំខាន់ៗមានតម្លៃបំផុត ដែលលោកមហាសេដ្ឋីលំដាប់ពិភពលោកលោក Warren Buffett បានចែករំលែកដល់សហគ្រិនទូទាំងពិភពលោក។ ទ្រឹស្ដីទាំង ៥នោះគឺ៖

១) មានភាពឆ្លាតវ័យក្នុងការចាយលុយ (Spend wisely)៖ 

«បើអ្នកចំណាយលុយទិញអ្វីដែលអ្នកមិនត្រូវការ នោះឆាប់ៗអ្នកនឹងលក់របស់ដែលអ្នកត្រូវការ (If you buy things you don’t need, you will sell things you need)។ អ្នកត្រូវចាំជាដាច់ខាតអំពីរឿងនេះ»។ មានន័យ ដោយខ្លីថា អ្នកត្រូវចំណាយលុយ ទិញអ្វីដែលអ្នកត្រូវការ មិនទិញរបស់អ្នកដែលអ្នកមិនត្រូវការនោះទេ។ ធ្វើដូច្នេះ អ្នកចំណាយចំខ្ទង់ ហើយធ្វើដូច្នេះអ្នកនឹងអាចមានលុយសន្សំសម្រាប់វិនិយោគនៅថ្ងៃ ខាងមុខបានទៀតផង។

…៨ ចំណុចស្វែងយល់ពីទ្រព្យសម្បត្តិរបស់មហាសេដ្ឋីរកប្រាក់ចំណូល ៣៧ លានដុល្លារក្នុងមួយថ្ងៃ Warren Buffett…

មុននឹងទិញទំនិញអ្វី អ្នកត្រូវសួរខ្លួនឯងថា ៖ «ខ្ញុំពិតជាត្រូវការរបស់នេះមែនទេ? តើខ្ញុំកំពុងចំណាយច្រើនហើយមែនទេ? តើខ្ញុំអាចសន្សំលុយខ្លួនដោយមិនចាំបាច់ទិញរបស់ទាំងនេះបាន ទេ?»។ ត្រូវចាំសំដីរបស់លោក Warren Buffett ពីរឃ្លាទៀតគឺ៖ ១) មិនត្រូវចាយលុយឥតប្រយោជន៍ ២) កុំភ្លេចច្បាប់ទី១។

២) សន្សំសំចៃ 

«មានមនុស្សកំពុងអង្គុយជ្រកក្រោមដើមឈើថ្ងៃនេះ ដោយសារតែមានមនុស្សម្នាក់ដាំវាកាលពីប៉ុន្មានឆ្នាំមុន (Someone’s sitting in the shade today because someone planted a tree a long time ago )»។ នេះគឺជាទ្រឹស្ដីមួយទៀតរបស់មហាសេដ្ឋី Buffett។ លោកចង់មានន័យថា ការសន្សំលុយថ្ងៃនេះ មិនមែនបានផលថ្ងៃនេះនោះទេ តែវាផ្ដល់ផ្លែផ្កានៅថ្ងៃអនាគត។ អ្នកអាចប្រើវាសម្រាប់ដោះស្រាយបញ្ហាគ្រោះអាសន្នដែលអាចកើតឡើង ជាយថាហេតុ ឬអ្នកអាចប្រើប្រាស់វាដើម្បីវិនិយោគនៅខាងថ្ងៃខាងមុខ។ ប្រការសំខាន់បំផុតនោះ គឺថា ច្បាប់មួយទៀតរបស់លោក Buffett គឺ៖ មិនត្រូវសន្សំលុយសល់ពីចំណាយនោះទេ តែត្រូវសន្សំមុនការចំណាយ។

…សហគ្រិនវ័យក្មេងកំពូលៗទាំង៨រូប មានអាយុត្រឹមជាង ២០ឆ្នាំ បង្ហាញគន្លឹះធ្វើឲ្យអាជីវកម្មជោគជ័យ…

៣) គិតឱ្យបានវែងឆ្ងាយ និងត្រូវអត់ធ្មត់ (Think long-term and be patient)

លោក Warren Buffett បានលើកឡើងដូច្នេះថា ៖«មិនថាអ្នកឆ្លាត មានដុងពីកំណើត ឬប្រឹងប្រែងយ៉ាងណានោះទេ អ្វីៗគឺត្រូវការពេលវេលា។ អ្នកមិនអាចបង្កើតកូនមួយក្នុងរយៈពេលមួយខែដោយឱ្យស្ត្រី៩ នាក់ពពោះនោះទេ (Someone’s sitting in the shade today because someone planted a tree a long time ago )»។ វាមិនមែនកើតឡើងដោយឯកឯងនោះទេ។ មានពេលខ្លះអ្នកប៉ាន់ស្មានហួសពីលុយដែលអ្នករកបានក្នុងមួយ ឆ្នាំ ហើយពេលខ្លះអាចប៉ាន់ស្មានតិចពេកចំពោះលុយដែលអ្នកអាចរកបាន ក្នុងរយៈ ពេល ១០ឆ្នាំ។ អ្នកវិនិយោគ ត្រូវការរកស៊ីដោយគិតពីគូរផ្លូវវែងឆ្ងាយ ពោលគឺមិនមានចង់រកស៊ីថ្ងៃនេះ ថ្ងៃស្អែកបានចំណេញនោះទេ។ វាត្រូវការពេលវេលា។

៤) ការខ្ចីបុល (Borrowing: Limit what you borrow)

អ្នកមិនអាចក្លាយជាអ្នកមានបានជាដាច់ខាតដោយរស់វ័ណ្ឌកនឹង បំណុល។ មនុស្សមួយចំនួនតែងគិតថា ការខ្ចីបុលគឺអាចគ្រប់គ្រងបាន។ ដោយឡែក ការខ្ចីបុលគួរស្ថិតនៅក្នុងដែនកំណត់ណាមួយ ហើយការខ្ចីលុយទៀតសោតគួរតែមានគោលដៅចំណាយច្បាស់លាស់។ អ្វីដែលអ្នកគួរធ្វើនោះគឺខ្ចីលុយ ដើម្បីយកមកបង្កើតលុយ។ មុននឹងខ្ចី អ្នកត្រូវវាយតម្លៃពីលំហូរសាច់ប្រាក់ និងតម្រូវការហិរញ្ញវត្ថុផ្សេងៗនៅពេលអនាគត។ អ្នកគួរតែកំណត់ពេលវេលាជាក់លាក់សម្រាប់ខ្លួនឯងចំពោះការជំពាក់ បំណុលគេ អ្នកមិនមែនធ្វើជាខ្ញុំកញ្ជះគេរហូតនោះទេ។

…ធានាថាលោកអ្នកសល់ប្រាក់ច្រើន ប្រសិនបើអនុវត្តតាមដំបូន្មាន៨យ៉ាងបានសម្រេច!…

៥) ហានិភ័យ (Risk)៖

តាមទ្រឹស្ដីរបស់មហាសេដ្ឋីកំពូលរូបនេះ ៖ «ហានិភ័យកើតចេញពីអ្វីដែលយើងមិនដឹងអ្វីដែលខ្លួនកំពុងធ្វើ (Risk comes from not knowing what you are doing)»។ មនុស្សម្នាក់ចង់រកលុយ ហើយចង់រកឱ្យបានច្រើន និងឆាប់ៗទៀតផង អីចឹងហើយបានជាមនុស្សមួយចំនួនធំបានយកលុយយ៉ាងច្រើនទៅវិនិយោគ ដោយរំពឹងថា នឹងទទួលបានចំណូលច្រើនមកវិញ ដោយពុំបានសិក្សា និងវិភាគហានិភ័យផ្សេងៗនោះទេ។ ដូច្នេះគួរជៀសវាងបញ្ហានេះ អ្នកវិនិយោគ ក៏ដូចជាសហគ្រិនត្រូវតែសិក្សាពីហានិភ័យផ្សេងៗ ហើយគ្មានជំនាញ និងមិនដឹងពីវិធីវិភាគនោះទេ ត្រូវទៅរកសេវារបស់ក្រុមហ៊ុនប្រឹក្សាយោបល់៕

ដោយ ៖ ឬទ្ធិ

ប្រភព៖ ndtv

Wednesday, September 9, 2015

Jack Ma ប្រែក្លាយជីវិតពីគ្រូបង្រៀនអង់គ្លេស ទៅជាមហាសេដ្ឋីក្រុមហ៊ុន Alibaba មានប្រាក់រាប់ពាន់លានដុល្លារ

លោក Jack Ma ស្ថាបនិកក្រុមហ៊ុនពាណិជ្ជកម្មតាមអ៊ីនធឺណិត Alibaba

និយាយពីឈ្មោះលោក Jack Ma ប្រិយមិត្តភាគច្រើនប្រហែលជាមិនសូវស្គាល់នោះឡើយ ប៉ុន្តែបើនិយាយពីឈ្មោះក្រុមហ៊ុន Alibaba វិញ មិត្តអ្នកអានពិតជាធ្លាប់ឭឈ្មោះនេះ។ ពិតមែនហើយ Alibaba គឺជាឈ្មោះក្រុមហ៊ុនពាណិជ្ជកម្មតាមអ៊ីនធឺណិតដ៏ល្បីល្បាញ និង កំពុងឡើងកូដខ្លាំងបំផុតមួយរបស់ចិននៅក្នុងសតវត្សទី២១ នេះ។

លោក Jack Ma គឺជាមហាសេដ្ឋីចិនដ៏មានឥទ្ធិពលមួយរូប ដែលកើតនៅក្នុងឆ្នាំ១៩៦៤។ មុននឹងក្លាយជាមហាសេដ្ឋីដូចពេលបច្ចុប្បន្ន លោកគឺជាអតីតគ្រូបង្រៀនភាសាអង់គ្លេសដ៏ស្ទាត់ជំនាញមួយរូប ដែលត្រូវបានគេចាត់ទុកថា មានប្រវត្តិតស៊ូមិនធម្មតា។

ក្រោយការបញ្ចប់បរិញ្ញាប័ត្រលើឯកទេសភាសាអង់គ្លេសក្នុងឆ្នាំ ១៩៨៨ លោក Jack ត្រូវបានជ្រើសរើសជាប្រធាននិស្សិតនៃសាកលវិទ្យាល័យ Hangzhou Dianzi ដែលក្រោយមកលោកបានក្លាយជាសាស្ត្រាចារ្យលើមុខវិជ្ជាភាសា អង់គ្លេស និង ពាណិជ្ជកម្មអន្តរជាតិនៅទីនេះ។

…កំហុសធំៗទាំង៦ របស់យុវជននៅមុនអាយុ៣០…

ក្នុងឆ្នាំ១៩៩៥ លោក Jack បានបង្កើតគេហទំព័រចិន Yellowpages ដែល ត្រូវបានគេជឿជាក់ និងចាត់ទុកថា ជាក្រុមហ៊ុនតាមបណ្ដាញអ៊ីនធឺណិតលើកដំបូងរបស់ទីក្រុងប៉េកាំង។ ដោយសារតែសមត្ថភាពរបស់លោក ចាប់ពីឆ្នាំ ១៩៩៨ ដល់ឆ្នាំ ១៩៩៩ Jack ត្រូវបានជ្រើសរើសឲ្យគ្រប់គ្រងក្រុមហ៊ុនបច្ចេកវិទ្យាមួយដែលបង្កើត ឡើងដោយមជ្ឈមណ្ឌលពាណិជ្ជកម្មអេឡិចត្រូនិកអន្តរជាតិ នៃក្រសួងពាណិជ្ជកម្មអន្តរជាតិ និង កិច្ចសហប្រតិបត្តិការសេដ្ឋកិច្ចចិន។

ទីបំផុតនៅក្នុងឆ្នាំ ១៩៩៩ ក្រុមហ៊ុន Alibaba.com ត្រូវបានបង្កើតឡើងសម្រាប់ជាអាជីវកម្មពាណិជ្ជកម្មតាមអ៊ីនធឺណិត ដោយផ្តើមចេញពីដើមទុនត្រឹមតែ៦០ ០០០ដុល្លារ ប៉ុណ្ណោះជាជំនួយដែលលោកទទួលបានពីមិត្តភក្ដិ។ ១៥ ឆ្នាំក្រោយមក Alibaba បានធ្វើពាណិជ្ជកម្មនៅជាង ២០០ ប្រទេសនៅជុំវិញពិភពលោក ដែលមានសមាជិក ៧០ លាននាក់។

យោងតាមទស្សនាវដី្ត Forbes លោក Jack មានទ្រព្យសម្បត្តិប្រមាណ ១០,៥៤ ពាន់លានដុល្លារនៅ ពេលបច្ចុប្បន្ននេះ។ នៅថ្ងៃទី ១៥ មករា ឆ្នាំ ២០១៣ កន្លងទៅ លោក Jack បានលាលែងពីតំណែងជាប្រធានក្រុមហ៊ុនខាងលើមកកាន់តួនាទីជានាយក ប្រតិបត្តិវិញ។

នេះជាមោទនភាពមួយរបស់លោក Jack ដែលបានអភិវឌ្ឍជីវិតជាគ្រូបង្រៀនដ៏សាមញ្ញមួយរូប ក្លាយជាមហាសេដ្ឋីលំដាប់កំពូលរបស់ចិនលើឆាកអន្តរជាតិទាំងមិន គួរឲ្យជឿ ដែលនេះជាមូលហេតុមួយធ្វើឲ្យគេហទំព័រសេដ្ឋកិច្ច The BNEWS លើកយកដំបូន្មានសំខាន់ៗរបស់លោកសម្រាប់សហគ្រិនទូទៅស្វែងយល់ដូច ខាងក្រោមនេះ៖

១) អ្នកមិនអាចធ្វើឲ្យអ្នកដទៃមានគំនិតតែមួយបានឡើយ តែអ្នកអាចធ្វើបានតាមរយៈការដាក់គោលដៅរួមមួយ

លោក Jack បានពន្យល់ថា កុំជឿជាក់ថាអ្នកអាចធ្វើឲ្យអ្នកដទៃមានគំនិតតែមួយបានឲ្យសោះ ហើយបើអាចទៅរួចមានត្រឹមតែ ៧០ % ប៉ុណ្ណោះដែលគេជឿអ្នក។ អ្វីដែលលោកចង់បញ្ជាក់នៅទីនេះនោះគឺថា សូមកុំឲ្យបុគ្គលិកធ្វើការឲ្យអ្នក តែត្រូវឲ្យពួកគេធ្វើការស្របតាមគោលដៅរួមមួយ។

…មេរៀនលំបាកៗទាំង ៧ ដែលមនុស្សគ្រប់គ្នាគួររៀនពីភាពជោគជ័យ…

២) អ្វីទៅដែលបុគ្គលិកគ្មាន តែអ្នកដឹកនាំមាន

លោក Jack Ma បាននិយាយថា សមត្ថភាពជាបច្ចេកទេសរបស់អ្នកដឹកនាំក្រុមហ៊ុនមិនគួរយកមក ប្រៀបធៀបនឹងបុគ្គលិករបស់ខ្លួននោះឡើយ។ បុគ្គលិករបស់អ្នក ត្រូវតែជាមនុស្សដែលមានសមត្ថភាពល្អជាងអ្នក បើមិនដូច្នេះទេ មានន័យថា អ្នកបានជ្រើសរើសបុគ្គលិកខុសហើយ។ ចុះអ្វីទៅដែលអ្នកដឹកនាំត្រូវមាននៅពេលនេះ?

លោក Jack បានបន្តទៀតថា អ្វីដែលអ្នកដឹកនាំត្រូវមាន គឺទស្សនវិស័យដឹកនាំក្រុមហ៊ុន ភាពក្លាហាន និង ការតស៊ូឲ្យខ្ពស់ជាងបុគ្គលិក។ ទន្ទឹមនឹងនេះ អ្នកដឹកនាំ គឺជាមនុស្សដែលមានសមត្ថភាពដោះស្រាយបញ្ហាមួយចំនួនដែលបុគ្គលិក មិនអាចធ្វើបាន និង អាចប្រឈមមុខនឹងភាពបរាជ័យបានដោយមិនចេះរារែក។

៣) ចង់បើកអាជីវកម្ម ឬ ក្រុមហ៊ុនកុំពាក់ព័ន្ធនឹងនយោបាយ

នៅក្នុងចំណុចនេះ លោក Jack បានពន្យល់ថា នយោបាយ និង ការធ្វើអាជីវកម្មមិនត្រូវលាយឡំគ្នាជាដាច់ខាត។ លោកលើកឡើងថា បើអ្នកចង់ធ្វើនយោបាយកុំគិតពីរឿងរកលុយ តែបើចង់ធ្វើអាជីវកម្មក៏មិនត្រូវពាក់ព័ន្ធពីរឿងនយោបាយដែរ ត្បិតអីចំណុចទាំងពីរនេះបើបានជួបគ្នាកាលណា អ្នកត្រៀមវេចបង្វេចឲ្យហើយទៅ។

៤) យុវជនជំនាន់ក្រោយត្រូវគិតពីចំណុចសំខាន់ៗទាំង៤ខាងក្រោមនេះ៖

តើអ្វីទៅជាការបរាជ័យ? ការបោះបង់ គឺជាឫសគល់តែមួយគត់នៃភាពបរាជ័យ។

តើអ្វីទៅជាការតស៊ូ? នៅពេលដែលអ្នកជំនះរឿងរ៉ាវលំបាកៗ ភាពទុក្ខព្រួយ ឬ ការខកចិត្តជាច្រើនគឺនៅពេលនោះហើយដែលអ្នកអាចយល់ដោយខ្លួនឯង បានថា តើការតស៊ូមានអត្ថន័យដូចម្តេច?

តើអ្វីទៅជាកាតព្វកិច្ចរបស់យុវជន? កាតព្វកិច្ចរបស់យុវជន គឺត្រូវ ព្យាយាម ខិតខំប្រឹងប្រែងរៀនសូត្រ និង មានមហិច្ឆតាធំជាងអ្នកដទៃ។

មនុស្សឆ្លាតប្រើខួរក្បាលមកគិត និង បេះដូងសម្រាប់បង្កើតភាពជោគជ័យឲ្យខ្លួនឯង។ ប៉ុន្តែមានតែមនុស្សល្ងង់ទេដែលប្រើមាត់និយាយឥតបានការ។

…សៀវភៅល្អៗ ទាំង ១០ ក្បាលសម្រាប់អ្នកមានមហិច្ឆតាចង់វិនិយោគ…

៥) យើងកើតមកដើម្បីរស់ និង ដកស្រង់បទពិសោធន៍ក្នុងជីវិត

តាមទស្សនៈរបស់លោក Jack មនុស្សគ្រប់រូបកើតមកមិនមែនដើម្បីតែធ្វើការនោះទេ តែវាជាការបង្កើតភាពរីករាយឲ្យខ្លួនឯង។ លោកបានបន្តទៀតថា គ្មានអ្នកណាម្នាក់ដែលអាចជួយខ្លួនអ្នកបាន ក្រៅពីខ្លួនអ្នកនោះឡើយ ហើយត្រូវទទួលស្គាល់ការពិតពីអ្វីដែលខ្លួនមាននៅពេលនេះ ព្រមទាំងឈប់ចំណាយពេលមួយឆាកជីវិតដើម្បីតែការងារ បើមិនដូច្នេះទេ អ្នកនឹងស្តាយក្រោយអស់មួយជីវិត។

៦) ការប្រកួតប្រជែងក្នុងល្បែងពាណិជ្ជកម្មរបស់លោក Jack Ma

-លោក Jack បានបញ្ចេញទស្សនៈសំខាន់ៗដូចខាងក្រោមនេះថា៖

-បើអ្នកចូលចិត្តយកកំហឹងទល់កំហល់ អ្នកគឺជាមនុស្សល្ងង់។

-បើអ្នកចាត់ទុកអ្នកដទៃជាសត្រូវរបស់អ្នក នោះមនុស្សទាំងនោះនឹងចាត់ទុកអ្នកជាសត្រូវរបស់ពួកគេវិញ។

-កុំយកភាពស្អប់ខ្ពើមជាត្រីមុខនៅគ្រប់ការប្រកួត បើពុំនោះទេ អ្នកនឹងបរាជ័យ។

-ការប្រកួតប្រៀបដូចជាការលេងអុកដូច្នេះដែរ បើចាញ់ម្តង អាចលេងម្តងទៀតបាន ហើយអ្នកចាញ់មិនប្រាកដថាចាញ់រហូត ហើយអ្នកឈ្នះក៏មិនប្រាកដថា ឈ្នះរហូតនោះដែរ។

-អ្នកជំនួញ ឬ សហគ្រិន គ្មានសត្រូវនោះឡើយ ព្រោះថាដង្ហើមមុខជំនួញ ឬ អាជីវកម្មរបស់ខ្លួនគឺស្ថិតនៅលើកណ្ដាប់ដៃរបស់អតិថិជនគ្រប់រូប។

ចង់ឈ្នះល្បែងអាជីវកម្ម? BNEWS នឹងចេញផ្សាយសៀវភៅមួយក្បាលមានឈ្មោះថា “ឈ្នះល្បែងអាជីវកម្ម” ឬ “Winning the Game of Business” នៅពេលឆាប់ៗខាងមុខនេះ។ BNEWS នឹងចែកជូនដោយឥតគិតថ្លៃចំពោះអ្នកផ្ញើអ៊ីម៉ែលមកប្រអប់ទទួល សារ (inbox) facebook របស់ BNEWS ១០០នាក់ដំបូង! សូមប្រញាប់រួសរាន់ឡើង។ សូមជួយចែករំលែកព័ត៌មាននេះផងណា! សូមអរគុណ!

៧) កុំគិតដូចចៅចាក់ស្មុគ

គំនិតដូចចៅចាក់ស្មុគ វាគ្រាន់តែជាការស្រមើស្រមៃមួយគ្មានគោលដៅពិតប្រាកដ មិនអាចយកជាការបាន។ នេះជាប្រសាសន៍របស់លោក Jack Ma ។ បើនេះក្លាយជាទម្លាប់ វាប្រៀបដូចជាអ្នកផឹកស្រាដែរ ពោលគឺផឹកកាន់តែច្រើន ស្រវឹងកាន់តែច្រើន ហើយគិតកាន់តែច្រើន ក៏គ្មានប្រយោជន៍អ្វីដែរ។ លោកបានបន្តថា ពិភពលោកមិនខ្វល់ថា អ្នកបានគិត ឬ និយាយអ្វីនោះឡើយ តែពិភពលោកនឹងចងចាំប្រសិនបើអ្នកបានធ្វើអ្វីមួយឲ្យកើតចេញជា ផ្លែផ្កាបាន។

…មហាសេដ្ឋីកើតចេញពីកូនកសិករ Clayton Mathile៖ ទំនុកចិត្តគឺជាគ្រឹះសម្រាប់ការលូតលាស់ក្នុងអាជីវកម្ម…

៨) ដំបូន្មានរបស់លោក Jack Ma សម្រាប់សហគ្រិនទូទៅ

-ឱកាសដែលគ្មានអ្នកណាបានឃើញ គឺជាឱកាសដែលល្អបំផុត។

-ត្រូវធ្វើឲ្យបុគ្គលិកបង្កើតស្នាមញញឹមជានិច្ចនៅកន្លែងធ្វើការ។

-អតិថិជនគឺជាមនុស្សសំខាន់ទី១ បុគ្គលិកជាមនុស្សសំខាន់ទី២ និង អ្នកគ្រប់គ្រងក្រុមហ៊ុនគឺជាមនុស្សសំខាន់ទី៣។

-ត្រូវរក្សាទុក និង ផ្លាស់ប្ដូរមុនពេលទំនោរថ្មីៗ ឬ ការផ្លាស់ប្ដូរបានចូលមកដល់។

-បើភ្លេចរឿងលុយកាក់ មានន័យថា អ្នកភ្លេចរឿងរកស្វែងរកប្រាក់ចំណូល។

-អកប្បកិរិយារបស់អ្នក សម្ដែងឲ្យឃើញកិរិយាមារយាទរបស់អ្នក។

៩) ភាពជាសហគ្រិនរបស់លោក Jack Ma

–ឱកាសដ៏ល្អមួយជានិច្ចកាល គឺមានការពិបាកបំផុតក្នុងការពន្យល់ឲ្យបានច្បាស់លាស់ ត្បិតអីអ្វីៗដែលអាចពន្យល់បានដោយងាយស្រួល មិនមែនជាឱកាសដ៏ល្អនោះឡើយ។

–អ្នកគួរតែស្វែងរកបុគ្គលណាមួយដែលមានសមត្ថភាពពេញលេញ ដើម្បីបើកក្រុមហ៊ុនរបស់អ្នក។ អ្នកមិនចាំបាច់ស្វែងរកបុគ្គលដែលជោគជ័យនោះឡើយ ពោលគឺជ្រើសរើសមនុស្សឲ្យចំទិសដៅការងារ មិនមែនជ្រើសរើសបុគ្គលិកដែលល្អបំផុតនោះឡើយ។

-អ្វីដែលមានតម្លៃមិនអាចកាត់ថ្លៃបានសម្រាប់មនុស្សជាតិទាំងមូល គឺការទំនាក់ទំនង។

-ពាក្យថា”Free” ឬ “ដោយឥតគិតថ្លៃ” គឺជាពាក្យដែលមានតម្លៃបំផុត។

-ថ្ងៃនេះអាចអាក្រក់សម្រាប់អ្នក ថ្ងៃស្អែកអាចរឹតកាន់តែអាក្រក់ជាងថ្ងៃនេះ។ ប៉ុន្តែថ្ងៃខានស្អែកអាចជាថ្ងៃល្អបំផុតសម្រាប់អ្នក។

១០) អ្វីដែលសហគ្រិនត្រូវជៀសវាង

-អ្វីដែលគួរឲ្យខ្លាចជាងគេបំផុតសម្រាប់សហគ្រិនក្នុងការចាប់ផ្តើមអាជីវកម្មគឺ ភាពអសមត្ថភាព ភាពវាយឫក ភាពស្ទាក់ស្ទើរ និង ការមិនព្រមបោះជំហានទៅមុខ។

-បើអ្នកមិនដឹងថា គូប្រជែងរបស់អ្នកនៅឯណា អ្វីទៅជាភាពខ្លាំងរបស់គូប្រជែង នោះអ្នក គឺជាសហគ្រិនតែមួយគត់ដែលនឹងត្រៀមខ្លួនបរាជ័យ។

-ទោះបីជាគូប្រជែងរបស់អ្នកតូច ឬ ខ្សោយជាងអ្នកក៏ដោយ អ្នកត្រូវចាត់ទុកថា គឺជាគូប្រជែងដ៏ខ្លាំង និង ធំបំផុតសម្រាប់អ្នក។ ដូចគ្នានេះដែរ ទោះបីជាគូប្រជែងរបស់អ្នកធំ ឬ ខ្លាំងជាងអ្នកយ៉ាងណាក៏ដោយ អ្នកក៏មិនត្រូវចាត់ទុកខ្លួនឯងខ្សោយជាងគូប្រកួតដែរ។

…បុគ្គលគំរូ១០រូប អភិវឌ្ឍខ្លួនពីជនក្រីក្របំផុតទៅជាមហាសេដ្ឋីពិភពលោក…

១១) និយមន័យឱកាសរបស់លោក Jack Ma

លោក Jack បានបកស្រាយថា បើមានមនុស្ស៩០% និយាយថា “យល់ស្រប” ទៅនឹងសំណើលើកឡើងមួយ លោកនឹងទាត់ចោលភ្លាម។ ហេតុផលនោះគឺថា ប្រសិនបើមនុស្សភាគច្រើនចាត់ទុកថា សំណើនោះល្អ ពួកគេនឹងធ្វើអ្វីតាមសំណើនោះ ដូច្នេះឱកាសនឹងមិនអាចធ្លាក់មកលើដៃរបស់អ្នកនោះឡើយ បើអ្នកយល់ស្របដែរនោះ៕

ប្រែសម្រួល៖ ខេវិន

ប្រភព៖ yahoo

Friday, August 28, 2015

តើមានអ្វីខ្លះ ដែលអាចធ្វើឲ្យអ្នក ក្លាយជាខ្ញុំបម្រើគេរហូត?

រូបភាព

ការមាន ឬក្រ គឺស្ថិតលើខ្លួនអ្នក ស្ថិតលើសកម្មភាពរបស់អ្នក ព្រោះមានតែខ្លួនឯងទេ ដែលអាចសម្រេចជោគវាសនារបស់ខ្លួន គ្មាននរណាអាចសម្រេចបានឡើយ។ ដូចនេះ តើមានទង្វើអ្វីខ្លះ ដែលអាចធ្វើឲ្យអ្នក ក្លាយជាអ្នកបម្រើរបស់គេ?

1. ការមិនព្រមសាកល្បងអ្វីដែលថ្មី ហើយតែងតែគិតថា ការងារទាំងអស់ សុទ្ធតែលំបាក សុទ្ធតែស្មុគស្មាញ ដូចនេះ តែងតែពន្យារដល់ស្អែកហើយស្អែកទៀត មិនព្រមបំពេញឡើយ។

2. ការមិនមានគោលជំហររបស់ខ្លួន តែងតែស្តាប់តាមពាក្យសម្តីរបស់អ្នកដទៃ មិនជឿជាក់ខ្លួនឯង មិនហ៊ានសម្រេចចិត្តដោយខ្លួនឯងទេ មានរឿងអ្វីតែងតែសួរយោបល់អ្នកដទៃ។

3. ការរៀន ដើម្បីប្រលងជាប់ តែមិនមែនដើម្បីមកអនុវត្តជាក់ស្តែង មានន័យថា មិនព្រមចេញពីបន្ទប់រៀន ដើម្បីស្វែងរកបទពិសោធន៍ទេ តែបែរជានៅតែមួយកន្លែង ព្រោះខ្លាចពិភពខាងក្រៅ។

4. ការមិនព្រមអានអ្វីដែលថ្មី សុខចិត្តយកពេលវេលា ទៅធ្វើរឿងដែលឥតប្រយោជន៍ នោះនៅពេលដែលចូលចំណោមអ្នកដទៃ គឺចូលមិនចុះឡើយ ព្រោះគ្មានរឿងនិយាយជាមួយគេ ដោយសារតែចំណេះតិចពេក ការយល់ដឹងពីពិភពខាងក្រៅតិចពេក។

5. ការមិនចេះងឿងឆ្ងល់នៅពេលដែលរៀន ឬពេលដែលអានសៀវភៅ គ្មានគំនិតច្នៃប្រឌិត ធ្វើការងារងាប់ក្រឡា។

6. ការមិនចេះចោតសំណួរសួរខ្លួនឯងថាតើ ខ្លួនឯងចង់បានអ្វី ចង់ធ្វើអ្វី គ្មានគោលដៅច្បាស់លាស់ ហើយចេះតែដើរ។

7. ការមិនចេះទទួលស្គាល់ការពិត មិនចេះទទួលស្គាល់កំហុសរបស់ខ្លួន មិនចេះរៀនពីកំហុសរបស់ខ្លួន ចេះតែគេចវេសពីបញ្ហាដែលកើតឡើង ដោយមិនរៀនដោះស្រាយ៕

ត្រួតពិនិត្យដោយ www.health.com.kh

Thursday, August 13, 2015

វិធីសាស្ត្រ ៩យ៉ាង ដើម្បីបញ្ចុះបញ្ចូលអតិថិជនគ្រាក់ៗឱ្យទិញផលិតផលរបស់អ្នក!

វិធីសាស្ត្រ ៩យ៉ាង ដើម្បីបញ្ចុះបញ្ចូលអតិថិជនគ្រាក់ៗឱ្យទិញផលិតផលប្រភព៖ http://im.ft-static.com/

ក្នុង នាមជាអ្នកលក់ ឬម្ចាស់អាជីវកម្មពិតណាស់គឺចង់លក់ទំនិញ ឬសេវាកម្មរបស់អ្នកឱ្យបានច្រើន ជាពិសេសគឺចង់ធ្វើម៉េចឱ្យអតិថិជនគ្រាក់ៗទិញទំនិញច្រើនៗពី អ្នក ហើយត្រលប់មកទិញទំនិញអ្នកម្ដងហើយម្ដងទៀត។ តាមពិតទៅ មានវិធីសាស្ត្រជាច្រើនដែលអាចជួយអ្នកបានជុំវិញបញ្ហានេះ។

១) រៀបចំព័ត៌មានផ្សេងៗពាក់ព័ន្ធនឹងទំនិញ ឬសេវាកម្មរបស់អ្នកឱ្យបានត្រឹមត្រូវ (Prepare appropriate and clear description of the products or services you offer)៖ រាល់ព័ត៌មានពាក់ព័ន្ធនឹងផលិតផល និងសេវាកម្មរបស់អ្នកត្រូវរៀបចំឱ្យមានរបៀប ដើម្បីបង្ហាញទៅដល់អតិថិជនធំៗ។ នៅពេលដែលអ្នកមានព័ត៌មានច្រើន និងលម្អិតអំពីផលិតផលឬសេវាកម្មរបស់អ្នក នោះវានឹងជួយឱ្យអតិថិជនរបស់អ្នកងាយស្រួលធ្វើការសម្រេច ចិត្ត។ ត្រូវនិយាយពីផលប្រយោជន៍នៃផលិតផលរបស់អ្នក ប៉ុន្តែមិនគួរពន្លើស ឬបំប៉ោងឱ្យលើសពីការពិតនោះទេ។ ត្រូវបង្ហាញដោយក្ដីស្មោះត្រង់។ សូមឱ្យច្បាស់ថា មិនត្រូវសន្យាឬកុហកអ្វីដែលផលិតផលរបស់អ្នកគ្មាន ឬមិនអាចផ្ដល់ឱ្យបានជាដាច់ខាត។

…សញ្ញាណសំខាន់ៗទាំង១០ បង្ហាញពីភាពខុសគ្នារវាងបុគ្គលជោគជ័យ និងបុគ្គលបរាជ័យ!…

២) ផ្ដល់អ្វីដែលពិសេសលើសពីអ្វីដែលអតិថិជនរបស់អ្នករំពឹងទុក (Provide something more than is expected, a kind of bonus)៖ អតិថិជនក្ដី បុគ្គលិកក្រុមហ៊ុនឯកជនក្ដីគឺចង់បានអ្វីដែលជាការបន្ថែម។ អ្នកគួរតែគិតគួរពីចំណុចនេះ ព្រោះថា របស់ទាំងនោះវាមិនចំណាយអស់ច្រើនទេ តែអាចជួយបង្កើតអារម្មណ៍ជាវិជ្ជមានរបស់អតិថិជនចំពោះផលិតផល ឬម៉ាករបស់អ្នក។ វាក៏ធ្វើឱ្យអតិថិជនមានអារម្មណ៍រីករាយ ចងចាំ និងឱ្យតម្លៃសមិទ្ធផលរបស់អ្នក។ ត្រង់ចំណុចនេះ អ្នកគួរតែស្វែងរក ឬធ្វើយ៉ាងណាឱ្យក្រុមហ៊ុន ឬអាជីវកម្មរបស់អ្នកមានលក្ខណៈខុសប្លែកពីអ្នកដទៃជាដាច់ខាត។ ឧទាហរណ៍ ទិញអតិថិជនទិញផលិតផលរបស់អ្នកច្រើន និងមកទិញជាញឹកញាប់ អ្នកអាចរៀបចំប្រតិទិនពិសេសដែលមានរូបអតិថិជនរបស់អ្នក និងផ្ដល់ឱ្យគាត់ភ្ញាក់ផ្អើលជាដើម។

៣) បើមានការដឹកជញ្ជូនត្រូវបញ្ជាក់ឱ្យច្បាស់ (Give clear and detailed information about the shipping or delivery in case you have)៖ បើសិនបើមានសេវាដឹកជញ្ជូនពីតំបន់មួយទៅតំបន់មួយឬពី ប្រទេសមួយទៅប្រទេសមួយ អ្នកត្រូវតែកំណត់ឱ្យបានច្បាស់ពីលក្ខខណ្ឌផ្សេងៗ។ អ្នកគួរតែកំណត់តម្លៃដែលធ្វើយ៉ាងណាអតិថិជនរបស់អ្នកមិនរុញរា ដោយសារតែតម្លៃនោះ។ មានពេលខ្លះដើម្បីទាក់ម៉ូយធំ អ្នកគួរខាតជាលើកដំបូងខ្លះក៏បាន។

…ទម្លាប់ល្អទាំង៥យ៉ាងដែលមិនអាចមើលរំលង ក្នុងពេលអង្គុយធ្វើការ!…

៤) អ្នកត្រូវប្រាប់អតិថិជនឱ្យច្បាស់ពីលក្ខខណ្ឌកំណត់ផ្សេងៗរវាងអ្នកលក់ និងអ្នកទិញ (បើមាន)៖ ទំនិញខ្លះត្រូវមានការចុះកិច្ចព្រមព្រៀងរវាងភាគីទាំងពីរមុន ការទិញត្រូវបានធ្វើឡើង។ ដូច្នេះបើក្រុមហ៊ុន ឬអាជីវកម្មរបស់អ្នកមានបែបនេះ អ្នកត្រូវប្រាប់ និងពន្យល់អតិថិជនឱ្យច្បាស់នូវចំណុចនីមួយៗ ចៀសវាងអតិថិជនយល់ច្រឡំ ឬមិនយល់ចំណុចណាមួយបន្ទាប់ពីមានការព្រមព្រៀងទិញផលិតផលរបស់ អ្នក។ ព័ត៌មានដែលអ្នកគួរប្រាប់មាន តម្លៃផ្សេងៗ ពន្ធ អាករលើតម្លៃបន្ថែម និងផ្សេងៗទៀត។

៥) អ្នកគួរតែបង្ហាញលិខិតបញ្ជាក់ផ្សេងៗដើម្បីឱ្យអតិថិជនជឿទុក ចិត្ត (Ensure your company and your brand are well known for trustworthiness)៖ បើអ្នកមានលិខិតបញ្ជាក់ការអនុញ្ញាតពីអាជ្ញាធរ អាជ្ញាប័ណ្ណ លិខិតចូលរួមបេសកកម្មមនុស្សធម៌ និងលិខិតបញ្ជាក់ផ្សេងៗទៀត អ្នកគួរបង្ហោះនៅលើគេហទំព័រ ឬបិទនៅក្នុងការិយាល័យរបស់អ្នក ដើម្បីឱ្យអតិថិជនមានការជឿទុកចិត្ត ថា អាជីវកម្មរបស់អ្នក គឺពិតជាទទួលបានការអនុញ្ញាត និងមានសិទ្ធិដំណើរការស្របច្បាប់នៅក្នុងប្រទេស។

៦) ធ្វើយ៉ាងណាឱ្យអតិថិជនងាយទាក់ទងអ្នក (Last but not least, be reachable)៖ អ្នកគួរតែមានឯកសារគ្រប់សព្វ ទាំងខិត្តប័ណ្ណ កាតបញ្ជាក់អាសយដ្ឋាន និងលេខទំនាក់ទំនងក្រុមហ៊ុន និងព័ត៌មានផ្សេងៗដើម្បីចែកជូនអតិថិជន។ លេខទូរស័ព្ទគួរតែជាលេខល្អបន្តិចដែលធ្វើឱ្យអតិថិជនងាយចំណាំ។ ប្រសិនបើអ្នកមានបណ្ដាញសង្គម អ្នកគួរតែរក្សាការទំនាក់ទំនងជាមួយអតិថិជនរបស់អ្នក ហើយត្រូវប្រាកដរាល់សំណួរផ្សេងៗរបស់អតិថិជនអំពីផលិតផល ឬសេវាកម្មរបស់អ្នក ត្រូវមានអ្នកឆ្លើយភ្លាមៗដើម្បីកុំឱ្យអតិថិជនខកចិត្តឱ្យសោះ។

៧) គួរមានកម្មវិធីជួបជុំគ្នា ឬជប់លៀងប្រចាំឆ្នាំ ៖ នៅចំណុចខាងលើ គឺចង់និយាយអំពីកាដូ ឬរបស់បន្ថែមពិសេសដល់អតិថិជន។ បើអ្នកអាចធ្វើបាន វារឹតតែប្រសើរគឺ អ្នកគួរមានកម្មវិធីជប់លៀងប្រចាំឆ្នាំជាមួយអតិថិជនគ្រាក់ៗ របស់អ្នក ហើយគួរតែចែកកាដូ ឬវត្ថុអនុស្សាវរីយ៍ដល់ពួកគេ។ ការធ្វើបែបនេះ គឺបង្ហាញថា អ្នកបានយកចិត្តទុកដាក់ចំពោះអតិថិជន កាន់តែជិតស្និទ្ធជាមួយអតិថិជន និងធ្វើឱ្យអតិថិជនមិនងាយបំភ្លេចផលិតផលអ្នកបាន៕

វិធីសាស្ត្រ ៩យ៉ាង ដើម្បីបញ្ចុះបញ្ចូលអតិថិជនគ្រាក់ៗឱ្យទិញផលិតផលរបស់អ្នក!

ជំនាញគ្រឹះ៤ដើម្បីអភិវឌ្ឍន៍ខ្លួនឯង ពិតជាមិនអាចខ្វះបានសម្រាប់មនុស្សជោគជ័យ

ជំនាញគ្រឹះទាំង៤នេះ ពិតជាមិនអាចខ្វះបានឡើយសម្រាប់មនុស្សជោគជ័យ!ប្រភព៖ bookkeepingfortomorrow

គ្មាន មនុស្សណាចង់បរាជ័យនោះឡើយ ផ្ទុយទៅវិញ គឺភាពជោគជ័យគឺជាក្តីប្រាថ្នារបស់មនុស្សទូទៅ មិនថា អ្នកសិក្សា អ្នកធ្វើការ ឬ អ្នកជំនួញឡើយ។ ភាពជោគជ័យ មិនមែនកើតឡើងដោយចៃដន្យឡើយ ពោលគឺអ្វីសុទ្ធតែមានការរៀបចំឡើងដោយយកចិត្តទុកដាក់ លើអ្វីដែលមនុស្សចង់សម្រេចបាន។ ជាមូលដ្ឋានគ្រឹះ ដើម្បីអាចធ្វើឲ្យអ្នកអាចក្លាយជាមនុស្សដែលមានសមត្ថភាពគ្រប់គ្រាន់ ក្នុងការធ្វើការងារអ្វីៗប្រកបដោយប្រសិទ្ធភាពខ្ពស់ ហើយឈរលើទីតាំងជោគជ័យបាននោះ អ្នកត្រូវមានជំនាញពិសេសមួយចំនួនដូចខាងក្រោម៖

១) ស្គាល់ខ្លួនឯងច្បាស់ (Self-Awareness )

មុនពេលផ្តើមគិតធ្វើរឿងអ្វីៗ ចំណុចសំខាន់បំផុតដែលអ្នកមិនត្រូវមើលរំលងនោះ គឺ ការស្វែងយល់ពីខ្លួនឯងឲ្យបានច្បាស់ ថា អ្នកជាមនុស្សប្រភេទណា ចូលចិត្តអ្វី មានចំណុចខ្លាំង និង ចំណុចខ្សោយអ្វីខ្លះ។ មនុស្សភាគច្រើនមិនបានស្គាល់ច្បាស់អំពីខ្លួនឯងនោះទេ ជាហេតុធ្វើឲ្យពួកគេមិនអាចធ្វើអ្វីប្រកបដោយភាពជោគជ័យបាន។ ស្គាល់ខ្លួនឯង មានន័យថា អ្នកស្គាល់ច្បាស់ អំពីផ្លូវត្រូវដើរដែលស្របនឹងសមត្ថភាព និង អត្តចរិតរបស់ខ្លួនឯង ដើម្បីឆ្ពោះទៅកាន់ភាពជោគជ័យ។

…ទម្លាប់ល្អទាំង៥យ៉ាង ដែលជួយឲ្យអ្នកមានសុខភាពល្អ!…

២) ភាពជឿជាក់លើខ្លួនឯង (Self-Confidence )

បើសូម្បីតែខ្លួនឯង អ្នកមិនជឿជាក់ផង តើឲ្យនរណាទុកចិត្តអ្នក? ភាពជឿជាក់ គឺជាចំណុចសំខាន់ ក្នុងការជំរុញឲ្យអ្នកអាចធ្វើអ្វីៗ បានយ៉ាងល្អ និង ប្រកបដោយប្រសិទ្ធភាពខ្ពស់។ ដើម្បីក្លាយជា មនុស្សដែលមានភាពជឿជាក់លើខ្លួនឯង អ្នកត្រូវស្គាល់ច្បាស់នូវអ្វីដែលអ្នកកំពុងធ្វើ តាមរយៈការសិក្សាស្រាវជ្រាវ និង ការអង្កេតជាដើម។

…រឿងមិនល្អទាំង ៥យ៉ាងដែលអ្នកគួរ ឈប់ធ្វើវាចាប់ពីពេលនេះតទៅ!…

៣) ការវាយតម្លៃលើខ្លួនឯង ( Self-Assessment)

ជារៀងរាល់ថ្ងៃ អ្នកបានធ្វើរឿងជាច្រើន ក្នុងបំណងដើម្បីសម្រេចគោលដៅ។ ក្នុងស្ថានភាពនេះ ចំណុចចាំបាច់មួយដែលមិនគួរមើលរំលងនោះ គឺការវាយតម្លៃលើសមត្ថភាពខ្លួនឯង ដើម្បីត្រួតពិនិត្យឡើងវិញ ថាអ្វីដែលអ្នកបានធ្វើកន្លងមក គឺ មានចំណុចខ្សោយ និង ចំណុចខ្លាំងអ្វីខ្លះ។ ការធ្វើបែបនេះ អាចជួយឲ្យអ្នកអាចកែប្រែ ឬ រៀបចំផែនការឡើងវិញ ដើម្បីត្រួសត្រាយផ្លូវទៅកាន់កន្លែងដែលអ្នកចង់ទៅដល់។

៤) ភាពម្ចាស់ការលើខ្លួនឯង ( Self-Discipline)

ផ្លូវទៅកាន់ភាពជោគជ័យ មិនស្រួលដើរនោះទេ អញ្ចឹងហើយបានជា មនុស្សភាគតិចប៉ុណ្ណោះដែលសម្រេចគោលដៅ។ ក្នុងដំណើរដ៏ស្មុគស្មាញនេះ អ្នកត្រូវតែមាន ភាពម្ចាស់ការលើខ្លួន។ មានន័យថា អ្នកត្រូវតែច្បាស់លាស់លើអ្វីដែលកំពុងធ្វើ បើទោះបីជាមាន បញ្ហាជាច្រើនកើតឡើងក្តី។ ក្នុងន័យនេះ អ្នកត្រូវមានវិន័យចំពោះខ្លួនឯង លើអ្វីដែលត្រូវធ្វើ និង មិនត្រូវធ្វើ។ មិនត្រូវធ្វើជាមនុស្ស ដែល រេចុះរេឡើង ទៅតាមពាក្យសំដីអ្នកដទៃនោះឡើយ៕

ចង់ក្លាយជាអ្នកមានធ្វើតាមរូបមន្តសាមញ្ញទាំង៤យ៉ាងនេះ អ្នកនឹងជោគជ័យ!

ចង់ក្លាយជាអ្នកមានធ្វើតាមរូបមន្តសាមញ្ញ ទាំង៤យ៉ាងនេះ អ្នកនឹងជោគជ័យ!ប្រភព៖ webatsimon

«ការចំណាយ ឲ្យតិចជាងប្រាក់ចំណូល» វាជារូបមន្តសាមញ្ញជាទីបំផុត មានន័យថា ដឹងពីចំនួនប្រាក់ដែលអ្នករកបានហើយចំណាយឲ្យតិចជាងនោះ ក៏ប៉ុន្តែមនុស្សភាគច្រើនមិនអាចធ្វើបានដូចរូបមន្តមួយឃ្លា នេះទេ។ ក្នុងជីវិតប្រចាំថ្ងៃជាក់ស្ដែង ការចំណាយមានច្រើនមុខ ខណៈចំណូលនៅដដែល ឬកើនឡើងតិចតួចបំផុត។

ផ្ទុយពីគំនិតចំណាយតិចជាងចំណូល មនុស្សជាច្រើននាក់កំពុងតែប្រើបំណុលធនាគារ ដើម្បីយកទៅបើករកស៊ីឲ្យបានច្រើនតាមតែអាចធ្វើទៅបាននាពេល បច្ចុប្បន្ននេះ។ បំណុលពិតជាអាចជួយដោះស្រាយបញ្ហាអ្នកបាននៅពេលខាងមុខ ប៉ុន្តែត្រូវចេះប្រើប្រាស់វាឱ្យមានប្រសិទ្ធភាព។

…ទ្រឹស្ដី ៥ មានតម្លៃបំផុតរបស់លោក Warren Buffett ដែលអ្នកគួររៀនសូត្រតាម…

តើអ្នកអាចគេចពីវាសនានៃមនុស្សដែលធ្វើតាមទម្លាប់និង ចំណាយឲ្យតិចជាងចំណូលដើម្បីបង្កើតអនាគតឲ្យកាន់តែមានបាន យ៉ាងដូចម្ដ៉េច?

ជំហានទី១៖ កំណត់ឲ្យច្បាស់ពីចំណូលរបស់អ្នក (Step 1: Figure out how much you earn)

ជំហានដំបូងនៃវិធីចំណាយតិចជាងចំណូលនេះ គឺត្រូវកំណត់ឱ្យបានច្បាស់ពីចំណូលរបស់អ្នក។ បើអ្នកធ្វើការ ទទួលបានប្រាក់ខែជាទៀងទាត់មិនពិបាកនោះទេ ក៏ប៉ុន្តែបើអ្នកមានអាជីវកម្មផ្ទាល់ខ្លួន ឬមានការងារច្រើនមុខ អ្នកត្រូវកំណត់វាឱ្យបានច្បាស់ ដើម្បីងាយស្រួលធ្វើផែនការចំណាយ។ អ្វីដែលសំខាន់នោះ គឺការធ្វើផែនការគ្រប់គ្រងប្រាក់ចំណូល គឺត្រូវអាស្រ័យលើប្រាក់ចំណូលទៀតទាត់ មិនមែនពឹងលើប្រាក់ចំណូលរងក្រៅបាន ឬប្រាក់មិនទៀតទាត់នោះទេ។

…ការយកលេសដ៏ពេញនិយមទាំង ៧ របស់មនុស្សខ្ជិលពីការសន្សំប្រាក់ទុក…

ជំហានទី២៖ បង្កើតផែនការចំណាយ (Step 2: Come up with a spending plan)

អ្នកមិនត្រូវកំណត់ផែនការថវិកាតឹងតែង ដើម្បីធ្វើឲ្យវិធីនេះក្លាយជាផ្នែកមួយនៃផែនការហិរញ្ញវត្ថុ របស់អ្នកនោះទេនោះ។ អ្នកអាចប្រើវិធីដោយងាយ គឺការកំណត់មូលដ្ឋានគោលមួយអំពីថា តើអ្នកនឹងត្រូវចំណាយប៉ុន្មានក្នុងមួយខែ។ អ្វីដែលសំខាន់គឺត្រូវប្រាកដថា ការចំណាយប្រចាំខែរបស់អ្នកគឺតិចជាងប្រាក់ចំណូលប្រចាំខែ ដូចអ្នកបានដឹងនៅក្នុងជំហានទី១រួចហើយ។

ជំហានទី៣៖ ចូរប្រាកដថា ចំណាយឲ្យកាន់តែតិច (Step 3: Make it work by spending less)

ការចំណាយកាន់តែតិច គឺជាវិធីងាយស្រួលបំផុតសម្រាប់អ្នកដែលចង់កាត់បន្ថយចំណាយពួកគេ ឲ្យតិចជាងប្រាក់ចំណូល។ វាងាយស្រួលក្នុងការសម្រេចចិត្តដើម្បីកាត់បន្ថយចំណាយឲ្យកាន់តែ តិចជារឿយៗ។ ចូរចាប់ផ្ដើមកាត់បន្ថយការចំណាយ ដែលមិនផ្ដល់តម្លៃដល់អ្នក ឬដែលគ្មានប្រយោជន៍សោះ។

ជំហានទី៤៖ ចូរខិតខំរកចំណូលឲ្យបានច្រើន (Step 4: Make it work by earning more.)ការ រកប្រាក់ចំណូលឲ្យបានកាន់តែច្រើន គឺជាវិធីសាស្ត្រដែលមនុស្សមួយចំនួនធំធ្លាប់មានបំណងចង់ធ្វើ ដើម្បីធ្វើតាមវិធីចំណាយតិចជាងចំណូល។ មានវិធីជាច្រើន ដែលអ្នកអាចបង្កើតចំណូលអ្នកបន្ថែមលើចំណូលបានមកពីការធ្វើការ និងការងារក្រៅម៉ោងក្នុងពេលបច្ចុប្បន្ន។

ប្រែសម្រួល៖ សុខ មេត្តា

ប្រភព៖ business insider

Monday, September 14, 2015

​ទ្រឹស្ដី​ ៥​​​ មាន​តម្លៃ​បំផុត​​របស់​លោក​ Warren Buffett ​ដែល​អ្នក​គួរ​រៀន​សូត្រ​តាម​

Wednesday, September 9, 2015

Friday, August 28, 2015

Thursday, August 13, 2015

វិធីសាស្ត្រ​​ ៩​យ៉ាង​ ដើម្បី​​បញ្ចុះ​បញ្ចូល​​​អតិថិជន​គ្រាក់​ៗ​ឱ្យ​ទិញ​ផលិតផល​របស់​អ្នក!

វិធីសាស្ត្រ​​ ៩​យ៉ាង​ ដើម្បី​​បញ្ចុះ​បញ្ចូល​​​អតិថិជន​គ្រាក់​ៗ​ឱ្យ​ទិញ​ផលិតផល​របស់​អ្នក!

ជំនាញ​គ្រឹះ​​​​៤​ដើម្បី​អភិវឌ្ឍន៍​​ខ្លួន​ឯង​ ពិតជា​មិន​អាច​ខ្វះ​បាន​​សម្រាប់​មនុស្ស​ជោគជ័យ

ចង់​ក្លាយ​​ជា​អ្នក​មាន​ធ្វើ​តាម​រូបមន្ត​សាមញ្ញ​​ទាំង​៤​យ៉ាង​​​នេះ ​​​អ្នក​នឹង​ជោគជ័យ!​

Cambodia News

ទ្រឹស្ដី ៥ មានតម្លៃបំផុតរបស់លោក Warren Buffett ដែលអ្នកគួររៀនសូត្រតាម

វិធីសាស្ត្រ ៩យ៉ាង ដើម្បីបញ្ចុះបញ្ចូលអតិថិជនគ្រាក់ៗឱ្យទិញផលិតផលរបស់អ្នក!

វិធីសាស្ត្រ ៩យ៉ាង ដើម្បីបញ្ចុះបញ្ចូលអតិថិជនគ្រាក់ៗឱ្យទិញផលិតផលរបស់អ្នក!

ជំនាញគ្រឹះ៤ដើម្បីអភិវឌ្ឍន៍ខ្លួនឯង ពិតជាមិនអាចខ្វះបានសម្រាប់មនុស្សជោគជ័យ

ចង់ក្លាយជាអ្នកមានធ្វើតាមរូបមន្តសាមញ្ញទាំង៤យ៉ាងនេះ អ្នកនឹងជោគជ័យ!