Wednesday, January 28, 2015

មានតំរុយ ពីមូលហេតុ ដែលមុននេះបន្តិច ទាំង Facebook និង Instagram បើកមិនចេញ ទូទាំង ពិភពលោក!

774 LIKES

89 COMMENTS

អង្គារ ២៧ មករា, ២០១៥ ម៉ោង ១៣:១៨

ហ្វេសប៊ុក៖ ប្រមាណជា មួយម៉ោង មុននេះ បណ្តាញទំនាក់ទំនងសង្គម ហ្វេសប៊ុក មានភាពរអាក់រអួល បច្ចេកទេស មិនអាចដំណើរការ ឲ្យអ្នកប្រើប្រាស់ ធ្វើការបើកចូលបាន។

បើយោងតាម សារព័ត៌មាន RT បានឲ្យដឹងថា មិនត្រឹមតែ Facebook ប៉ុណ្ណោះទេ ដែលមានបញ្ហា មិនអាចបើកបាន សូម្បីតែ បណ្តាញសង្គម Instagram ក៏មិនអាច ដំណើរការ បានដូចគ្នាដែរ។ នៅក្នុងពេល មុននេះបន្តិច អ្នកប្រើប្រាស់ជុំវិញពិភពលោក អាចនឹងមិនមាន នរណាម្នាក់ ចូលទៅកាន់ គេហទំព័រ ហ្វេសប៊ុក និង អ៊ិនស្តាក្រាម បានឡើយ ខណៈដែល មានផ្ទាំងជូនដំណឹង មួយ បានលេចឡើងថា “Sorry, something went wrong. We're working on it and we'll get it fixed as soon as we can,” ដែលមានន័យថា «សុំទោស, អ្វីម្យ៉ាងបានមានបញ្ហា។ ពួកយើងកំពុងតែដោះស្រាយ ហើយ ពួកយើងនឹងធ្វើឲ្យរួចរាល់ ឲ្យបានឆាប់រហ័ស តាមដែលអាចធ្វើទៅបាន»។
ទោះជាយ៉ាងណា មិនទាន់មានប្រភព ណាមួយ អាចឲ្យដឹងពីមូលហេតុ នាំឲ្យហ្វេសប៊ុក មានបញ្ហា នៅឡើយទេ ខណៈអ្នកលេងអ៊ិនធើណេត មានការសង្ស័យ ទៅលើ បញ្ហាអាកាសធាតុ និង ព្យុះព្រិល នៅសហរដ្ឋអាមេរិក។

Update: សារព័ត៌មាន ដដែល បានបង្ហោះសារ នៅលើ Tweeter ឲ្យដឹងថា បញ្ហានេះ កើតឡើង ដោយសារតែមាន ការវាយប្រហារ តាមប្រព័ន្ធអ៊ិនធើណេត ដោយប្រើវិធិសាស្ត្រ ដែលគេហៅថា DDOS Attack ។

ប្រិយមិត្ត បានជួបបញ្ហា នេះដែរទេ? តើមានអារម្មណ៍យ៉ាងណាដែរ ពេលអត់មានហ្វេសប៊ុកលេង?

ប្រភព៖ RT

Thursday, January 22, 2015

ដំបូន្មានពីរឃ្លារបស់មហាសេដ្ឋី Warren Buffet ធ្វើឱ្យអ្នកវិនិយោគកាន់តែមានឡើងៗ

ដំបូន្មានពីរឃ្លារបស់មហាសេដ្ឋី Warren Buffet ធ្វើឱ្យអ្នកវិនិយោគកាន់តែមានឡើងប្រភព៖ www.huffingtonpost.com

លោកមហាសេដ្ឋី Warren Buffet តែងតែផ្ដល់ដំបូន្មានអំពីការវិនិយោគ គន្លឹះនៃការរកស៊ី និងការលើកទឹកចិត្តមនុស្សឱ្យប្រឹងប្រែងរកស៊ីជាច្រើន។ ថ្ងៃនេះវិញ TheBNEWS សូមនាំយកដំបូន្មានពីរឃ្លា យ៉ាងខ្លីរបស់លោកដែលធ្វើឱ្យអ្នកវិនិយោគ ឬ អ្នករកស៊ី កាន់តែមានឡើងៗ។

…ការងារ៧ យ៉ាងដែលមហាសេដ្ឋី Warren Buffett ធ្វើ ដើម្បីសន្សំលុយទុក ៥៣ ០០០ដុល្លារ នៅអាយុ ១៦ឆ្នាំ…

១) រៀនពីការសន្សំ (Learn to save) 
មហាសេដ្ឋីរូបនេះ បានចែករំលែកការយល់ឃើញរបស់លោកនៅក្នុងកម្មវិធីទូរទស្សន៍មួយ កាលពីឆ្នាំទៅមិញ។ លោកបានថ្លែងដូច្នេះថា ៖«ខ្ញុំគិតថា កំហុសដ៏ធំគឺមនុស្ស មិនរៀនពីទម្លាប់នៃការសន្សំឱ្យបានត្រឹមត្រូវតាំងពីដំបូង ព្រោះថា ការសន្សំ គឺជាទម្លាប់មួយ»។ លោកបានបន្ថែមទៀតថា កំហុសធំមួយទៀតនោះគឺថា ការព្យាយាមចង់មានលឿនពេក។ លោកពោលដូច្នេះ ៖«វាពិតងាយស្រួល បើយើងចង់ក្លាយជាអ្នកមានសន្សឹម ប៉ុន្តែវាមិនងាយស្រួលនោះទេបើចង់មានឆាប់ពេកនោះ»។

២) នៅពេលតម្លៃភាគហ៊ុនធ្លាក់ កុំលក់ គឺត្រូវទិញបន្ថែម (When a stock price falls, buy, don’t sell.)
ការលើកឡើងនៅពេលនេះ គឺមិនមែនជារឿងចៃដន្យនោះទេ។ លោកបានទាញចេញពីបទពិសោធន៍របស់លោកផ្ទាល់។ កាលពីឆ្នាំមុន លោកបានខាតបង់អស់ ២ពាន់លានដុល្លារក្នុងរយៈពេលតែប៉ុន្មានថ្ងៃបន្ទាប់ពីតម្លៃ ភាគហ៊ុន ក្នុងគម្រោងវិនិយោគធំៗរបស់លោកមួយចំនួនបានធ្លាក់ចុះព្រម គ្នា។ លោកធ្លាប់មានប្រសាសន៍ប្រាប់សារព័ត៌មាន CNBC ថា វិនិយោគិន ដែលចូលចិត្តលោតពីលើកប៉ាល់ ដែលលោកចង់សំដៅទៅលើវិនិយោគិនសម្រេចចិត្តលក់ភាគហ៊ុននៅពេល តម្លៃធ្លាក់ចុះ គឺបានធ្វើឱ្យខ្លួនឯងបាត់ឱកាស ដើម្បីស្រង់ដើម ឬបានចំណេញមកវិញ នៅពេលតម្លៃភាគហ៊ុនកើនឡើងបន្ទាប់ពីលក់ហើយ៕

...សាលាអន្តរជាតិលើននីង បើកបង្រៀនពីថ្នាក់មត្តេយ ដល់ថ្នាក់ទី ១២ ដែលមានប្រព័ន្ទសិក្សា អាមេរិកកាំង...

អត្ថបទទាក់ទង

Wednesday, January 21, 2015

លោកអ្នកដឹងទេថា ប្រាក់អត្ថប្រយោជន៍ប្រភេទណាដែលមិនជាប់ពន្ធទេ ?

ដឹងថាប្រាក់អត្ថប្រយោជន៍ប្រភេទណាដែល មិនជាប់ពន្ធទេ ?ប្រភព៖ www.featurepics.com

ក្រសួងសេដ្ឋកិច្ច និងហិរញ្ញវត្ថុ ប្រកាសជូនដំណឹងដល់មហាជនឲ្យបានដឹងថា រាល់ប្រាក់ឧបត្ថម្ភដែលនិយោជិត កម្មករ កម្មការិនីនៃរោងចក្រនានា ទទួលបានពីការបំពេញការងារ នឹងមិនត្រូវគិតបញ្ចូលក្នុងមូលដ្ឋានគិតពន្ធលើប្រាក់បៀវត្ស និងមិនមែនជាកម្មវត្ថុនៃពន្ធលើអត្ថប្រយោជន៍បន្ថែមនោះទេ ។

យោងតាមសារាចរណែនាំរបស់ក្រសួងសេដ្ឋកិច្ច ស្ដីពីការអនុវត្តកាតព្វកិច្ចកាត់ទុកពន្ធលើប្រាក់បៀវត្ស និងពន្ធលើអត្ថប្រយោជន៍បន្ថែម ចុះថ្ងៃទី២០ ខែមករានេះថា ប្រាក់ឧបត្ថម្ភដែលនិយោជិតទទួលបានដូចខាងក្រោមនេះ នឹងមិនត្រូវបញ្ចូលទៅក្នុងមូលដ្ឋានគិតពន្ធលើប្រាក់បៀវត្ស និងមិនមែនជាកម្មវត្ថុនៃពន្ធលើអត្ថប្រយោជន៍បន្ថែមទេ ដើម្បីឲ្យមានសង្គតិភាព(ភាពស្មោះត្រង់)ក្នុងការអនុវត្តកាតព្វកិច្ច លើប្រាក់បៀវត្ស ប្រាក់ឧបត្ថម្ភ ។

១. សោហ៊ុយធ្វើដំណើរពីទីកន្លែងស្នាក់នៅទៅទីកន្លែងធ្វើការ ឬរោងចក្រ និងពីទីកន្លែងធ្វើការ ឬរោងចក្រ ទៅកន្លែងស្នាក់នៅ និងការឧបត្ថម្ភថ្លៃស្នាក់នៅឬការផ្ដល់កន្លែងស្នាក់នៅក្នុងបរិវេណ រោងចក្រ ស្របតាមបទបញ្ញត្តិនៃច្បាប់ការងារ។
២. ប្រាក់ថ្លៃបាយដែលផ្ដល់ឲ្យនិយោជិត កម្មករ កម្មការិនី ទាំងអស់ដោយគ្មានបែងចែកតាមតួនាទី ឬមុខងាររួមទាំងប្រាក់ថ្លៃបាយបន្ថែមម៉ោង។
៣. មូលនិធិបេឡាសន្តិសុខសង្គម ឬមូលនិធិសុខមាលភាពសង្គមក្នុងកម្រិតដែលបានបញ្ញត្តិក្នុងច្បាប់។
៤. ប្រាក់ធានរ៉ាប់រងសុខភាព ឬបុព្វលាភធានារ៉ាប់រងអាយុជីវិតឬសុខភាពដែលផ្ដល់ដល់និយោជិតកម្មករ កម្មការិនី គ្រប់គ្នាដោយគ្មានការបែងចែកតាមតួនាទី ឬមុខងារ។
៥. ប្រាក់ឧបត្ថម្ភទារក ឬចំណាយទារកដ្ឋាន ដែលមានចែងក្នុងបទបញ្ញត្តិនៃច្បាប់ការងារ
៦. ប្រាក់បំណាច់បញ្ចប់កិច្ចសន្យា ឬប្រាក់បំណាច់នៃការបញ្ឈប់លែងឲ្យធ្វើការ ក្នុងកម្រិតដែលបានបញ្ញត្តិក្នុងច្បាប់ការងារ។

គួររំលឹកថា កាលពីថ្ងៃទី០៦ ខែមករា ឆ្នាំ២០១៥គន្លងទៅនេះ អគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុ បានប្រកាសពីវិសោធនកម្មទៅលើមាត្រា៤៧ នៃច្បាប់ស្ដីពីសារពើពន្ធ ដោយកំណត់ប្រាក់បៀវត្សជាប់ពន្ធប្រចាំខែចាប់ពី ៨០០ ០០១ រៀល(ប៉ែតសិបម៉ឺនមួយរៀល) ដល់ ១ ២៥០ ០០០ រៀល(មួយលានម្ភៃប្រាំម៉ឺនរៀល) ត្រូវកំណត់យកអត្រាពន្ធចំនួន ៥ % , ប្រាក់បៀវត្សចាប់ពី ១ ២៥០ ០០១រៀល(មួយលានម្ភៃប្រាំម៉ឺនមួយរៀល) ដល់ ៨ ៥០០ ០០០ រៀល (ប្រាំបីលានហាសិបម៉ឺនរៀល) មានអត្រាពន្ធ ១០% និង អត្រាពន្ធ ១៥% កំណត់បៀវត្សចាប់ពី ៨ ៥០០ ០០១រៀល ទៅ ១២ ៥០០ ០០០ រៀល ហើយ លើសពី ១២ ៥០០ ០០០ រៀល ឡើងទៅមានអត្រាពន្ធចំនួន ២០%។ ដោយឡែក តាមមាត្រាថ្មីនេះ គឺអ្នកដែលទទួលប្រាក់បៀវត្សក្រោម ៨០ម៉ឺនរៀលមិនគិតអត្រាពន្ធនោះទេ ខណៈដែលមាត្រា ៤៧ចាស់ គឺប្រាក់បៀវត្សក្រោម ៥០ម៉ឺនរៀលមិនគិតពន្ធ៕

10928585_809602895778910_1487547171_n (1)

Tuesday, January 13, 2015

របៀបបង្វែរពីការ Download តាម torrent ទៅជា Download តាម IDM ល្បឿនលឿនជំនួសវិញ

សម្រាប់ លោកអ្នកដែលចូលចិត្តប្រើកម្មវិធីដែលមានកំណែប្រែជំនាន់ថ្មី ចុងក្រោយ (version ចុងក្រោយ) នោះមុខជាស្គាល់នូវវែបសាយ (Website) សម្រាប់ដោនឡូដបានងាយស្រួល ឥតគិតថ្លៃ និងប្រើបានពេញលេញ (full version) ហើយ។ ជាក់ស្ដែង នាពេលបច្ចុប្បន្ន អ្នកប្រើកុំព្យូទ័រនៅក្នុងប្រទេសកម្ពុជាភាគច្រើននិយមដោនឡូដ កម្មវិធី និងរឿងហូលីវ៉ូដថ្មីៗតាមកម្មវិធី uTorrent ឬ BitTorrent។ យ៉ាងណា កម្មវិធីទាំងពីរនេះ គឺត្រូវបានបង្កើតឡើងដោយក្រុមហ៊ុនជំនាញផ្នែក Software និងសេវាកម្មពាក់ព័ន្ធនឹងអ៊ីនធឺណិត BitTorrent ដែលមានមូលដ្ឋាននៅសហរដ្ឋអាមេរិកដូចគ្នា។

សម្រាប់វែបសាយ (Website) ដែលអាចទាញយក (download) ឯកសារ Torrent បាន គឺមានច្រើនដូចជា៖ www.torrentreactor.net, torrentz.eu, www.sumotorrent.sx និង www.mininova.org ជាដើម។ ក្នុងនោះ នៅមានវែបសាយ kickass.so ដែលកំពុងទទួលបានការពេញនិយមចូលទៅ Download យ៉ាងច្រើនពីសំណាកអ្នកប្រើកុំព្យូទ័រក្នុងប្រទេសកម្ពុជា។ ជាធម្មតា បន្ទាប់ពីលោកអ្នកចូលទៅដោនឡូដ torrent file ចេញពី kickass.so ហើយ ឯកសារនោះនឹងទាមទារឱ្យអ្នកបើកជាមួយ (Open With) កម្មវិធី uTorrent ឬកម្មវិធី BitTorrent ជាដើម។ ក្នុងការទាញយក (Download) ឯកសារតាមកម្មវិធី uTorrent ឬកម្មវិធី BitTorrent គឺមិនមានល្បឿនលឿនដូចជាអ្នក ដោនឡូកតាមកម្មវិធី Internet Download Manager (IDM) នោះឡើយ។

ទំព័រនេះ TheBNEWS សូមលើកយកគន្លឹះក្នុងការ បង្វែរពីការដោនឡូដតាមកម្មវិធី uTorrent មក ដោនឡូដតាមកម្មវិធី Internet Download Manager ដោយផ្ទាល់វិញ ដើម្បីទាញយកបានរហ័សឆាប់ពេញជាង uTorrent និង BitTorrent។

១) បើកចូលវែបសាយ kickass.so ដូចធម្មតា បន្ទាប់មក ស្វែងរកកម្មវិធី ឬវីដេអូណាមួយដែលអ្នកចង់ Download។ ត្រង់នេះ ខុសពីរបៀបដែលអ្នកធ្វើសព្វដងបន្តិច ដោយអ្នកមិនចាំបាច់ទាញយកឯកសារ torrent (Download torrent file) នោះទេ គឺអ្នកគ្រាន់តែដាក់ mouse នៅលើ icon រូបមេដែកដែលជាតំណភ្ជាប់មួយ រួចហើយចុចស្ដាំ mouse និងរើសយក Copy Link Location ដើម្បីចម្លងតំណភ្ជាប់។

ឬអ្នកអាចចូលទៅ Copy តំណភ្ជាប់ពីក្នុងកម្មវិធី uTorrent ក៏បាន ដោយចុចស្ដាំ mouse នៅលើឯកសារដែលកំពុង Download ណាមួយ (ដូចរូប)

២) ក្រោយពី Copy ហើយ សូមបើកគេហទំព័រ zbigz.com រួច Past តំណភ្ជាប់នោះនៅត្រង់ប្រអប់ស្វែងរក (ដូចរូប)។ (បញ្ជាក់៖ ក្រៅពី zbigz.com ក៏នៅមានវែបសាយផ្សេងៗទៀត អាច download បានដូចគ្នាមាន៖ BOXOPUS, PUTDRIVE, PCLOUD និង TORRENT HANDLER ជាដើម)

៣) បន្ទាប់មក សូមចុចលើប៊ូតុង Go! ដែលស្ថិតនៅផ្នែកខាងស្ដាំនៃប្រអប់ រួចចុចលើ Free ហើយត្រូវរង់ចាំមួយរយៈ។ ចុចលើប៊ូតុង Download ឬប៊ូតុង Zip (សម្រាប់ឯកសារ Zip) និងចុងលើ Free ជាការស្រេច។ (បញ្ជាក់៖ ប្រសិនកម្មវិធី IDM របស់អ្នកមិនមានបញ្ហាអ្វីទេ នោះផ្ទាំងកម្មវិធី IDM នឹងលោតចេញមកឱ្យអ្នកទាញយកបាន)

ដោយ៖ លី ឈៀន

ប្រភព៖ youtube, qdtricks, rushinformation, cpstechnologies

រូបភាព

Monday, January 12, 2015

មូលហេតុសំខាន់ៗ ៥យ៉ាង ដែលធ្វើឲ្យគូស្នេហ៍ចែកផ្លូវគ្នាជាញឹកញាប់

មូលហេតុសំខាន់៥យ៉ាង ដែលធ្វើឲ្យមនុស្សចែកផ្លូវគ្នាជាញឹកញាប់!ប្រភព៖ strictlyautobiographical.com

មានមនុស្សជាច្រើនបានសម្រេចចិត្តបង្កើតទំនាក់ទំនង និង ឈានដល់ដំណាក់កាលរស់នៅជាមួយគ្នា ក្រោយពេលបានស្វែងយល់អំពីលក្ខណៈពិសេសពីគ្នាទៅវិញទៅមក ជាមួយនឹងក្តីរំពឹងថា នឹងអាចផ្តល់សេចក្ដីសុខឲ្យគ្នាបាន។ ប៉ុន្តែយ៉ាងណាក៏ដោយ មានមនុស្សមិនតិចនោះទេ បានសម្រេចចិត្តចែកផ្លូវគ្នារស់នៅ ដោយសារតែមានបញ្ហាមួយចំនួនដែលមិនអាចដោះស្រាយបាន។ ខាងក្រោមនេះ គឺជា ចំណុចសំខាន់ៗដែលនាំឲ្យមានការចែកផ្លូវគ្នាជាញឹកញាប់៖

១) ឆាប់ទទួលយកសេចក្តីស្រលាញ់លឿនពេក
សេចក្តីស្រលាញ់គឺជា រឿងដែលហាមឃាត់មិនបាន ព្រោះ វាអាស្រ័យលើអារម្មណ៍របស់អ្នកជាមួយនឹងនរណាម្នាក់។ មនុស្សភាគច្រើននៅពេលដែលជួបមនុស្សណាម្នាក់ ហើយមានអារម្មណ៍ថាពេញចិត្តនោះ ក៏ឆាប់ទទួលយក ឬ បង្កើតសេចក្តីស្រលាញ់ភ្លាមៗតែម្តង។ ប៉ុន្តែប្រការនេះ មិនមែនជាចំណុចល្អប៉ុន្មានទេ ថ្វីបើអ្នកចូលចិត្តក៏ដោយ ព្រោះមានបញ្ហាជាច្រើនអាចកើតឡើងនៅពេលខាងមុខ ដែលមិនអាចដឹងបាន ។ ដោយសារតែបែបនេះ បានជាមនុស្សជាច្រើនបានសម្រេចចិត្តចែកផ្លូវគ្នាដើរ ដោយសារតែការឆាប់ទទួលយកសេចក្តីស្រលាញ់លឿនពេក ជាហេតុធ្វើឲ្យពួកគេមិនអាចស្វែងយល់ពីគ្នាឲ្យបានគ្រប់គ្រាន់ ឬ អាចនិយាយបានថា «បានដោយងាយ ទៅវិញក៏ងាយដែរ»។

២) មិនបានបញ្ជាក់អំពីសេចក្តីស្រលាញ់ឲ្យមុតមាំ
ថ្វីត្បិតតែអ្នកខ្លះបានសម្រេចចិត្តទទួលយកទំនាក់ទំនងជាមួយគ្នាក៏ដោយ ប៉ុន្តែ អ្វីៗនឹងរលាយបាត់ទៅវិញ ប្រសិនបើភាគីណាមួយ មិនបានបន្តបង្ហាញអំពីសេចក្តីស្រលាញ់របស់ខ្លួនឲ្យខ្លាំងក្លាចំពោះដៃគូរបស់ខ្លួន។ ដូចដែលបានដឹងហើយថា ទំនាក់ទំនងល្អមិនអាចកើតឡើងដោយសារតែ ការប្រឹងប្រែងពីមនុស្សម្នាក់បានឡើយ ពោលគឺទាល់តែមានការចូលរួមទាំងអស់គ្នា។ ការមិនបានបញ្ជាក់អំពីសេចក្តីស្រលាញ់ឲ្យមុតមាំ គឺតែងកើតឡើងជាញឹកញាប់ ដោយសារតែ អ្នកខ្លះរវល់ខ្លាំងជាមួយការសិក្សា ការងារ ឬ អាចមកពីមានចេតនាចង់បញ្ចប់។

៣) ខ្វះភាពស្មោះត្រង់
មនុស្សណាក៏ដោយ អាចរស់នៅជាមួយគ្នាបានយូរអង្វែងទាល់តែអ្នកទាំងនោះ មានភាពស្មោះត្រង់ជាមួយគ្នាទៅវិញទៅមក។ គ្មាននរណាម្នាក់អាចរស់នៅជាមួយការកុហកបោកប្រាស់បាននោះឡើយ ដូច្នេះហើយ បានជាមានការចែកផ្លូវគ្នាជាច្រើន ដោយសារតែ គ្មានភាពស្មោះត្រង់ជាមួយគ្នា។
...លក្ខណៈពិសេស៤យ៉ាងរបស់បុរស ដែលនារីៗគ្រប់រូបប្រាថ្នាចង់បាន!...
៤) គ្មានការអធ្យាស្រ័យ
ការអធ្យាស្រ័យ គឺជារឿងដ៏សំខាន់បំផុតក្នុងជីវិតរស់នៅប្រចាំថ្ងៃត្បិតអីគ្មាននរណាម្នាក់ អាចធ្វើរឿងល្អគ្រប់យ៉ាងនោះទេ ពោលគឺរមែងមានបញ្ហាកើតឡើង ឬ មានកំហុស។ ដោយសារតែបែបនេះហើយ ដើម្បីរក្សាទំនាក់ទំនងឲ្យបានយូរអង្វែងត្រូវទាមទារឲ្យ មានការអធ្យាស្រ័យគ្នាទៅវិញទៅមក ដោយផ្អែកលើ ហេតុផល និង ស្ថានភាពជាក់ស្តែង។ ប៉ុន្តែដោយសារតែ គ្មានការអធ្យាស្រ័យគ្នាបានជា មនុស្សជាច្រើនបានដើរដល់ផ្លូវបំបែក ដែលមិនអាចដោះស្រាយបាន។

៥) ខ្វះការជឿជាក់
គ្មានទំនាក់ទំនងណាមួយអាចរក្សាបានយូរអង្វែងបានឡើយ ប្រសិនបើខ្វះការជឿជាក់។ មានមនុស្សជាច្រើន តែងមានការសង្ស័យពីនេះពីនោះក្នុងទំនាក់ទំនងរបស់ខ្លួន ដែលប្រការនេះនាំឲ្យ មានភាពរកាំរកូសមិនចេះចប់មិនចេះហើយ។ នៅទីបញ្ចប់ ទំនាក់ទំនងនោះគឺមិនអាចបន្តដំណើរទៀតឡើយ ហើយដើរដល់ផ្លូវបញ្ចប់៕

ប្រែសម្រួល៖ រស្មី

ប្រភព៖ lifehack.org

ចង់ធ្វើជាសហគ្រិនបើមិនយល់ដឹងច្រើន ចងចាំច្បាប់៣នេះក៏ប្រសើរដែរ!

សហគ្រិនថ្មីថ្មោង ឬ ម្ចាស់អាជីវកម្មទូទៅគួរតែចងចាំច្បាប់៣ សំខាន់ៗនេះនៅលើផ្លូវអាជីវកម្មរបស់លោកអ្នក ដែលផ្ដោតជាអាទិភាពទៅលើភាពជាអ្នកដឹកនាំ ការគិតឲ្យបានល្អិតល្អន់ និង មានស្មារតីពិតប្រាកដភាពជាសហគ្រិន។

១) មានការទំនួលខុសត្រូវខ្ពស់
នៅពេលដែលអ្នកក្លាយជាសហគ្រិន ការទទួលខុសត្រូវរបស់ត្រូវមានកម្រិតខ្ពស់បំផុតទោះបីជាត្រូវបរាជ័យ ឬ ជោគជ័យយ៉ាងណាក៏ដោយ។ អ្នកត្រូវស្វែងយល់ពីអ្វីដែលជាតម្រូវការ និង ការចង់បានរបស់អតិថិជន កសាងទំនាក់ទំនងដ៏រឹងមាំទៅវិញទៅមកទាំងនៅក្នុង និង ក្រៅក្រុមហ៊ុន។ នេះទាមទារឲ្យអ្នកមានការអភិវឌ្ឍជាលំដាប់ក្នុងនាមជាអ្នកដឹកនាំនាសតវត្សទី២១នេះ ដើម្បីធ្វើជាការពឹងអាស្រ័យពីសំណាក់ក្រុមការងារគ្រប់ជាន់ថ្នាក់ទាំងអ្នកចូលធ្វើការថ្មី អ្នកធ្វើការចាស់ និង អ្នកដែលចាកចេញទៅ។

...ហេតុផលចំនួន៧ បញ្ជាក់ថា ហេតុអ្វីបានជាលោកអ្នកត្រូវចាប់ផ្តើមធ្វើអាជីវកម្មនៅឆ្នាំ ២០១៥នេះ?...

២) ដាក់វិន័យឲ្យខ្លួនឯងជាកំហិត
ការសិក្សារៀនសូត្រមិនចេះចប់ គឺជាអ្វីដែលសហគ្រិនគ្រប់រូបត្រូវមាន ទោះបីជាស្ថិតនៅក្នុងស្ថានភាពបែបណាក៏ដោយ។ គោរពពេលវេលា អតិថិជន បុគ្គលិក រួមទាំងការរៀបចំអត្តចរិតឲ្យសមសួនជាសហគ្រិន គឺជាករណីយកិច្ចដ៏ចាំបាច់របស់អ្នក។ ក្រៅពីនេះ អ្នកត្រូវចងចាំថា អ្នកត្រូវធ្វើឲ្យអាជីវកម្មរបស់អ្នកទៅជាកន្លែងមួយដ៏សំបូរបែប និង ជាប្រភពធនធានផលិតផល ឬ សេវាកម្មដែលអតិថិជនអាចរកឃើញដោយមិនចេះនឿយណាយ។

៣) មានមហិច្ឆតា
បើគ្មានមហិច្ឆតាទេ ចូរកុំធ្វើអាជីវកម្មល្អជាង តែបើចង់ធ្វើហើយនោះ ដាច់ខាតត្រូវមានមហិច្ឆតាថា អ្នកចង់ក្លាយជាសហគ្រិនបែបណានៅពេលអនាគត? ដឹកនាំអាជីវកម្មទៅតាមផ្លូវណា? ចង់សម្រេចនៅពេលណា? យ៉ាងណាមិញ អ្នកអាចជួបបញ្ហាច្រើននៅពេលដែលអ្នកបានឈានជើងចូលក្នុងសមរភូមិអាជីវកម្មដំបូង។ ប៉ុន្តែ កុំបោះបង់មហិច្ឆតារបស់អ្នក ហើយត្រូវជឿជាក់ថា ចក្ខុវិស័យ និង គោលដៅអាជីវកម្មរបស់អ្នកនឹងអាចក្លាយជាការពិតនៅថ្ងៃខាងមុខបាន៕

ប្រែសម្រួល៖ ខេវិន

ប្រភព៖ Entrepreneur

អនុវត្តទម្លាប់ទាំង ៩ នេះជារៀងរាល់ថ្ងៃ ដើម្បីឲ្យកាន់តែជោគជ័យក្នុងឆ្នាំ ២០១៥នេះ

ក្នុងឆ្នាំ ២០១៥ នេះតើទម្លាប់របស់លោកអ្នកខុសពីឆ្នាំ ២០១៤ ដូចម្តេចខ្លះ? តើលោកអ្នកមានគម្រោងការងារច្បាស់លាស់ប្រចាំថ្ងៃហើយឬនៅ? បើមិត្តអ្នកអានយល់ថា ទម្លាប់របស់លោកអ្នកនៅមានភាពខ្វះចន្លោះ ឬ នៅមានស្ពឹកស្រពន់នោះ គួរតែសាកល្បងអនុវត្តទម្លាប់ចំនួន ៩ នេះ ដើម្បីឲ្យឆ្នាំ ២០១៥ នេះជោគជ័យជាងឆ្នាំចាស់។

១) ក្រោកពីព្រឹកព្រលឹម
នៅពេលដែលអ្នកក្រោកពីដំណេកមុនអ្នកដទៃទៀត នោះមានន័យថា អ្នកអាចមានពេលគ្រប់គ្រាន់ក្នុងការធ្វើកិច្ចការមួយចំនួនបានទាំងព្រឹកព្រលឹម។ សម្រាប់អ្នកធ្វើការវិញ នេះនឹងជួយឲ្យអ្នកធ្វើការទាន់ម៉ោង ឬ មុនម៉ោងទៀតផង និង អាចយកពេលវេលាទាំងនោះឆែកមើលសារ ពិនិត្យគម្រោងឯកសារ និង កិច្ចការជាច្រើនទៀត។ ម្យ៉ាងវិញទៀត ទម្លាប់នេះ គឺបានបង្ហាញពីការឲ្យតម្លៃពេលវេលាមួយរបស់អ្នក ដូចមហាសេដ្ឋីជាច្រើនដែរ។

២) អានឲ្យបានច្រើន
ជារៀងរាល់ថ្ងៃ អ្នកត្រូវលៃលកពេលវេលាដ៏សមគួរមួយក្នុងការអានសៀវភៅ ទោះបីជាអ្នករវល់យ៉ាងណាក៏ដោយ ព្រោះចំណេះដឹងរបស់អ្នកមិនមែនស្ថិតនៅតែមួយកន្លែងនោះទេ។ នេះមិនមែនមានន័យថា អ្នកត្រូវអានសៀវភៅមួយក្បាលឲ្យចប់ក្នុងរយៈពេល១ ម៉ោង ឬ មួយថ្ងៃនោះទេ ប៉ុន្តែបើរវល់ខ្លាំងណាស់ គួរចំណាយពេលអានពី ៣០ ទៅ ៤០ នាទីដែរ។ អានព័ត៌មាន ទស្សនាវដ្ដី ស្រាវជ្រាវឯកសារទាំងនេះសុទ្ធតែរួមចំណែកផ្តល់ចំណេះដឹងដល់អ្នកបាន។

...សញ្ញាណទាំង ៨ បញ្ជាក់ថា បន្ទប់ធ្វើការរបស់លោកអ្នកពិតជាមានសក្ដានុពលដល់លទ្ធផលការងារ...

៣) ហាត់ប្រាណ
អ្នកត្រូវតែទទួលស្គាល់ថា ការហាត់ប្រាណគឺជាទម្លាប់ដ៏ល្អមួយធ្វើឲ្យសុខភាពរបស់អ្នករឹងមាំបានល្អ។ តើហាត់ប្រាណប៉ុន្មាននាទីទើបល្អចំពោះសុខភាព? តាមពិតទៅបើអ្នកហាត់ប្រាណតិចពេកក៏មិនល្អ ច្រើនពេកក៏មិនល្អ តែបើមួយថ្ងៃហាត់ប្រាណបាន៣០ នាទីវាជារឿងមួយល្អប្រសើរផងដែរ។

៤) ដាក់គម្រោងមុនពេលអនុវត្តការងារ
ការមានគម្រោងការងារច្បាស់លាស់ គឺជាគុណសម្បត្តិដ៏ពិសេសមួយធ្វើឲ្យការងាររបស់អ្នកត្រូវបានអនុវត្តប្រកបដោយថាមពល និង សក្ដានុពលបំផុត ព្រោះនេះវាបញ្ជាក់ថា អ្នកបានរៀបចំពេលវេលាដ៏ត្រឹមត្រូវសម្រាប់ការងាររបស់អ្នកដោយមិនខ្ជះខ្ជាយទៀតផង។ តើគួរតែរៀបចំគម្រោងនៅពេលណា? មុនពេលចូលគេង ឬ រៀបចំគម្រោង១ថ្ងៃមុនពេលអនុវត្តការងាររបស់អ្នក គឺជាដំណោះស្រាយដ៏ល្អនៅទីនេះ។

៥) ធ្វើការងារសំខាន់តាមអាទិភាព
ការងារមួយចំនួនអាចសំខាន់ក្នុងពេលតំណាលគ្នានេះ ដែលនេះប្រហែលជាធ្វើឲ្យអ្នកពិបាកសម្រេចចិត្តថា តើត្រូវធ្វើមួយណា ទុកមួយណា? ឥឡូវនេះអ្នកអាចសាកគិតបន្តិច ទោះបីជាការងារទាំងនោះសំខាន់ប៉ុណ្ណាក៏ដោយ លទ្ធផលមិនដូចគ្នានោះទេ។ ដូច្នេះអ្នកគួរតែជ្រើសរើសការងារដែលសំខាន់មុន និងទទួលបានផ្លែផ្កាច្រើនមកធ្វើមុន បន្ទាប់មកចាំយកការងារថ្មីធ្វើបន្តទៀតតាមលំដាប់លំដោយរបស់វា។

៦) ធ្វើការងារថ្មីៗឲ្យបានខ្ពស់ជាងមុន
ទម្លាប់ការងារពីមុនមក អាចគ្រប់គ្រាន់ហើយសម្រាប់អ្នក តែសូមចាំថា ការធ្វើការងារថ្មីៗលំបាកៗ កាន់តែច្រើនលើសទម្លាប់ចាស់ គឺជាសកម្មភាពដ៏ប្រសើរមួយទៀតធ្វើឲ្យអ្នកកាន់តែអភិវឌ្ឍសមត្ថភាពរបស់ខ្លួនខ្លាំងជាងមុន។ បង្កើនពេលវេលាបន្ថែមលើស ៣០ នាទី រៀនដោះស្រាយបញ្ហាលំបាកជាមួយនឹងការលើកទឹកចិត្ត និង ការព្យាយាម នឹងអាចផ្តល់ជាពន្លឺបង្កើនសមត្ថភាពការងាររបស់អ្នកបាន។

៧) ពង្រីកចំណេះដឹងបន្ថែម
ការធ្វើឲ្យអាជីពការងាររបស់អ្នកដើរទៅមុខ គឺជារឿងសំខាន់ណាស់ដើម្បីឲ្យអ្នកក្លាយទៅជាបុគ្គលមួយមានជំនាញច្បាស់លាស់ និង មានសមត្ថភាពពេញលេញ។ ប្រការនេះអ្នកមិនត្រូវនៅមួយកន្លែងនោះឡើយ ម្ល៉េះហើយការចូលរួមវគ្គបណ្តុះបណ្តាល ឬ វគ្គខ្លីៗ បង្កើតទម្លាប់ស្រាវជ្រាវឲ្យបានច្រើន ការពង្រីកបណ្ដាញទំនាក់ទំនងជាមួយមនុស្សថ្មីៗ ទាំងនេះសុទ្ធតែអាចផ្តល់ចំណេះដឹង និង បទពិសោធន៍ល្អៗដល់អ្នកដែរ។

...ហេតុអ្វីចាំបាច់ត្រូវមានភាពស្មោះត្រង់ចំពោះអតិថិជន?...

៨) ព្យាយាមឲ្យបានច្រើនជាងមុន
វាជារឿងល្អដែលអ្នកជាមនុស្សម្នាក់ដែលមានការព្យាយាមខ្ពស់មិនថា ចំពោះការងារ ឬ ការសិក្សានោះទេ។ យ៉ាងណាមិញ ការព្យាយាមរបស់អ្នកគួរតែធ្វើឲ្យមានដល់កម្រិតកំពូលមួយឲ្យខ្ពស់បំផុត ទាល់តែអ្នកជឿជាក់ថា អ្នកពិតជាបានព្យាយាមអស់លទ្ធភាពពិតមែន។ ភាពព្យាយាមនេះដើរតួនាទីយ៉ាងសំខាន់ អមទៅនឹងសកម្មភាពរបស់អ្នកប្រចាំថ្ងៃ ត្បិតអីវាជាឱសថកម្លាំងចិត្តដ៏ស័ក្តិសិទ្ធិអាចទម្លុះទម្លាយភាពទាល់ច្រក និង ការបរាជ័យបាន។

៩) ចែករំលែកឲ្យបានច្រើនជាមួយមនុស្សនៅជុំវិញខ្លួន
ការចែករំលែក គួរតែធ្វើឲ្យបាននៅពេលដែលអ្នកក្លាយជាមនុស្សមានជំនាញចំណេះដឹងច្រើន ព្រោះថា មានមនុស្សច្រើនណាស់កំពុងរង់ចាំជំនួយពីអ្នក។ ការចែករំលែកនេះមិនចាំបាច់ទាល់តែមានលុយនោះទេ ពោលគឺចំណេះដឹង ដំបូន្មាន រួមទាំងទង្វើល្អៗរបស់អ្នកផ្សេងៗទៀតក្នុងការងារសង្គម គឺសុទ្ធតែមានតម្លៃមិនអាចកាត់ថ្លៃបាន។ នេះជាអ្វីដែលអ្នកគួរបន្សល់ទុកដល់មនុស្សនៅជុំវិញខ្លួនដោយក្តីស្រលាញ់ ហើយវាជាអ្វីដែលអាចជួយឲ្យបណ្ដាញទំនាក់ទំនងរបស់អ្នកកាន់តែទូលំទូលាយឡើងៗ៕

ប្រែសម្រួល៖ ខេវិន

ប្រភព៖ Entrepreneur

Friday, January 2, 2015

អ្នកវិភាគថា យន្តហោះ QZ 8501 ព្យាយាមចុះចតលើផ្ទៃទឹកតែមិនសមតាមបំណង

យន្តហោះរបស់ US Airways ដែលបានអណ្ដែតលើទឹកទន្លេហើយអ្នកដំណើរនៅរស់ទាំងអស់ (ឆ្នាំ២០០៩)ប្រភព៖ i.huffpost.com

ឧបទ្ទវហេតុដ៏អកុសលលើយន្តហោះរបស់ក្រុមហ៊ុន AirAsia ជើងហោះហើរ QZ 8501 កំពុងស្ថិតក្រោមការយកចិត្តទុកដាក់យ៉ាងខ្លាំងពីមជ្ឈដ្ឋាន អន្តរជាតិទាំងមូល។ ថ្មីៗបំផុតនេះ សាកសពមនុស្សបន្ថែម ៧ នាក់ត្រូវបានស្រង់ចេញពីក្នុងទឹកសមុទ្រយកមកលើគោក ដែលសរុបទាំងមុនទាំងក្រោយ សាកសពអ្នករងគ្រោះដោយសារឧបទ្ទវហេតុនេះ ត្រូវគេស្រង់បាន ១៦ នាក់ហើយ។

នៅពេលនេះ គេកំពុងស្វែងរកប្រអប់ខ្មៅ តួយន្តហោះដែលគេសន្និដ្ឋានថាបានធ្លាក់ទៅបាតសមុទ្រ។ អ្នកវិភាគបានសន្និដ្ឋានជំហានដំបូងថា យន្តហោះទំនងជាមិនបានផ្ទុះកណ្ដាលអាកាសនោះទេ ហើយសាកសពអ្នករងគ្រោះទំនងជាជាប់នៅក្នុងយន្តហោះឯបាតសមុទ្រ ព្រោះមុនពេលកើតហេតុ គេជូនដំណឹងឲ្យអ្នកដំណើររឹតខ្សែក្រវាត់ចង្កេះ ព្រោះពេលនោះ មានខ្យល់បក់បោកខ្លាំង។

...ព័ត៌មានបច្ចុប្បន្នភាព ស្ដីពីករណីធ្លាក់យន្តហោះ QZ 8501 របស់ AirAsaia...

ខាងក្រោមនេះជាការវិភាគរបស់អ្នកជំនាញពាក់ព័ន្ធនឹងយន្តហោះ QZ 8501 មានសេចក្ដីដូចខាងក្រោម ៖
អ្នកវិភាគម្នាក់យល់ថាចាប់ពីពេលយន្តហោះបន្ទាបខ្លួនពីក្នុងអាកាស ក្នុងរយៈកម្ពស់ជិតដប់គីឡូម៉ែត្រ រហូតដល់ប៉ះផ្ទៃទឹកសមុទ្រនោះ គឺយន្តហោះមិនបានរងការខូចខាតអ្វីទាំងអស់។ អ្នកវិភាគយល់ថា អាកាសយានិកបានបំពេញតួនាទីរបស់ខ្លួនយ៉ាងល្អ ដោយបន្ទាបខ្លួនយន្តហោះ បន្ថើរៗរហូតដល់ប៉ះផ្ទៃទឹក។ ចំណែកអ្នកវិភាគខ្លះទៀត យល់ថាយន្តហោះបានធ្លាក់ចុះពីអាកាស ប៉ុន្តែបានធ្លាក់ដោយដាំក្បាលទៅមុន ព្រោះខ្យល់បក់ខ្លាំងពេក ហើយអាកាសយានិកមិនអាចទប់នឹងអនុភាពនៃកម្លាំងខ្យល់បក់បាន។ តាមពិត បំណងរបស់អាកាសយានិកគឺសម្រូតតួយន្តហោះ ឲ្យយន្តហោះចុះតាមសម្រួល ហើយអណ្ដែតលើទឹកសមុទ្រតាមបណ្ដោយតួយន្តហោះ។ ប៉ុន្តែអ្វីៗមិនអាចដូចបំណង។ នេះជាការសន្និដ្ឋានរបស់អ្នកជំនាញខាងវិស័យអាកាសចរណ៍។

អ្នកជំនាញខ្លះទៀតបានវិភាគឃើញថាយន្តហោះទំនងជាបានធ្លាក់ចុះមក ក្រោមយ៉ាងលឿនស្លេវ ហើយដាំក្បាលចុះក្នុងទឹកជាលក្ខណៈបញ្ឈរ មិនមែនជាលក្ខណៈបណ្ដោយតួយន្តហោះទេ។ លោក Dudi Sudibyoជានិពន្ធនាយកនៃទស្សនាវដ្ដីអាកាសចរណ៍ Angkasa យល់ថាអ្នកបើកបរយន្តហោះ QZ 8501 ចង់ឲ្យយន្តហោះធ្លាក់លើផ្ទៃទឹកជាលក្ខណៈបណ្ដែតខ្លួនលើទឹក ប៉ុន្តែមិនធ្លាក់មកបណ្ដោយតួយន្តហោះ បែរជាធ្លាក់ដាំក្បាលទៅមុនតែម្ដង។

...អាថ៌កំបាំងដែលនាំឲ្យគេរកឃើញបំណែកយន្តហោះ QZ 8501 គឺផ្ដើមចេញពីអ្នកនេសាទម្នាក់...

មូលហេតុដែលបណ្ដាលឲ្យយន្តហោះធ្លាក់ទៅក្នុងទឹក ដោយដាំក្បាលចុះបែបនេះ បណ្ដាលមកពីខ្យល់បក់ខ្លាំងពេក ប្រៀបបាននឹងគេចាប់យន្តហោះគ្រវែងចូលទៅក្នុងទឹកតែម្ដង។ យន្តហោះ QZ 8501 ទំនងជាធ្លាក់ចុះក្នុងល្បឿនជាង ៣៣០០ ម៉ែត្រក្នុងមួយនាទី រហូតដល់ទៅល្បឿនជាង ៧៣០០ ម៉ែត្រក្នុងមួយនាទី។ ល្បឿនធ្លាក់ចុះដ៏លឿនស្លេវបែបនេះ ដោយសារកម្លាំងខ្យល់បោកបក់ខ្លាំង។

សូមបញ្ជាក់ថា កាលពីខែមករា ឆ្នាំ២០០៩ មានករណីស្រដៀងគ្នានេះបានកើតឡើងចំពោះយន្តហោះរបស់ក្រុមហ៊ុន អាកាសចរណ៍ US Airways ជើងហោះហើរ 1549។ ពេលយន្តហោះ កំពុងហោះសុខៗ ក៏មានសត្វបក្សីមួយហ្វូងធំ ហោះមកបុក បណ្ដាលឲ្យម៉ាស៊ីនយន្តហោះឆាបឆេះឡើង។ មនុស្សដែលជិះនៅក្នុងយន្តហោះមានចំនួន ១៥៥ នាក់។ កាលណោះ គ្មានអាកាសយានដ្ឋានណានៅក្បែរនោះ ដែលអាចចុះចតក្នុងគ្រាអាសន្នបានទេ។ អាកាសយានិកក៏រកឃើញវិធីមួយ គឺបន្ទាបខ្លួនយន្តហោះទៅលើផ្ទៃទឹកទន្លេមួយ ហើយបានចុះថ្នមៗ បណ្ដែតតួយន្តហោះលើផ្ទៃទឹកដោយសុវត្ថិភាព (យន្តហោះនោះអណ្ដែតលើទឹក)។ អ្នកជិះក្នុងយន្តហោះ US Airways 1548 នៅរស់ទាំងអស់គ្នា៕

...ដឹងថាអ្នកបើកបរយន្តហោះ QZ 8501 ដែលបាត់ខ្លួន មានបទពិសោធន៍ជ្រៅជ្រះកម្រិតណាជាមួយ AirAsia?...

ប្រែសម្រួល ៖ អន សំអាង

ប្រភព៖ Daily Mail , theguardian.com , timesofindia.indiatimes.com , channelnewsasia.com

កៅឆាយដើមឆ្នាំ ប្រេងឆៅ និងមាសឡើងថ្លៃភ្លែត

ហាងឆេងមាស អត្រាប្ដូរប្រាក់ និងប្រេងឆៅប្រភព៖ tarborotimes.com

នៅ ព្រឹកថ្ងៃសុក្រនេះ មាសឡើងថ្លៃស្រឺតៗ បន្ទាប់ពីប្រេងឆៅបានឡើងថ្លៃវិញ។ មាសឡើងថ្លៃ ក៏មិនឡើងថ្លៃខ្លាំងពេកដែរ ព្រោះត្រូវប្រាក់ដុល្លារសង្កត់កជាប់។ មាសតាមហាងឆេងលក់ចេញព្រឹកនេះ ឡើងថ្លៃ ០,៤% គឺមួយអោនថ្លៃ ១១៨៦,៧៥ ដុល្លារ (មួយដំឡឹងថ្លៃ ១៤២៩,៨១ ដុល្លារ) គិតត្រឹមម៉ោង ០០:៣០ ម៉ោងសកលត្រូវនឹងម៉ោង ៧:៣០ ព្រឹកនៅព្រះរាជាណាចក្រកម្ពុជា។

ប្រេងឆៅតាមហាងឆេងនៅសហរដ្ឋអាមេរិកថ្លៃមួយបារ៉ែល ៥៥,១១ ដុល្លារ គឺឡើងថ្លៃបន្តិចធៀបនឹងពេលបើកផ្សារលក់កាលពីម្សិលមិញ។ ប្រេងឆៅឡើងថ្លៃបែបនេះអាស្រ័យដោយសារសហរដ្ឋអាមេរិករលស់អស់ប្រេង សន្ធឹកពីក្នុងស្តុក។

សូមបញ្ជាក់ថាប្រសិនបើប្រេងឡើងថ្លៃ មាសក៏ឡើងថ្លៃដែរ ដើម្បីទប់កុំឲ្យតម្លៃទំនិញនៅលើទីផ្សារឡើងថ្លៃពេក ព្រោះកាលណាប្រេងឡើងថ្លៃ នាំឲ្យទំនិញនៅលើទីផ្សារក៏ឡើងថ្លៃ ដោយសារគ្រប់មធ្យោបាយផលិតកម្ម និងឧស្សាហកម្មតូចធំ ត្រូវការប្រើប្រេងទាំងអស់។

អំពីសន្ទស្សន៍តម្លៃមាស អត្រាប្ដូរប្រាក់ និងប្រេងឆៅ
ប្រេងឆៅ មួយបារ៉ែល (១៥៩ លីត្រ) = ៥៣,២៧ (ហាងឆេង West Texas នៅសហរដ្ឋអាមេរិក) – ៥៧,៣៣ ដុល្លារ (ហាងឆេង Brent នៅអឺរ៉ុប)
មាស ៨ជី ៣ហ៊ុន = ១១៨៤,១ ដុល្លារ ដុល្លារ (១ដំឡឹង = ១៤២៦,៦២ ដុល្លារអាមេរិក) (តាមហាងឆេង Comex នៅសហរដ្ឋអាមេរិក)
វៀតណាម ៖ មាស ៨ជី ៣ហ៊ុន = ១១៨៤,៩៨ ដុល្លារ (មួយដំឡឹង = ១៤២៧,៦៨ ដុល្លារអាមេរិក)
ថៃ ៖ មាស ៨ជី ៣ហ៊ុន = ១១៨៤,៦ ដុល្លារ (មួយដំឡឹង = ១៤២៧,២២ ដុល្លារអាមេរិក)
ឥណ្ឌូណេស៊ី ៖ មាស ៨ជី ៣ហ៊ុន = ១១៨៤,៩ ដុល្លារ (មួយដំឡឹង = ១៤២៧,៥៩ ដុល្លារអាមេរិក)

អត្រាប្ដូរប្រាក់តាមទីផ្សារអន្តរជាតិ ថ្ងៃសុក្រ ទី០២ ខែមករា ឆ្នាំ២០១៥ (ម៉ោង ៩:១៥ ព្រឹកនៅព្រះរាជាណាចក្រកម្ពុជា)
មួយដុល្លារអាមេរិក = ៤០៧៥ រៀល (តាមអត្រាប្ដូរប្រាក់ផ្លូវការកំណត់ដោយធនាគារជាតិនៃកម្ពុជា ថ្ងៃ ទី ខែ ឆ្នាំ២០១៥)
មួយដុល្លារអាមេរិក = ៣២,៩៦៥ បាត (ថៃ)
មួយដុល្លារអាមេរិក = ២១៣៩១,៥ ដុង (វៀតណាម)
មួយដុល្លារអាមេរិក = ០,៨២៩៣ អឺរ៉ូ (១អឺរ៉ូ = ១,២០៥៨ ដុល្លារអាមេរិក)
មួយដុល្លារអាមេរិក = ១១០៥,២៨ វុន (កូរ៉េខាងត្បូង)
មួយដុល្លារអាមេរិក = ១,២២៩៧ ដុល្លារអូស្ត្រាលី
មួយដុល្លារអាមេរិក = ៧,៧៥៥៤ ដុល្លារហុងកុង
មួយដុល្លារអាមេរិក = ១,១៦៣៦ ដុល្លារកាណាដា
មួយដុល្លារអាមេរិក = ១,៣២៦៨ ដុល្លារសិង្ហបុរី
មួយដុល្លារអាមេរិក = ១២០,៤ យ៉េន (ជប៉ុន)
មួយដុល្លារអាមេរិក = ៦,២២៦៧ យ័ន្ត (ចិន)

...ហាងឆេងមាស អត្រាប្ដូរប្រាក់ និងប្រេងឆៅ ថ្ងៃចុងក្រោយឆ្នាំ២០១៤ ឡើងចុះយ៉ាងម៉េចខ្លះ?...

កំណត់សម្គាល់ : តួលេខខាងលើ ស្រង់ពីអត្រាលក់ចេញ និងប្ដូរប្រាក់តាមហាងឆេងអន្តរជាតិ គិតត្រឹមម៉ោង ៩:១៥ ព្រឹកថ្ងៃសុក្រ ទី០២ ខែមករា ឆ្នាំ២០១៥ ម៉ោងនៅព្រះរាជាណាចក្រកម្ពុជា។ ហាងឆេងនេះប្រែប្រួលគ្រប់វិនាទី អាស្រ័យលើចរន្តនយោបាយអន្តរជាតិ និងស្ថានភាពសេដ្ឋកិច្ចពិភពលោក។ ដូចនេះ គេហទំព័រ TheBNEWS នឹងបន្តតាមដានហាងឆេងតាមគេហទំព័រអន្តរជាតិ ដើម្បីធ្វើបច្ចុប្បន្នភាព (Update) រៀងរាល់ម៉ោង ឬរាល់ ៣០ នាទីម្ដង៕

ដោយ៖ អន សំអាង

ប្រភព៖ nasdaq.com - marketwatch.com - bloomberg.com - Reuters.com

ហេតុអ្វីបានជាសាកលវិទ្យាល័យ Harvard មានចំណាត់ថ្នាក់លេខមួយ ខាងវិស័យអប់រំកម្រិតឧត្ដមសិក្សា?

និស្សិតសាកលវិទ្យាហាវើត ពេលទទួលសញ្ញាបត្រប្រភព៖ alhurra.com

កាល ពីចុងខែតុលា ឆ្នាំ២០១៤ គណៈកម្មការវាយតម្លៃគុណភាពអប់រំកម្រិតឧត្ដមសិក្សានៅសហរដ្ឋអាមេរិក បានចាត់ថ្នាក់សាកលវិទ្យាល័យហាវើត (Harvard University) ជាគ្រឹះស្ថានឧត្ដមសិក្សាជាប់ចំណាត់ថ្នាក់លេខមួយ នៅក្នុងពិភពលោក។

សាកលវិទ្យាល័យហាវើតជាគ្រឹះស្ថានឧត្ដមសិក្សាដែលល្បីនៅក្នុងពិភពលោក តាំងពីច្រើនជំនាន់មកហើយ។ សាកលវិទ្យាល័យនេះត្រូវបានបង្កើតឡើងកាលពីឆ្នាំ១៦៣៦ និងជាគ្រឹះស្ថានឧត្ដមសិក្សាចាស់ជាងគេនៅសហរដ្ឋអាមេរិក។ សាកលវិទ្យាល័យនេះយកឈ្មោះតាមលោកចនហាវើត (John Harvard) ។

...បុគ្គលល្បីៗលើលោកទាំង ២៥រូបនេះ សុទ្ធតែជាអតីតនិស្សិត Harvard!...

លក្ខណៈពិសេស ដែលធ្វើឲ្យហាវើត (Harvard) នៅតែជាគ្រឹះស្ថានឧត្ដមសិក្សាឈានមុខគេ ៖
សញ្ញាបត្រចេញពីហាវើតត្រូវគេទទួលស្គាល់ជាអន្តរជាតិ ដោយសារគេទុកចិត្តលើគុណភាពអប់រំដែលមានកម្រិតខ្ពស់។ ហាវើតទទួលបានកិត្តិស័ព្ទល្បីល្បាញ រហូតដល់វ៉ាដាច់ទាំងសាកលវិទ្យាល័យ Oxford ដ៏ល្បីល្បាញរបស់អង់គ្លេសដែលមានអាយុកាលជិតមួយពាន់ឆ្នាំនោះទៅ ទៀត។ បុគ្គលល្បីៗមួយចំនួន ដែលជានិស្សិតជាន់ចាស់ (alumni) របស់ហាវើត មានដូចជា ៖ លោកប៊ីលហ្គេត (ម្ចាស់ក្រុមហ៊ុន Microsoft) – លោកម៉ាកហ្សាក់ខឺបឺក (ម្ចាស់ក្រុមហ៊ុន Facebook) – លោកបារ៉ាក់អូបាម៉ា (ប្រធានាធិបតីអាមេរិក) - លោកបានឃីមូន (អគ្គលេខាធិការអង្គការសហប្រជាជាតិ)។ល។

បេក្ខជនទាំងអស់ មុននឹងត្រូវបានអនុញ្ញាតឲ្យចូលរៀននៅហាវើត សុទ្ធតែឆ្លងកាត់គណៈកម្មការវាយតម្លៃ ដើម្បីពិនិត្យប្រវត្តិរូបនិងលក្ខណៈសម្បត្តិ ពោលគឺមិនមែនឲ្យតែមានលុយបង់ថ្លៃសាលា ដឹងតែពីចូលរៀនបាននោះឡើយ។ មូលហេតុសំខាន់ព្រោះសាកលវិទ្យាល័យយកចិត្តទុកដាក់ខ្ពស់ចំពោះ និស្សិតផង និងចំពោះទស្សនៈពីមជ្ឈដ្ឋានខាងក្រៅចំពោះសាកលវិទ្យាល័យផង ពុំនោះទេ សញ្ញាបត្រនោះនឹងមិនសូវមានតម្លៃ យកទៅដាក់ពាក្យសុំការងារធ្វើ គ្មានអ្នកណាគេឲ្យតម្លៃ។

ដោយសារប្រការនេះហើយ បានជាមជ្ឈដ្ឋានខាងក្រៅគេផ្ដល់តម្លៃឲ្យគុណភាពអប់រំ និងសញ្ញាបត្ររបស់និស្សិតចេញពីហាវើត រហូតដល់ថ្នាក់ និស្សិតខ្លះរៀនមិនទាន់ចប់ផង ត្រូវក្រុមហ៊ុន សហគ្រាសតូចធំទៅកក់ឈ្មោះនិស្សិត ដល់សាកលវិទ្យាល័យតែម្ដង ថាពេលរៀនចប់ គេនឹងទទួលឲ្យធ្វើការនៅកន្លែងគេ។

...បុគ្គល៥រូបដែលរៀនមិនចប់ថ្នាក់បរិញ្ញាបត្រ តែអភិវឌ្ឍខ្លួនក្លាយជាមហាសេដ្ឋីមានប្រាក់រាប់ពាន់លានដុល្លារ...

ចំណោមសាកលវិទ្យាល័យទូទាំងពិភពលោក ហាវើតមានបណ្ណាល័យធំជាងគេ និងមានសៀវភៅនិងឯកសារដទៃទៀត តម្កល់ច្រើនជាងសាកលវិទ្យាល័យណាៗទាំងអស់។ មានផ្ទៃដីធំទូលាយជាងសាកលវិទ្យាល័យដទៃទៀតទូទាំងពិភពលោក។

សាកលវិទ្យាល័យហាវើតត្រូវបានផ្ដល់ចំណាត់ថ្នាក់លេខមួយ ជាដរាបតាំងពីយូរណាស់មកហើយ។ ចំណុចមួយចំនួននៅក្នុងលក្ខណៈវិនិច្ឆ័យនោះមានដូចជា ៖ កម្មវិធីសិក្សាមានលក្ខណៈបើកទូលាយសម្រាប់ពិភពលោកទាំងមូល – ទំហំផ្ទៃដីសាកលវិទ្យាល័យធំទូលាយរហូតដល់ទៅជាង ១៦០ ហិកតារ – គ្រូបង្រៀនសុទ្ធតែសម្រិតសម្រាំងយកអ្នកមានចំណេះដឹង និងពិសោធន៍ជ្រៅជ្រះ - គុណភាពអប់រំនៅក្នុងថ្នាក់រៀន (ពេលប្រឡង និស្សិតមិនអាចបើកមើលសំណៅឯកសារ ឬមិនអាចលួចចម្លងគ្នាជាដាច់ខាត)– អត្រាមានការងារធ្វើ - និស្សិតដែលរៀនចប់អាចសម្រេចបានសមិទ្ធផលសំខាន់ៗ រហូតក្លាយជាបុគ្គលជោគជ័យនៅក្នុងជីវិត។ល។

ថ្លៃចំណាយលើការសិក្សា ៖ តម្លៃសិក្សាសម្រាប់ឆ្នាំ ២០១៤- ២០១៥ ក្នុងមួយឆ្នាំៗ ៤៣៩៣៨ ដុល្លារ (ជាងបួនម៉ឺនដុល្លារ)។ នេះមិនទាន់គិតតម្លៃស្នាក់នៅ អាហារ និងថ្លៃចំណាយផ្សេងៗទេ។ ថ្លៃស្នាក់នៅក្នុងសាកលវិទ្យាល័យ និងអាហារក្នុងសម្រាប់រយៈពេលដប់ខែ ១៤៦៦៩ ដុល្លារ (ជាលក្ខណៈផ្ទះល្វែងខ័ណ្ឌដាច់ៗពីគ្នា)។ បើស្នាក់នៅក្នុងអន្តេវាសិកដ្ឋាន ធូរថ្លៃជាងនេះគឺដប់ខែ ចន្លោះពីជាង ៦០០០ ទៅ ១ ម៉ឺនដុល្លារ។ អន្តេវាសិកដ្ឋានជាសាលធំ នៅចម្រុះគ្នា (យោងតាមគេហទំព័ររបស់សាកលវិទ្យាល័យហាវើត)៕

...ធ្វើម៉េចទើបដឹងថាលោកអ្នកមានបញ្ញាផ្នែកខាងអ្វី? ហើយគួរចាប់អាជីពអ្វី ឲ្យត្រូវនឹងដុងពីកំណើត?...

ប្រែសម្រួល ៖ អន សំអាង

ប្រភព៖ college.harvard.edu , gsas.harvard.edu , businessinsider.com , wikipedia.org

Cambodia News

Wednesday, January 28, 2015

មានតំរុយ ពីមូលហេតុ ដែលមុននេះបន្តិច ទាំង Facebook និង Instagram បើកមិនចេញ ទូទាំង ពិភពលោក!

Thursday, January 22, 2015

ដំបូន្មានពីរឃ្លារបស់មហាសេដ្ឋី Warren Buffet ធ្វើឱ្យអ្នកវិនិយោគកាន់តែមានឡើងៗ

អត្ថបទទាក់ទង

Wednesday, January 21, 2015

លោកអ្នកដឹងទេថា ប្រាក់អត្ថប្រយោជន៍ប្រភេទណាដែលមិនជាប់ពន្ធទេ ?

Tuesday, January 13, 2015

របៀបបង្វែរពីការ Download តាម torrent ទៅជា Download តាម IDM ល្បឿនលឿនជំនួសវិញ

រូបភាព

Monday, January 12, 2015

មូលហេតុសំខាន់ៗ ៥យ៉ាង ដែលធ្វើឲ្យគូស្នេហ៍ចែកផ្លូវគ្នាជាញឹកញាប់

ចង់ធ្វើជាសហគ្រិនបើមិនយល់ដឹងច្រើន ចងចាំច្បាប់៣នេះក៏ប្រសើរដែរ!

អនុវត្តទម្លាប់ទាំង ៩ នេះជារៀងរាល់ថ្ងៃ ដើម្បីឲ្យកាន់តែជោគជ័យក្នុងឆ្នាំ ២០១៥នេះ

Friday, January 2, 2015

អ្នកវិភាគថា យន្តហោះ QZ 8501 ព្យាយាមចុះចតលើផ្ទៃទឹកតែមិនសមតាមបំណង

កៅឆាយដើមឆ្នាំ ប្រេងឆៅ និងមាសឡើងថ្លៃភ្លែត

ហេតុអ្វីបានជាសាកលវិទ្យាល័យ Harvard មានចំណាត់ថ្នាក់លេខមួយ ខាងវិស័យអប់រំកម្រិតឧត្ដមសិក្សា?

Cambodia News

Wednesday, January 28, 2015

មានតំរុយ ពីមូលហេតុ ដែលមុននេះបន្តិច ទាំង Facebook និង Instagram បើកមិនចេញ ទូទាំង ពិភពលោក!

Thursday, January 22, 2015

ដំបូន្មាន​ពីរ​ឃ្លា​របស់​មហាសេដ្ឋី​ Warren Buffet​​​ ធ្វើ​ឱ្យ​អ្នក​វិនិយោគ​កាន់​តែ​មាន​​ឡើងៗ​

អត្ថបទទាក់ទង

Wednesday, January 21, 2015

លោក​អ្នក​ដឹង​ទេ​ថា ​ប្រាក់​អត្ថប្រយោជន៍​ប្រភេទ​ណា​ដែលមិន​ជាប់ពន្ធ​ទេ ?​

Tuesday, January 13, 2015

របៀប​​​បង្វែរ​ពី​ការ Download តាម torrent ទៅ​​ជា Download តាម IDM ល្បឿន​លឿន​ជំនួស​វិញ

រូបភាព

Monday, January 12, 2015

មូលហេតុ​សំខាន់​ៗ ៥យ៉ាង ដែល​ធ្វើ​ឲ្យ​​គូស្នេហ៍​​​​ចែក​​ផ្លូវ​គ្នា​ជា​ញឹកញាប់​

ចង់​ធ្វើ​ជា​សហគ្រិន​បើ​មិន​​យល់​ដឹង​​ច្រើន​ ចង​ចាំ​ច្បាប់​៣​នេះ​ក៏​ប្រសើរ​ដែរ!

អនុវត្ត​ទម្លាប់​​ទាំង ៩ នេះ​ជា​រៀងរាល់​ថ្ងៃ ដើម្បី​ឲ្យ​កាន់តែ​ជោគជ័យ​ក្នុង​ឆ្នាំ ២០១៥​នេះ

Friday, January 2, 2015

អ្នក​វិភាគ​ថា ​យន្តហោះ QZ 8501 ព្យាយាម​ចុះ​ចត​លើ​​​ផ្ទៃ​ទឹក​តែ​មិន​សម​តាម​បំណង​​

កៅឆាយ​ដើម​ឆ្នាំ ​ប្រេង​ឆៅ និង​មាស​ឡើង​ថ្លៃ​​ភ្លែត​

ហេតុអ្វីបានជា​សាកលវិទ្យាល័យ​ Harvard មាន​ចំណាត់​ថ្នាក់​លេខ​មួយ​ ​ខាង​វិស័យ​អប់រំ​កម្រិត​ឧត្ដមសិក្សា?

Cambodia News

ដំបូន្មានពីរឃ្លារបស់មហាសេដ្ឋី Warren Buffet ធ្វើឱ្យអ្នកវិនិយោគកាន់តែមានឡើងៗ

លោកអ្នកដឹងទេថា ប្រាក់អត្ថប្រយោជន៍ប្រភេទណាដែលមិនជាប់ពន្ធទេ ?

របៀបបង្វែរពីការ Download តាម torrent ទៅជា Download តាម IDM ល្បឿនលឿនជំនួសវិញ

មូលហេតុសំខាន់ៗ ៥យ៉ាង ដែលធ្វើឲ្យគូស្នេហ៍ចែកផ្លូវគ្នាជាញឹកញាប់

ចង់ធ្វើជាសហគ្រិនបើមិនយល់ដឹងច្រើន ចងចាំច្បាប់៣នេះក៏ប្រសើរដែរ!

អនុវត្តទម្លាប់ទាំង ៩ នេះជារៀងរាល់ថ្ងៃ ដើម្បីឲ្យកាន់តែជោគជ័យក្នុងឆ្នាំ ២០១៥នេះ

អ្នកវិភាគថា យន្តហោះ QZ 8501 ព្យាយាមចុះចតលើផ្ទៃទឹកតែមិនសមតាមបំណង

កៅឆាយដើមឆ្នាំ ប្រេងឆៅ និងមាសឡើងថ្លៃភ្លែត

ហេតុអ្វីបានជាសាកលវិទ្យាល័យ Harvard មានចំណាត់ថ្នាក់លេខមួយ ខាងវិស័យអប់រំកម្រិតឧត្ដមសិក្សា?