មុននឹងសម្រេចចិត្តទិញផ្ទះ ត្រូវគិតលើចំណុចសំខាន់ៗអ្វីខ្លះ?
មនុស្ស គ្រប់រូបតែងចង់ បានផ្ទះផ្ទាល់ខ្លួនសម្រាប់គ្រួសាររបស់ខ្លួន ជាពិសេសអ្នកដែលទើបតែមានគ្រួសារថ្មីៗតែម្តង តែវាមិនមែនជារឿងងាយស្រួលនោះទេ ព្រោះថា ផ្ទះជាទូទៅមិនមែនមានតម្លៃថោក ឬ ចំណាយអស់ថវិកាតិច ដូចទំនិញផ្សេងៗទៀតឡើយ។ ម្យ៉ាងវិញទៀត ផ្ទះខ្លះស្ថិតក្នុងលក្ខខណ្ឌមិនសូវសមស្របដែលអាចបង្កបញ្ហាផ្សេងៗ ដល់អ្នកស្នាក់នៅផងដែរនៅពេលអ្នកទិញរួច។ បញ្ហាទាំងនោះដូចជា បរិស្ថានជុំវិញ និងបញ្ហាកម្មសិទ្ធិជាដើម ស្ថិតនៅក្នុងភាពចម្រូងចម្រាស់ជាដើម។
ដូច្នេះហើយ មុននឹងសម្រេចចិត្តទិញផ្ទះ វាពិតជាចាំបាច់ខ្លាំងណាស់ ក្នុងការគិតគូរឲ្យបានដិតដល់បំផុត ដើម្បីបញ្ចៀសបញ្ហាជាច្រើនជា ដែលអាចកើតឡើងជាយថាហេតុ។ ដើម្បីជៀសវាងបញ្ហាផ្សេងៗ អ្នកដែលមានបំណងចង់ទិញផ្ទះថ្មីគ្រប់រូប គួរយល់ដឹងចំណុចសំខាន់ៗមួយចំនួនដូចខាងក្រោម៖
១) យល់ឲ្យច្បាស់ពីហិរញ្ញវត្ថុរបស់ខ្លួនមុន នឹងសម្រេចចិត្តទិញផ្ទះថ្មី អ្នកត្រូវតែដឹងឲ្យច្បាស់អំពីធនធានរបស់អ្នក ថាតើគ្រប់គ្រាន់ឬទេសម្រាប់គម្រោងទិញនេះ។ បើទោះបីជា ការទិញផ្ទះពិតជាចាំបាច់យ៉ាងណាក៏ដោយ តែមិនគួរប្រថុយទិញនោះទេ ក្នុងពេលដែលប្រភពធនធានហិរញ្ញវត្ថុមិនគ្រប់គ្រាន់ ដូចជាមិនទាន់មានការងារដែលមានប្រាក់ខែសមរម្យ សមាជិកគ្រួសារកំពុងមានជំងឺធ្ងន់ធ្ងរ និង បញ្ហាផ្សេងៗទៀត ព្រោះក្នុងកាលៈទេសៈនេះ វាអាចធ្វើឲ្យអ្នកប្រឈមការលំបាកខ្លាំង ក្រោយពេលទិញ ដោយសារគ្មានថវិកាបន្តដំណើរការអាជីវកម្ម ឬ សម្រាប់ផ្គត់ផ្គង់គ្រួសារ។
២) ទីតាំងសមស្របផ្ទះគឺជាកន្លែងដែលសមាជិក គ្រួសារត្រូវការស្នាក់អាស្រ័យ ដូច្នេះមុននឹងសម្រេចចិត្តទិញ អ្នកគប្បីយល់ដឹងអំពីទីតាំងឲ្យច្បាស់លាស់។ ក្នុងន័យនេះ អ្នកគួរទិញផ្ទះណាដែលផ្តល់ភាពងាយស្រួលក្នុងការធ្វើដំណើរទៅ ធ្វើការ ឬ ទៅសិក្សា ពោលគឺ មិនឆ្ងាយខ្លាំងពេក ព្រោះបើផ្ទះនោះមានចម្ងាយឆ្ងាយ វាធ្វើឲ្យសមាជិកគ្រួសារម្នាក់ចំណាយពេលវេលាយូរក្នុងការ ធ្វើដំណើរ។
ម្យ៉ាងវិញទៀតបញ្ហាសន្តិសុខក៏ជារឿងសំខាន់ដែរ ព្រោះបើទិញផ្ទះនៅកន្លែងដែលងាយប្រឈមនឹងគ្រោះថ្នាក់ ដូចជានៅតំបន់ ដែលមានការជួញដូរគ្រឿងញៀន ឬ នៅកន្លែងដែលមានហាងស៊ីផឹកច្រើន សុវត្ថិភាពគ្រួសារ ឬ របស់របរក្នុងផ្ទះ ប្រាកដជាមិនអាចធានាបានឡើយ។ លើសពីនេះទៅទៀត បរិស្ថានជុំវិញក៏ជារឿងសំខាន់ណាស់ដែរ ព្រោះបើផ្ទះនេះមិនមានខ្យល់អាកាសបរិសុទ្ធគ្រប់គ្រាន់ ឬ ស្ថិតក្នុងតំបន់កខ្វក់នោះវាអាចជាប្រភពនៃបញ្ហាដែលអាចបំផ្លាញ សុខភាពដល់គ្រួសារទាំងមូល។
…ហេតុផល៤យ៉ាងដែលធ្វើឲ្យលោកអ្នក មិនអាចផ្លាស់ប្ដូរទម្លាប់អាក្រក់ខ្លួនឯងបាន…
៣) យល់ដឹងអំពីកម្មសិទ្ធិកាន់កាប់មានផ្ទះខ្លះ ត្រូវបានគេដាក់លក់ក្នុងតម្លៃថោក ដូច្នេះវាជាចំណុចទាក់ទាញបំផុតសម្រាប់ដែលប្រាថ្នាចង់បានផ្ទះ សម្រាប់ស្នាក់នៅ។ ត្រង់ចំណុចនេះ អ្នកមិនអាចស្រវាទិញភ្លាមៗពេកនោះទេ ពោលគឺត្រូវការប្រើពេលដើម្បីស្វែងយល់ពីទីតាំង និងចំណុចផ្សេងៗទៀតឱ្យបានច្បាស់សិន។ ផ្ទះខ្លះមិនមានប័ណ្ណកម្មសិទ្ធិកាន់កាប់ត្រឹមត្រូវនោះទេ ហើយផ្ទះខ្លះទៀតស្ថិតនៅតំបន់មានជម្លោះ ឬកន្លែងដែលគេត្រូវយកទៅអភិវឌ្ឍន៍ជាដើម ទាំងនេះអាចជាបញ្ហាដ៏ធ្ងន់ធ្ងរសម្រាប់អ្នកដែលជាម្ចាស់ផ្ទះ ថ្មីនេះ។
រឿងមួួយទៀត ដូច្នេះមុននឹងសម្រេចចិត្តទិញ ត្រូវតែយកចិត្តទុកដាក់ជាចម្បង លើឯកសារផ្លូវច្បាប់ (លិខិតកម្មសិទ្ធិ)។ ក្នុងករណីនេះ បើមិនសូវយល់ច្បាស់ អ្នកគួរស្វែងរកអ្នកប្រឹក្សាផ្លូវច្បាប់ដើម្បីជួយពន្យល់ ក៏ដូចជាផ្ដល់យោបល់ល្អទាក់ទងនឹងបញ្ហាខាងលើ ពិនិត្យលិខិតស្នាម និងលិខិតកម្មសិទ្ធិថាមានជាប់រឿងក្ដីក្ដាំអ្វី ឬអត់។
៤) ត្រូវយកចិត្តទុកដាក់លើគុណភាពសំណង់ផ្ទះ មួយចំនួន ត្រូវបានសង់ឡើងដោយស្របទៅតាមបទដ្ឋានសុវត្ថិភាពពេញលេញនោះទេ ព្រោះថា ការធ្វើបែបនេះដើម្បីចំណេញប្រាក់ច្រើនក្នុងពេលសាងសង់។ ដើម្បីអាចស្វែងយល់ឲ្យច្បាស់ពីបញ្ហានេះ អាចអាចទៅធ្វើការសង្កេតលក្ខណៈទូរទៅនៃសំណង់នោះ ហើយក្នុងករណីដែលអាចដឹងកាន់តែច្បាស់ទៀត អាចអាចស្វែងរកអ្នកជំនាញដើម្បីប្រឹក្សា។ អ្នកខ្លះឃើញសំណង់មិនសូវល្អ លិចទឹក ឬ ប្រេះកន្លែងផ្សេងៗតែលក់តម្លៃថោក អ្នកចង់ទិញឱ្យបាន រួចចាំជួសជុលក្រោយ។ តែកុំភ្លេច ត្រូវចាំថា បើតាមការវាយតម្លៃរបស់អ្នកទំហំនៃការជួសជុលអាចចំណាយអស់ ប្រាក់ចូរកុំទិញ ទោះលក់ថោកក៏ដោយ។ មានពេលខ្លះការវាយតម្លៃទំហំនៃការជួសជុលខុស នាំឱ្យអ្នកចំណាយអស់ច្រើន ពោលគឺដូចទិញផ្ទះដែលមានស្ថានភាពល្អអីចឹងដែរ។
៥) សិក្សាទៅលើតម្លៃលើទីផ្សារចំពោះតម្លៃនៃ ការទិញផ្ទះ ពិតជាមានសារៈសំខាន់ខ្លាំងណាស់ ដូច្នេះថ្វីបើផ្ទះនោះពិតជាត្រូវចិត្តរបស់អ្នកក៏ដោយ តែក៏ត្រូវស្វែងយល់ពីតម្លៃជាក់ស្តែងនៅលើទីផ្សារឲ្យបានច្រើន សិន។ បើទោះបីជា តម្លៃផ្ទះមានលក្ខណៈខុសគ្នា អាស្រ័យទៅលើទីតាំងភូមិសាស្ត្រក្តី តែការស្រាវជ្រាវពីតម្លៃលើទីផ្សារនេះ អាចធ្វើឲ្យអ្នកអាចទិញផ្ទះក្នុងតម្លៃដ៏សមរម្យបំផុតទៅតាមស្ថាន ភាពជាក់ស្តែង។ នៅកម្ពុជាបច្ចុប្បន្ន មានក្រុមហ៊ុនផ្ដល់ប្រឹក្សាផ្នែកអចលនទ្រព្យជាច្រើន បើអ្នកមិនច្បាស់ទេ គួរទៅរកសេវាកម្មរបស់ក្រុមហ៊ុនទាំងនោះ។ ក៏ប៉ុន្តែអ្វីដែលសំខាន់ អ្នកត្រូវផ្ដល់ថ្លៃសេវាកម្ម៕
No comments:
Post a Comment