បើមានចំណុចសំខាន់ៗទាំង៥នេះ អ្នកអាចកំណត់ពីភាពជោគជ័យទៅថ្ងៃអនាគតបាន!
១) ការអាន
ការអានពិតជាមានសារៈសំខាន់ខ្លាំង ណាស់សម្រាប់មនុស្សគ្រប់រូប ព្រោះវាជួយឲ្យអ្នកទទួលបានចំណេះដឹងជាច្រើនប្រភេទដែលមានប្រយោជន៍ សម្រាប់ជីវិត។ កាលណាអ្នកមានចំណេះដឹងគ្រប់គ្រាន់តាមរយៈការអាននោះ វាគឺជាទុនដ៏សំខាន់សម្រាប់អ្នកក្នុងការធ្វើកិច្ចការផ្សេងៗ ព្រោះបើគ្មានចំណេះដឹង និង ព័ត៌មានទេ អ្នកមិនអាចធ្វើការសម្រេចចិត្តប្រកបដោយប្រសិទ្ធភាពឡើយ។
២) ចម្ងល់
ការឆ្ងល់ គឺជាជំហានដ៏សំខាន់មួយដែលនាំឲ្យមនុស្សអាចរកឃើញនូវអ្វីល្អៗ និង ថ្មីៗដែលមានប្រយោជន៍សម្រាប់ជីវិតប្រចាំថ្ងៃ។ ឧទាហរណ៍ថា អ្នកចង់បើកអាជីវកម្មមួយ អ្នកត្រូវមានសំណួរជាច្រើន ដើម្បីស្វែងរកចម្លើយ ដូចជា តើជាអាជីវកម្មអ្វី? មានធនធានគ្រប់គ្រាន់ឬទេ? អតិថិជនជានរណា? និង សំណួរផ្សេងៗទៀត។ ដូច្នេះហើយ អ្នកត្រូវបង្កើតសំណួរឲ្យបានច្រើនរាល់ពេលធ្វើអ្វីមួយ ដើម្បីជៀសវាងបញ្ហាកើតឡើងនៅពេលក្រោយទៀត។
៣) ចេះបត់បែន
រាល់ការធ្វើកិច្ចការអ្វីក៏ដោយ អ្នកត្រូវតែចេះបត់បែនតាមស្ថានការណ៍ឲ្យបានល្អបំផុត ព្រោះបើមិនដូច្នោះទេ ប្រាកដជាត្រូវផុងក្នុងបញ្ហាងើបមុខមិនរួចឡើយ ព្រោះអ្វីៗតែងតែប្រែប្រួលជានិច្ច។ ក្នុងន័យនេះ អ្នកត្រូវតែតាមដានស្ថានការណ៍ជុំវិញខ្លួនឲ្យបានល្អបំផុត ដើម្បីប្រាកដថា ការសម្រេចចិត្តរបស់អ្នកនឹងមិនបង្កបញ្ហា។ ប្រសិនបើ អ្នកបត់បែន និងសម្របខ្លួនទៅនឹងស្ថានការណ៍កំពុងកើតឡើងមិនបានទេ អ្នកពិតជាពិបាកទទួលជោគជ័យណាស់។
៤) ការទំនាក់ទំនង
ការទំនាក់ទំនងពិតជាមានសារសំខាន់ខ្លាំងណាស់ក្នុងជីវិតរស់នៅ ព្រោះវាជួយឲ្យមនុស្សគ្រប់គ្នាអាចប្រាស្រ័យទាក់ទងគ្នាទៅវិញទៅមក ដោយងាយ។ ទោះបីមានចំណេះដឹងខ្ពស់ប៉ុណ្ណាក៏ដោយ អ្នកមិនអាចជោគជ័យដោយងាយឡើយ បើខ្វះជំនាញទំនាក់ទំនង។ ដូច្នេះ អ្នកគួរតែព្យាយាមពង្រឹងជំនាញនេះឲ្យបានរឹងមាំ។
…តើអ្វីទៅជាអាវុធសម្ងាត់របស់នាយកប្រតិបត្តិ (CEO) ក្រុមហ៊ុនកំពូលៗក្នុងលោក?…
៥) ការងារក្រុម
បើទោះបីជាពូកែយ៉ាងណាក្តី មនុស្សម្នាក់មិនអាចរ៉ាប់រងធ្វើកិច្ចការរាប់រយជំពូកតែម្នាក់ឯង ហើយទទួលបានជោគជ័យទេ ពោលគឺត្រូវតែមានការចូលរួមធ្វើការជាក្រុម។ ជាការពិត ការធ្វើការងារជាក្រុមមិនងាយស្រួលប៉ុន្មានទេ ព្រោះមនុស្សម្នាក់ៗសុទ្ធតែមានគំនិតផ្ទុយពីគ្នា។ ប៉ុន្តែត្រូវតែរៀនធ្វើការ ហើយសម្របសម្រួលជាមួយគ្នាដើម្បីទាញយកប្រយោជន៍ឲ្យបានច្រើន៕
ប្រែសម្រួល៖ រស្មី
ប្រភព៖ www.inc.com
No comments:
Post a Comment